Lucas 10 - NandevaBiblia

Jesús mondo 70 õre

¹ Haivi Ñandeja pyhỹrõ 70 mondo verã momokue hỹnonderã, tentaipi, hareka opaite hai oho verãipi.

² Jesús heishu reta: Ãñete heta'ẽ timĩty javyjemava, tẽvã mbovyĩjyre mba'apo'iare. Hãrã pirureshu koo Ija, tymbou mba'apo verãre, mynõõ verã koo hupi'õ.

³ Pekua, tẽvã pikuapo pymondo she apyrỹmondova avisha ray rãĩmi, avara vasure mbytepe.

⁴ Avy pyraha kyrypoti hyru, maĩrã vosa maĩnunga'ẽpya, hareka pyndypasare; avy pimbou pehupi mbavape pymarãndu verã.

⁵ Pyvãhẽma pente ooperã, tynõndepo pererãni: “Pyavapy tõĩ kova oope”.

⁶ Ĩme'ẽ haipe kuareta vy'avarã, hoka ñymarãndu pyavapy ryheva hai retapo ña'ãporã; tẽvã kyrããrã hoka ñymãrãndu vya ryheva, oujyvyĩpopekui.

⁷ Pypyta hoka oope, peu hareka pimbyupy me'ẽãpeva; mba'apo'ia rãnga ẽẽñõĩ me'ẽãshu verã japova hepykue. Avy kokoty'õ oo retaipi pikokui.

⁸ Opaite tenta pichevaipi hareka pymyvãhẽã kavivape, pe'uĩpokui me'ẽãpeva.

⁹ Ĩme'ẽ haipe ñymbairasyarã, pymynguera hareka pereshu reta: “Tũpa ẽvãpe'õ ryheva kõõma ẽẽ pyndyhevi”.

¹⁰ Tẽvã ĩme'ẽ tenta pehovape pymyvãhẽmbavarã, pẽhẽ vataha'õĩpi hareka pere:

¹¹ “Yvy timbo pynyrẽntape'õ yrepyre oja vekua, mytỹmohãjy pyndyrehe. Tẽvã, pikuaapo kova, Tũpa ẽvãpe'õ ryheva ñymykõõĩma'ẽ pyndyhevi”.

¹² Hãma hai pee: Ñimbivache arape, ko ñunupa hoka tenta pevarã pohyvepo kuaretare Sodomape'i vekua retaivi.

Tentare ñee hendumba'iare

¹³ Jesús heivejy: Tengapope kuaretare pikova tenta Corazinpe! Tengapope kuaretare pikova tenta Betsaidape! Tiro hareka Sidonpe japoha mbaikavire heshaha verã pynymbytepe japoha vekuarã, kurimbatẽ oujy verã Tũpa jykoty, ñymbasype mondeava hũũvape ñimimonderã, hareka vapytẽ verã tanimbupy.

¹⁴ Hãrã ñimbivache arape, pohyvepo punũpaha kuaretare Tiro hareka Sidonpe'õ retaivi.

¹⁵ Nde tenta Capernaum, rĩmõãra vate arapy ndurupiha? Ãña ẽvãpeve rãgapo nymbyvejyhakui.

¹⁶ Hãma pynyrẽnduva, she shyrẽndu jyve; hãrã pinimbijicheva, shimbijiche jyve; hareka shimbijicheva, mbijiche jyve shymbou vekua.

70 iare oujyrã vẽkua

¹⁷ Hãma 70 kuaretare mondoava vy'ape vãhẽjy jyverurã hei reta: Yreja, mbaiposhy retaave rãnga, ndyreepe he'iashua japo.

¹⁸ Jesús heishu reta: “She ahesha marãra Satanas oa vate araivi, vera vekua rãĩmi.

¹⁹ She ameẽ pee mbaikatu pypyrõhe verã mboi hareka vãkyrãpere, hareka pijepyhe verã pyndyresha tamba'iare ñymbaikatu, mbaimbaa japo pyndyrehevape.

²⁰ Tẽvã avy pyvya mbaiposhyre japo pee pereshuavarã, pyvy'apo jyve pyndyree ñonohãma vate arapy Tũpa ẽvãperã”.

Jesús vya'i

²¹ Haipe Jesús Espiritu Santo rupii vya'irã hei: Ãrẽmombai vasu Sheru, ara hareka yvy Ija, shara kova mbai rĩñomishi ĩñarãnduvare hareka mbai kuaavare, hãrã rikuaakashu mbaimba kuaavare. Shara Sheru, nde kyrã ripota.

