Lucas 1 - NandevaBiblia

Ñee tynondeiteva

¹ Heta'ẽ oñehãã hendape kavi ñonova arykai mbai añeteva ỹrymbytepe iko vekua,

² ỹrymboiva rãĩmi jypyiterãvãĩ hesha vekuare, hareka pyrỹmbory mbe'ua verã Ñee kaviva.

³ She rãnga aikohe aikuaa kavirãni verã jypyiterãvãĩ, hãrã haikavishe ambyparande verã kova mbai hendape kavi, nde Teofilo,

⁴ rikuaa kavi verã opa mbai añeteva nymbo'eaheva rãĩmi.

Tũpa jokueva mbeu Juan Bautista oa verã

⁵ Herodes jy'arape, Judeape'õ huvisha vasu, ĩmemba'ẽ pente pai Zacarías he'iashua Abías ryhevare. Hareka hyreko Elizabet jyve, Aarón ryhevare.

⁶ Mokue ryheve heko kaviva Tũpa hỹnonde, hareka japo hekope kaviva ñeẽ japoa verã.

⁷ Tẽvã hĩjapoã reta, shara Elizabet membymba ryheva, hareka mokue ryheve kuakuaamãrã.

⁸ Hãma pente arape mba'apo ẽẽ Zacarías Tũpa hỹnonde tũpao pe, japo verã vahẽmarã,

⁹ paire japoseva rãĩmi, Zacarías iche Ñandeja hoo matãtĩ verã mbai pishe kavivapy.

¹⁰ Haivi hapyama'ẽ mbai pishekatuvarã, kuareta hetava ñymbaty'õ katuape jurure ñynoĩ.

¹¹ Haivi sapy'ãĩ ijeshakashu Zacarías pente Ñandeja jokueva. Ñymboy altar mbai pishekatuva jichere.

¹² Zacarías heshama hoka Tũpa jokuevarã myngyje hareka kũãã mbaivara japopo.

¹³ Tẽvã Tũpa jokueva heishu: Zacarías, avy kyje! Tũpa henduma nde rirureva. Ndyreko Elisabet membypokui, hãrã ndyray rymbyheepokui Juan.

¹⁴ Ryvy'apokui, hareka hetavapepo mbyvya jyvekui hai oamarã.

¹⁵ Shara ndyray haipokui pente kuareta mbaivasuva Ñandeja hỹnonde. Ho'ũãpo vino pyrỹmyngauva, hareka ndeiteri oarãvãĩpo tynyhẽ Espiritu Santo.

¹⁶ Heta Israelpe'õre nohẽjypo mbai porãmba vekuaivi haire Ija Tũpa hape kyty.

¹⁷ Ko Juan vãhẽpo ndeiteri Cristo ourã, Tũpa ĩñee mbeu'ia Elías espiritu hareka mbaikatu ryheve, mbypya kavi verã tuure tayre hãndi, hareka mboi verã ñee hendumbare, ñee hendu verã. Kyrãpo myhẽvã hai henta ĩrũre Ñandeja pevãrã.

¹⁸ Zacarías pyrãndushu Tũpa jokueva: Marãrapo aikuaakui kyrãpo jehurã? She akuakuama, hareka shyreko kyrãi jyve.

¹⁹ Tũpa jokueva heishu: She hai Gabriel, ãĩme'ãĩva Tũpa hỹnonde; hãrã hai shymbou rẽĩvape ambeunde verã kova ñee haikaviva.

²⁰ Tẽvã ã'ẽ na'ẽngupo rypyta shara haindeva ryrojãã. Rijetavẽãpo ndyray oapeve, hokava jehupo nde ryrojãã shiñeerã, jy'arape iko vẽrã.

²¹ Hãma kuareta hetava katuape Zacaria hãrõ õre, pỹrãndu ijupe reta mãrã'ĩrãra kỹyĩtemã'ẽ tũpao pe.

²² Haivi Zacaria õhẽjymarã, ijetããshu reta. Hãrã kuaaravĩĩ reta mãĩnũnga heshava tũpao pe. Hãrã Zacaria ipoĩ myhã'ãnga'i ijetashu verãre shara ñã'ẽngu pyta.

²³ Hãma opa japo tũpao pe japo verãrã, Zacaria ohojy hentape.

