Juan 9 - NandevaBiblia

Jesús mynguera pente kuimbai oarãvãĩ heshamba kũvãipia

¹ Jesús hasa oho tentaipirã, hesha pente kuimbai oarãvãĩ heshamba kũvãĩpi vekua.

² Mboireare pyrãndushu Jesús: Pyrỹmboi'ia, marã'ĩrãra ko kuimbai oarãvãĩ heshãã kũvãĩpi? Tuure mbai porãmba japo jyrerãra, maĩrã, ha'i mbai porãmba japo'irãra?

³ Jesús heishu reta: Ha'ẽã hai hareka tuure mbai porãmba japo jyrerã; ko kuimbai kyrã oa Tũpa ñymbaikatukue heshakahe verã.

⁴ Kõĩ terirã ajapo ñõĩpo shymbou vekua potava; shara vãhẽpo pỹntu verãpe, hãrã mbaveamapo mba'apo.

⁵ Ãimeteri'ãĩ ko yvy'ĩãrẽrã, she hai sapeva kuaretare pevarã.

⁶ Jesús opa hei kovarã myndyvy yvype, japo tuju hỹndajype, haivi heshamba kũvãĩpia hesare ñonoshu.

⁷ Haipe heishu: Ekua jyvai yy noovã Siloepe (he'iseva: “Jokuehava”). Heshamba kũvãĩpia oho jyvai, hãrã oujyrã heshama kũvãĩpi.

⁸ Hãrã henta juri'õre, hareka heshãterijyrã hesha vekuare hei jyre ijupi: Ha'ẽãra ko kuimbai vapy jururetẽ ishu vekua kyrypoti haipi hasavare?

⁹ Hãma ĩme'ẽ heiva: Hai rãnga. Ĩrũre hei jyve: Ha'eã rãnga, ova vekuaĩ rãnga. Kuimbai heshamba'i kũvãĩpi vekua hei: Hai rãnga she.

¹⁰ Haipe pyrãndu jyreshu hoka kuimbai: Marãira ã'ẽ ryheshajy kũvãĩpi?

¹¹ Hai heishu reta: Kuimbai Jesús he'iashua rãnga japo tujurã ñono shyresare. Hãrã heishe: “Ekua jyvai yy noovã Siloepe”. Aha aivairã haipe ravĩĩ ahesha kũvãĩpi.

¹² Haivi pyrãndujyshu reta: Mapera ĩme'ẽ hoka kuimbai? Hãma heshamba'i kũvãĩpi vekua heishu reta: Aikuãã rãnga.

Fariseore ijeta hãndi heshamba kũvãĩpi vekua

¹³ Haivi raha reta heshamba kũvãĩpi vekua fariseore hỹnonde.

¹⁴ Putu'uava jy'arape Jesús japo hoka tuju, hãrã mynguera heshamba kũvãĩpia.

¹⁵ Hai rehe fariseore pyrãndujyshu hoka kuimbai heshamba kũvãĩpi vekua: Marãra ryheshajy? Hai heishu reta: Jesús ñono tuju shyresare, haivi aivairã; ã'ẽ aheshajy kũvãĩpi.

¹⁶ Haipe ĩme'ẽ fariseore heiva: Ko kuimbai kyrã japo vekua ouã Tũpaivi, shara mbyharuã putu'uava jy'ara. Tẽvã ĩrũre hei jyve: Marãrapo mbai porãmba japo'iarã, japo kova mbaikavi heshaha verã? Hairehe pente ñeepẽã ñynõĩrã opa jyvavy reta.

¹⁷ Hãrã pyrãndujyshu reta heshamba kũvãĩpi vekua: Hãmera nde mbaiva rere jyvehe kuimbai nymby heshakajy vekua? Hai hei: She haihe haiva Tũpa ĩñee mbeu'ia, Tũpa mbouva.

¹⁸ Tẽvã Judiore juhuvishare rojããjyre kuimbai heshamba kũvãĩpia hareka ã'ẽ kueramava. Hãrã hẽnoka reta myngueraha vekua tuu hareka ishy.

¹⁹ Hãrã pyrãndushu reta: Haira pindijapo kova kuimbai, pereheva oarãvãĩ heshamba kũvãĩpia? Marãĩra ã'ẽ heshajy?

