Juan 8 - NandevaBiblia

Pente taupe ynga mãĩ'ijyhea

¹ Haivi Jesús ohojy yvyturusu Olivope.

² Hãma paremajyrã kõ'ẽĩ oujy tũpaope. Heta kuaretare ou hai ẽvãpe, haipe vapyrã mboishu reta.

³ Haipe Moisés mbypara vekua pyrỹmboi'iheare hareka fariseore rahashu reta pente taupe, yngava kuimbai iko'ijy hãndirã heshahava. Veru ñono reta hetava mbytepe.

⁴ Hãrã heishu reta Jesús: Pyrỹmboi'ia, ko taupe rãnga heshaha ynga jyrekomava pokojyherã.

⁵ Moisés mbypara vekuape rãnga hei kyrãvã taupe, itape japiha verã manopeve. Ndera marã rere jyve?

⁶ Haire kyrã pyrãndushu hããshu verã retaĩ. Tẽvã Jesús jyroarã õñepyrõ yvyre mbypara.

⁷ Haivi hykũãiñote pyrãndujyshu retarã, ñãka mupũãrã hei: Ĩme'ẽ pynymbytepe mbai porãmba japombavarã, hai rãni tynonde tijapi itape.

⁸ Haivi jyroajyrã õñepyrõ mbyparajy yvype.

⁹ Henduma reta kovarã, pepenteĩ õñepyrõ ohojy, tynonde kuakuaitevevare opajy oho. Hãrã Jesús hã'ẽĩ ĩme hãndi haipe taupe.

¹⁰ Jesús ñãka mupũãrã pyrãndushu: Taupe, matyra opa oho? Mba'etymara pota ndukava?

¹¹ Taupe heishu: Sheja, mba'ety. Haipe Jesús heishu: She jyve aipotã rỹmano. Ekuajyvy ãtẽñoma japokui mbai porãmbava.

Jesús hai sapeva ko yvy'ĩãrẽ

¹² Jesús ijetajyshu kuareta retarã hei: She hai sapeva ko yvy'ĩãrẽ, ĩme'ẽ shimi'ĩrũvarã rekopo sapeva meẽvã tykove, hãrã ikoveamapo pyntuape.

¹³ Fariseore heishu: Nde rãnga ndeei rijetari ndijehe, hãrã mbaivapeã haikavi.

¹⁴ Jesús heishu reta: Sheeitẽ aijeta shijehevara, añetevaĩ hai. She rãnga aikuaa mãĩvira ai hareka matyra aha. Tẽvã pee pikuãã.

¹⁵ Pee pijeta porããñoĩhe papisha kuaretare pya mbijetava rãĩmi ko yvy'ĩãrẽ. Tẽvã she mbaveã aijeta porããhe.

¹⁶ Hãrã ajaporã, hekope kavi ajapo, shara sheiã ajapo. Ẽẽ jyve shendie Sheru shymbou vekua.

¹⁷ Ñee mbyparahava pyndykuatiape rãnga hei: “Ĩme'ẽ mokue mbai heshava penteva rãĩmi mbeu retarã, añeteva hai hokava ñee”.

¹⁸ Hãme rãnga she hai mbai heshava she pevarã, hareka Sheru shymbou vekua jyve ĩrũ mbai heshava she pevarã.

¹⁹ Hãrã pyrãndushu reta: Maperã ĩme'ẽ nderu? Jesús heishu reta: Pee shykuããpi, hãrã pikuãã Sheru. Shykuapirã pikuatẽ verã jyve Sheru.

²⁰ Kyrã Jesús ñimiñee tũpaope, Tũpape mẽ'ẽãva kyrypoti hyru hyvache. Tẽvã mbavẽã raha mbypereso, shara vãhẽãteri jy'ara.

Pee katuãpo peho, she aha verãpe

²¹ Jesús heijyshu reta: She rãnga ahapo, hãrã shyrekapopikui. Tẽvã pymanopokui mbai porãmba pijapo vekuapy; pee pehoãpo, she aha verãpe.

²² Hãrã Judiore heishu: Ha'eirapo ijukakui kova, hãmeãra hei ohovape katumba jaha verã?

²³ Jesús heishu reta: Pee rãnga hai ko yvy'ĩãrẽ'õ, tẽvã she hai vate arapy'õ. Pee hai kuareta yvy'ĩãrẽ'õre, tẽvã she ha'ẽã yvy'ĩãrẽ'õ.

²⁴ Hãme rãnga haipeje pymanopo mbai porãmba pijapo vekuapy. Shara pyrojãã She haiñoĩvarã, pymanopokui mbai porãmba pijapo vekuapy.

²⁵ Haipe pyrãndushu reta: Mbavara nde? Jesús heishu reta: Tynonde rãnga ambeupeje.

²⁶ Heta mba'e rãnga ĩme'are hai pyndyrehe verã, hareka ahesha pyndyrehe heta mba'e porãã piniñonorã, shymbou vekuany añetevaĩ hei, hãrã she ambeushu kuaretare, hai ĩñee ãhendushi vekua.

²⁷ Tẽvã haire kuããmba Jesús Tuu ijetaheshu retarã.

²⁸ Hãrã Jesús heishu reta: She, Kuareta tay rãĩmi ai vekua ko yvy'ĩãrẽ shiñonomapi kurusurerã, pikuaapokui “She haiñoĩvarã”, hareka she ajapoã maĩnunga shijuhuvi; kõñeĩ ambeu Sheru shymboihe vekua.