²⁴ Hãrã mbovy arama hasarã hyreko Elisabet purua, hareka 5 jasy õhẽveã hentaivi, shara pyapeĩ he'i:

²⁵ Ñandeja kyrã japo shyrehe potaveama kuaretare shyreshatãrã.

Pente Tũpa jokueva mbeu Jesús oa verã

²⁶ Hãma 6 jasy heape, Tũpa mondo jokueva Gabriel tenta Nazaret he'iashuva Galileape'õ.

²⁷ Haipe iko'i Maria, kuñatãĩ pokoambateriheva, ĩñee meẽmava omendahe verã José he'iashua, David ñymoña hãndiare

²⁸ Tũpa jokueva iche Maria ẽvãperã heishu: Arỹmarãndu kavi! Ñandeja ẽẽ nendie, mbaikavipy nymytynyhẽva opaite taupe retaivi.

²⁹ Maria hendu ko ñeerã mbyrymaĩ, hãrã pyapẽĩ pyrãndu ijupe mbaivara he'ise hokava marãndu.

³⁰ Tũpa jokueva heishu: Maria avy kyje, shara Tũpa maĩkavimba ndyrehe.

³¹ Ndupuruapo hareka nymemby kuimbaipo hãrã rymbyheepokui Jesús.

³² Hai mbaivasupo hareka mbyheeaposhu Tũpa Tay vateve'õ; hãma Tũpa Teja japoposhi Mburuvisha vasu, tynondeshivare David rãĩmi.

³³ Hai ikoposhi Jacob henta ĩrũre Juhuvisha vasu. Hãrã hai'ẽpo opa ara pevarã, japyveamapo.

³⁴ Maria pyrãndushu Tũpa jokueva: Mãrãirapo iko hokava, she aikombateri hãndiva kuimbai?

³⁵ Tũpa jokueva heishu: Espiritu Santo ñymbaikatu vejypo nẽãrẽ, hãrã Tũpa vateve'õ ñymbaikatu nymoãpo ãvãpyntu rãĩmi. Hãrã hokava sanjay ou verã mbyheeapo heko kaviva Tũpa tay.

³⁶ Hãma Elizabet, nyrẽtarã membypo jyve, kuakuamatẽva. He'iaheva membymba'ia, katynga japoma 6 jasy puruava.

³⁷ Kova heshaka shara Tũpa pevarã mba'ety hai katumba.

³⁸ Haivi Maria hei: She hai Ñandeja jokuereva. Tũpa tijapo shyrehe nde rereva rãĩmi. Hãrã Tũpa jokueva ohojyshi.

Maria oho pohyshu Elizabet

³⁹ Hokava arape Maria ãrẽ'ãite oho pente tenta Judeape'õ yvyturusure ẽvã.

⁴⁰ Hãma iche Zacarías hentaperã marãndushu Elizabet.

⁴¹ Elizabet hendu Maria mãrãndurã, õmy sanjay hyepe, hãrã Elizabet Espiritu Santo tynyhẽ.

⁴² Hãma hỹnatu ijetarã hei: Tojehovasa nde opaite taupe retaivi, hareka mãĩ kavihe nymemby ĩmeryre verã.

⁴³ Mbavara she, ou pohyshe verã Sheja ishy?

⁴⁴ Ahẽnduma shymãrãndurã, shymemby vy'aite'irã omỹ shyryepe.

⁴⁵ Ryvy'apo nde ryrojava, shara Ñandeja heinde vekua ikopo.

Maria pyraheshu Ñandeja

⁴⁶ Maria hei: Shyrykove mbyhoryrã pyraheshu Ñandeja;

⁴⁷ hãrã shykove vya Tũpare shymondo jepeva.

⁴⁸ Shara Tũpa mãĩ shyre, jokuerea pavete'ia, hãrã ã'ẽ heiposhe reta; Tũpa mãĩ kavi ndyrehe.

⁴⁹ Shara ñymbaikatuva kova mbai vasu japo shyrehe. Heko kyamba he'iashu hee.

⁵⁰ Tũpa pareko ñõĩpo opa ara ñymoñavare hai õmombaishuvape.

⁵¹ Japo mbai vasu hai ñymbaikatu rupĩĩ hareka opa momohẽ ñymbyvate'iare.