²⁰ Ko kuimbai tuu hareka ishy hei reta: Kuaaha rãnga hai ĩrĩjaporã; hareka oarãvãĩ heshãã kũvãĩpi.

²¹ Tẽvã kuahãã marãra ã'ẽ heshajy hareka mbavara mynguera. Pypyrãndushupe, hai rãnga sanjayveama hareka katuma ijeta ijehe.

²² Ko kuimbai tuure kyrã hei kyjeshi Judio retarã, shara iñiñono mãĩmba reta pente ñeepe, mohẽ verã Judiore ñymbatyseaivi ĩme'ẽ heiva Jesús haiva Cristo.

²³ Hokava rehe kuimbai tuu hareka ishy hei: “Pypyrãndushupe, sanjayveama rãnga”.

²⁴ Haivi hẽnojy reta kuimbai heshamba kũvãĩpi vekuarã, heishu: Tũpa hỹnonde mbeu añeteva; ore kuaaha hoka kuimbai hai heko porãmbavarã.

²⁵ Tẽvã hai heishu reta: She aikuãã hoka kuimbai haira heko porãmba'ia. Pente mba'ẽĩ koñeĩ she aikuaa, she aheshãã kũvãĩpi tẽvã ã'ẽ aheshajyma.

²⁶ Hãma hykũãĩ pyrãndujyshu reta: Mbaivara japo ndyrehe? Marãra mynguera ndyresa?

²⁷ Kuimbai heshamba kũvãĩpi vekua heishu reta: Hetama rãnga ãmbeupeje, tẽvã shyrojããpi. Mbai verãra pipota hykuãĩ ãmbeujype? Potara ikojyve pyndyhevi hai mboire verã?

²⁸ Hãma Judiore juhuvisha hehei jyreshu hareka heishu reta: Nde rãngapokui hoka kuimbai mboire verã. Moisés mboire vekua rãnga ore.

²⁹ Ore kuaaha Moisés Tũpa ijetashurã; tẽvã hokavaivi, ouvaivĩmba kuaahava.

³⁰ Haipe ko kuimbai heishu reta: Marãpijy akorã! Pikuããmba maĩvira ou, tẽvã shymynguera.

³¹ Jaikuaa rãnga Tũpa henduãshu mbai porãmba japo'ia retarã; koñeĩ hendushu jyrojahea, hareka ĩñee japoshuva.

³² Mapeã rãnga henduha mbava mynguera pente kuimbai oarãvãĩ heshamba kũvãĩpiva.

³³ Ko kuimbai ouã Tũpaivirã, mba'ẽã rãngapo japo.

³⁴ Haipe haire heishu: Nde rearãvãĩ nytynyhẽ vekua mbai porãmba. Potara rei ỹrỹmboirẽĩ? Hãrã mohẽ reta Judiore ñymbatyseaivi.

Heshambare kũvãĩpia hykovepe

³⁵ Jesús kuaama kuimbai heshamba kũvãĩpi vekua mohẽã Judiore ñymbatyseaivirã; hesharã heishu: Rirojarahe kuareta Tay?

³⁶ Hai heishu: Sheja, mbeushe mbavara hai, airojahe verã.

³⁷ Jesús heishu: Ryheshama rãngarẽĩ. She hai, rijetarẽĩ hãndiva.

³⁸ Hãma kuimbai ĩñesu Jesús hỹnonderã heishu: Airoja ndyrehe, Sheja.

³⁹ Haivi Jesús heishu: She ai, ko yvy'ĩãrẽ kuaretare hesha ijehe verã mbai porãmba japo vekua; heshamba kũvãipiare heshajy verã, hareka hesha'iare heshaveama verã kũvãĩpi.

⁴⁰ Fariseore haipe'ẽ hãndivare hendu reta kovarã pyrãndushu Jesús: Orera ha'ẽĩ jyve kũvãĩpi heshambava?

⁴¹ Jesús mbyhovai: Pee hai jyve heshamba kũvãĩpiarã, mba'etytẽpyre verã mbai porãmba vekua. Tẽvã pere pyheshapiarã, oapo pẽãrẽ mbai porãmba pijapo vekua.