²⁹ Shara shymbou vekua ĩme'ẽ shendie; Sheru shyrejãã shẽĩ, shara ajapoñoĩshu hai potava.

³⁰ Hãrã Jesús kyrã ijetarã, heta'ẽ jyrojahea.

Tũpa tayre, hareka mbai porãmba japo'iare

³¹ Jesús heishu Judio jyrojaheare: Pijapo katu shiñeerã, ãñeteĩtepo haipekui amboi'areare.

³² Pikuapokui añeteĩteva. Hãrã añeteĩteva opapo pindijorashi mbai pyndyrekova ipope.

³³ Haire hei: Ore rãnga hai Abraham tayre, mapeã mbava ipope yryre. Marã'ĩrãra rere ore irijoraha verã?

³⁴ Jesús heishu reta: Ãñete hai pee, opaite mbai porãmba japo'iare, iko mbai porãmbava ipope.

³⁵ Pente jokuehareirea rãnga pytãã manopeve jokuerea hentape. Tẽvã oo ija tay pytañoĩpo haipe manopeve.

³⁶ Hãme rãnga, Tay pindijora mbai porãmba vekuaivirã, ãñeteĩtepo pindijorahakui.

³⁷ She rãnga aikuaa Abraham tay peerã; tẽvã pota shukapi, shara pateỹ mymyvãhẽ shiñee.

³⁸ She ambeupe opa mbai Sheru shymbyheshaka vekua; tẽvã pee pijapo jyve peru pyhendushi vekua.

³⁹ Haire heishu Jesús: Abraham hai yreru! Hãrã hai heishu reta: Ãñete Abraham tay retaperã, pijapotẽ verã jyve hai japova.

⁴⁰ Tẽvã pota shukapi, ambeupe ñee añeteva Tũpa shymboihe vekuarã. Tẽvã Abraham mapeãmba kyrã japo aryka'e.

⁴¹ Tẽvã peru japova rãĩmikati pijapo jyve. Haire heishu Jesús: Ore ha'ẽã ĩmerãẽã tay, penteĩ rãnga'ẽ yreru, hai Tũpa.

⁴² Jesús heishu reta: Tũpa ãñete hai Perurã, shyraihutẽpi verã; shara Tũpaivi ai, hãrã kope ãime'ãĩ. Aĩã shijuhuvii, Tũpa rãnga shymbou.

⁴³ Marã'ĩrãra pikuãã kova mbai ambeupeva? Shara potãã pyhendu shiñee.

⁴⁴ Ãña rãnga hai peru, hai ryheva retape hareka potaĩ pijapopishu hai potava; Ãña õñepyrõaivive rãnga hai puruka'ia. Hai japu, hareka he'iavãĩjy añeteva. Hai ijetarã mba'ety vekuaĩ mbeu, japu verãĩ kuaa, shara hai apu tuu, hãrã mbijapu jyve kuaretare.

⁴⁵ Hãrã añeteva she haiperã, katuã shyrojapi.

⁴⁶ Mbavara pynymbytepe heshakaposhe mbai porãmba ĩme'areva? Añeteva hai peerã, marã'ĩrãra shyrojããpi?

⁴⁷ Tũpa ryhevare hendu kavi Tũpa ĩñee; tẽvã shyrẽnduseãpi shara ha'ẽãpe Tũpa ryhevare.

Cristo ĩmemaĩ'ẽ hai Abraham ndeiteri'ẽrã

⁴⁸ Hãma Judiore heishu Jesús: Añeteva rãnga he'ia, he'ia nderã, nde hai Samariape'õ, hareka mbaiposhy ĩmeryre.

⁴⁹ Jesús mbyhovaishu reta: Mba'ety rãnga'are mbaiposhy. She ambyvete Sheru, tẽvã pee shymbyveteãpi.

⁵⁰ She aipotãã mbava shymbyvete; tẽvã ĩme'ẽ hekava hareka hai ẽ shendie.

⁵¹ She añeteva hai pee; shiñee japova, manoveãmapo.

⁵² Haipe Judiore heishu: Ã'ẽ kuaa kavima nde mbaiposhy ĩmeryrerã! Abraham, hareka Tũpa ĩñee mbeu'iare opama mano, hãmera rere ore: “Shiñee japova, manoveamapo”.

⁵³ Ndera mbaivasuveshi yreru Abraham? Arykai Tũpa ĩñee mbeu'iare hareka Abraham opama mano reta. Mbavara roja nde haiva?

⁵⁴ Jesús heishu reta: Mbaivarapo ambijehu sheii aijeta kavi'ai shijeherãme? Ijeta kavi shyreheva hai Sheru, pee pere jyvehe punu Tũpa.

⁵⁵ Tẽvã pee pikuããshu, tẽvã she aikuaashu; hãrã she hai aikuambashuarã, shapupo jyve pee rãĩmi. Tẽvã aikuaa kavishu, hareka ajapo hai ĩñee.

⁵⁶ Pynytynondeva Abraham, vy'a heshapo'ẽ shy'ararã. Hãma heshamarã hai vy'aite'i.

⁵⁷ Hãma Judiore heishu Jesús: Nde'iave 50 ãño ryre, hãmera rere'ore yreru Abraham ryheshava?

⁵⁸ Jesús heishu reta: Ãñete hai pee, she ĩmemaĩ aiko arykai ndeiteri Abraham ikorã.

⁵⁹ Hãrã haire ita heky japishu verã Jesús; tẽvã hetavare mbytepe ñemirã õhẽjy oho tũpaovi.