²² Opa mba'e Sheru ñono shepope. Mba'ety kuaava mbavara hai Tyray, koñeĩ Teru, hareka mba'ety kuaava mbavara hai Teru, koñeĩ Tyray, hareka pota kuaakashuare kuaakaposhu Tay.

²³ Haipe Jesús maĩhe mboirea retarã heishu hã'ẽĩ ẽvape: Vy'apo kuareta heshava, kova mbai pyhesha pẽĩva.

²⁴ Ãñẽtẽĩte hai pee, heta Tũpa ĩñee mbeu'ia hareka huvisha vasure potatẽ hesha kova, pee pyheshapẽĩva, tẽvã heshãã; potatẽ henduvare ko pyhendupẽĩva, henduã reta.

Pente Samariape'õ pya kaviva

²⁵ Haivi ñymbojahe pente Moisés mbypara vekua pyrỹmboi'ihea pyahããshu verã, pyrãndushu Jesús: Pyrỹmboi'ia, mbaivarapo ajapo apity verã tykove opambava?

²⁶ Jesús heishu: Mbaivara hei Moisés mbypara vekuape? Marãra rimbijetarã, rikuaa?

²⁷ Moisés mbypara vekua pyrỹmboi'ihea hei: “Haihu Ndeja nu Tũpa, ndypya ryheve, ndyrykove, nypyrãtãkue ryheve, hareka ñymbai kuaakue ryheve, hareka; haihu ndapisha nde rijyhaihuva rãĩmi”.

²⁸ Haipe Jesús heishu: Hekopekaviny rere. Kyrã japo hareka rikopo, ĩmeporyre tykove opambava.

²⁹ Tẽvã Moisés mbypara vekua pyrỹmboi'ihea pota mbyhaikavi pyrãnduvarã heishu Jesús: Mbavara hai shapisha?

³⁰ Jesús heishu: Pente kuimbai ohojy Jerusalénvi Jerico kyty, hãma ohojymarã oa manarõ'iare ipope, opa hekyshi reta mondeva hareka hetama nupãrã juka ñono, haipe hejarã ohoshi reta.

³¹ Mondii hasa haipi pente pai, hãma heshatẽã jereherã hasa ohoshi.

³² Haivi pente kuimbai pai mboryrea hasa jyve haipi, heshatẽã hasaĩ oho jyveshi.

³³ Tẽvã pente kuimbai Samariape'õ oho jyve hoka pehupi, hãrã hesharã parekoshu.

³⁴ Hãma ñymbojahe hoka kuimbairã, pyhãnopyshu asaite hãndi vino, kutuha vekuape hãrã opa jokuashu. Haivi hupi hũmba mbirikarerã, raha pente mbuhupare hooperã haipe ñyngarekohe.

³⁵ Hãma ĩrũ arajyape, nohẽ mokue nikere meẽshu oo ijarã, hei: “Ñyngarekohe shekui ko kuimbai, hãma ĩme'ẽ rymbyhepyvehearã, aijyrã ambyhepyjypo ndekui”.

³⁶ Mbavara kova mbahapyivi, manarõ'iare ipope oa vekua, hapisha?

³⁷ Moisés mbypara vekua pyrỹmboi'ihea hei: Kuimbai parekoshu vekua. Haipe Jesús heishu: Ekua kyrã japove.

Jesús, oho Marta hareka Maria hentape

³⁸ Hãma Jesús oho mboireare hãndi pehupirã iche pente tentape. Haipe taupe Marta he'iashua myvãhẽ hentape.

³⁹ Marta ĩmere pente kypyy Maria he'iashua, ou vapy Ñandeja hỹnonde jasaka'ẽhẽ hai heiva.

⁴⁰ Marta japo verãĩ ojepyapy'ihe, hãrã ñymboja Jesús ẽvãperã, heishu: Sheja, ryheshãra shykypyy sheĩ shyrejahe ko ajapo ãĩva? Ereshu tou shymboryvei.

⁴¹ Tẽvã Jesús heishu: Marta, Marta, opa mbai rijapo verãre rĩkangyrihe hareka rejepy'apyherihe;

⁴² tẽvã pente mbai haikavivaĩ. Hokava pyhỹrõma hai Maria, hãrã mba'etyjy hekyshi verã.