⁵² Heky ñymbaikatuvare vapypya retaivi hãrã vateve ñonoshu pavetevare.

⁵³ Hãrã ñymbahyvape meẽ mbaikaviva, hãrã iko katuvare iporãĩ mondojy.

⁵⁴ Mboryshu jokuevare tenta Israelpe'õ, hareka poiã parekoshu reta.

⁵⁵ Hai ñee meẽvã rãĩmi ñanytynondeva retape Abrahampe hareka ñymoña hãndi verãre opa ara.

⁵⁶ Maria pyta hãndi Elizabet mbahapy jasy kavi, haivi ohojy hentape.

Juan Bautista oarã vekua

⁵⁷ Vãhẽma ara Elizabet memby verãperã, kuimbaimi oashu.

⁵⁸ Hyvache'õre hareka hentarãre jyraha marãndushu kuama Ñandeja jypareko ẽẽherã.

⁵⁹ Hãrã 8 aravape raha reta sanjay ñymbai piremi chĩchĩa verã, hãrã pota ñono jyrehe tuu hee, Zacarías.

⁶⁰ Tẽvã ishy hei: Mba'ety! Juan he'iaposhu.

⁶¹ Haire heishu: Marã'ĩrãra? Mba'ety rãnga nyretarãre kyrã he'iashua.

⁶² Hãma myhã'ãngape pyrãndushu reta tuu Zacarías, marãra kyrẽy mbyhee sanjay.

⁶³ Zacarías jurure pente yvyra pysẽvẽ mbypara verã hãrã ñono: “Juan he'iaposhu”. Opaiteva mbyrymaĩ reta.

⁶⁴ Haivi Zacarías õñepyrõ pyrahe hareka ohovasashu Tũpa.

⁶⁵ Opaite henta ĩrũre; hareka opa tenta Judea yvyturusu retaipi mbe'uha kova mbai ikova.

⁶⁶ Hãma opaite kova mbai henduvare pya mbĩjeta hareka pyrãndu ijupe reta: Mbai verãtepokui ko sanjay? Shara Ñandeja añetevape ẽẽ hãndi.

Zacaria jypyrahe

⁶⁷ Hãma tuu Zacaria, tynyhẽ Espiritu Santorã mbeu ikoverãrã hei:

⁶⁸ Toñemombai vasu Ñandeja Israel ñu Tũpa, shara ou pohyshu hareka mondojepe verã henta ĩrũre.

⁶⁹ Mbou ñande pente ñymbai katupe ñanymondo jepe'i verã, huvisha vasu David ñymõñashia mbyteivi jokueva.

⁷⁰ Kova hai mbe'uka ñandea Tũpa ĩñee mbeu'ia heko kyamba arykaivare rupĩĩ:

⁷¹ Ñandyrekyshi verã ñandyvaishore, hareka opaite ñandyreshatamba'iare,

⁷² heshakashu verã jyparekokue ñanytynondevare, hareka manduahe verã ñee me'ẽã vekua kyamba.

⁷³ Hãma kova hai ñee meẽshu vekua ñanderu Abraham,

⁷⁴ ñandyrekyshi verã opaite ñandyvaishore, hareka jakyjembape jaha verã hai haykue,

⁷⁵ teko kavivape hareka hekope kavi hai pevarãĩ jaiko, jajapo mbaikavi opa ara ñandyrykovepe.

⁷⁶ Hãma nde, shyray nymbyheeapo Tũpa ĩñee mbeu'ia vatevevape'õ; shara rehopo Ñandeja hỹnonderã, haperã rĩñono kavishu verã.

⁷⁷ Hãma henta ĩrũre rymbykuaakapo mbai porãmba japo vekuare Tũpa hejareimashi hareka mondojepema.

⁷⁸ Tũpa jyparekokue rupii, veru ñande vate araivi kuarasy arape mykõĩ ouva rãĩmi.

⁷⁹ Sapehe verã opaite pỹntuape'iare, hareka ñymano ĩ'ãkuepy iare; hãma ñandyraha verã pee pyavapyva hupi.

⁸⁰ Hãma sanjay pukumã oho'i, ñymypỹrãtajyvỹĩ ijespiritupe; hãrã iko'i yvy ikoambaipi vãhẽpeve ara ijeshakashu verã Israelvare.