Juan 7 - NandevaBiblia

Jesús tyvyre jyrojããhe

¹ Kova mbai hasamarã, Jesús iko vata'i tenta Galileaipi, hãrã ñatẽỹ oho Judeape, shara Judiore heka ñynõĩ haipe pota juka retarã.

² Tẽvã, vãhẽserima Judiore jy'arete “Oo rãĩmire jy'arete” he'iashua,

³ hãrã Jesús tyvyre heishu: Avy pytakui kope; ekua tenta Judeape. Rymboiryreare hesha verã jyve nde rijapova.

⁴ Shara pota kuaaha katuva, japoãpo maĩnunga ñemiãpe. Hãrã rijapova, japo opavare hỹnonde.

⁵ Hokava hei reta shara tyvyre jyrojããhe.

⁶ Hãma Jesús heishu reta: Ndeiteri vãhẽ shy'ara, tẽvã pee pevarã ĩmerãẽã ara haikavipe.

⁷ Kuaretare ko yvy ĩãrẽ ẽvare katũã pyndyreshatãã; tẽvã she shymymorãã reta, shara she ambeushu reta mbai porãmba japo vekuare.

⁸ Pekuape ñymby'areteha'õpe; ahããteriposhe, shara ndei vãhẽ shy'ara.

⁹ Opama kova heishu retarã, pyta Galileape.

Jesús oho oo rãĩmi jy'aretepe

¹⁰ Tẽvã ñymoña hãndiare opama ohorã, Jesús oho jyve ñymby'areteha'õpe; ñemiapẽĩ ohova rãĩmi.

¹¹ Haipe Judiore heka jyrerã hei: Mãĩpiante ĩme'ẽ hokava kuimbai?

¹² Hãma kuaretare mbytepe heta'ẽ ijetahevare. Ĩme'ẽ heiva: “Kuimbai heko kaviva rãnga”, tẽvã yngavare hei: “Kuaretare mbytavy'ia rãnga hai hokava”.

¹³ Tẽvã mba'etymba ijetaiteheva, shara kyjeshi reta Judiore juhuvisha.

¹⁴ Hãrã arete mbytema ohorã Jesús tũpaope icherã, õñepyrõ pyrỹmboi.

¹⁵ Haipe Judiore mbyrymaĩ retarã hei: Marãira hetaite mbai kuaa, ñymboimba vekua?

¹⁶ Jesús heishu reta: Kova ñee apyrỹmboihea ha'ẽã sha'ãpova. Tũpa ña'ãpova rãnga, shymbou vekua.

¹⁷ Tũpa ĩñee pota japova, kuaañoĩpokui she apyrỹmboiheva, haira Tũpa potava rãĩmi, maĩrã shijuhuviira aijeta.

¹⁸ Hareka ijuhuvii pyrỹmboiva, japo pota kuaretare mbyveteshurã; tẽvã Tũpa mbouva õñehãã kyrã japo õmombaivasushu verã, hokava añeteva hei hareka mba'etyre mbai hekopemba'õ.

¹⁹ Me'ẽãrape Moisés ñee mbyparahava? Tẽvã mba'ety japova. Mbaiva rehera pota shukapi?

²⁰ Kuaretare heishu: Mbaiposhy rãnga nymbykuakuã'i! Mbavara pota nduka'i?

²¹ Jesús heishu reta: Putu'uava jy'arape, mbaikavi heshaha verã ajapo vekua reheĩ rãnga, opa mbyrymaĩ reta.

²² Hãme rãnga Moisés hejambape pyndyray pire chĩchĩãshi verã haimbate Moisés mbyparava, pynytynondeva reta rãnga, hãrã putu'uava jy'arapeave japo reta.

²³ Tẽvã, hekope kavi pijapo verã Moisés mbypara vekua, sanjay kuimbaimire putu'uava jy'arapeave pire pichĩchĩshi, marã'ĩrãra pyposhypishe amynguera putu'uava jy'arape pente ñymbairasyvarãme?

²⁴ Hãrã pijetapohe mbavarã hekope kavi pijapo, avy pimoã vekuaĩ pymbeu. Pikuaa kavi rãnipo ãñetera kyrã.

Jesús mbeu mãĩvira ou

²⁵ Haipe Jerusalenvare, pyrãndu jyre: Ha'ẽãra ko kuimbai, heka jyreare juka verã?

²⁶ Pymãĩhe kuty ijetañynoĩ hãndi reta, mba'ety rãnga mbai heishua. Ĩmera'ẽ ñanduruvishare rojava ko kuimbai ãñeteĩte haiva Cristo?

²⁷ Ñande rãnga jaikuaa mãĩvira ou ko kuimbai; tẽvã Cristo oumarã, mba'etypokui kuaava mãĩvira ou.

²⁸ Hokava hendurã, Jesús tũpaope pyrỹmboi'ẽrã hỹnatu hei: Ãñetera pikuaa mbavara she hareka mãĩvira'ai? Tẽvã She shijuhuvireiã'ai; añeteva rãnga shymbou, pikuaambava.

²⁹ Tẽvã She aikuaashu shara hai ẽvãivi ai, hareka hai shymbou.

³⁰ Haivi pota pysykajyre; tẽvã mba'ety pysyva shara ndeiteri vãhẽ jy'ara.

³¹ Heta kuaretare jyrojaherã, hei jyre: Cristo oumarã, mbaikavi heshaha verã hetaverapo japokui ko kuimbai japovaivi?

Fariseore mondo syndaro pysy verã Jesús

³² Fariseore hendu kuaretare heiheva Jesús; hãrã haire hareka pai ruvishare hãndi, mondo reta tũpaope'õ syndarore pysy verãre Jesús.

³³ Haipe Jesús hei: Mbovy araĩmapo ãĩme'ãĩ pynymbytepe, haivi ahajypokui Tũpa shymbou vekua'õpe.

³⁴ Hãrã shyrekapopikui, tẽvã shyreshapopikui, shara katũãpo peho, she aha verãpe.

³⁵ Hãma Judiore pyrãndu jyre ijupe: Matyrapo ohojy ko kuimbai, katumba ñavãĩshu verãpe? Ohorapo Judiore opa ñymõmohẽva hendaipi, mboishu verã griego reta?

³⁶ Mbaivara he'ise ko hei ñandeva: “Pee shyrekapopikui, tẽvã shyreshapopikui; shara katũãpo peho she aha verãpe”?

Yy syryva tykove meẽva

³⁷ Arete vasu ara koñymava mbyharuaveva, Jesús ñymbou hỹnatu ijetarã hei: Ĩme'ẽ ju'uhevarã tou shyrẽndape, hou verã yy.

³⁸ Jyroja shyreheva, Mbyparahava heiva rãĩmi, pyaivivepo syry'ẽkui yy meẽva tykove.

³⁹ Hokava Jesús heirã, he'ise jyrojaheare mẽ'ẽãshu verã Espiritu; tẽvã hoka arape Espiritu Santo nde'iaveteri ou, shara Jesús nde'iave teri ohojy vate arape.

Jesús rehe pente ñeepeã ñynõĩ kuaretare

⁴⁰ Ĩme'ẽ kuaretare mbytepe hendu hokava ñeerã heiva: Haiñõĩ ãmo Tũpa ĩñee mbeu'ia ñahãrõ ñaĩva.

⁴¹ Ĩrũre hei: Kova hai Cristo. Yngavare heijy: Marãrapo Cristo Galileaivi ou?

⁴² Mbyparahavape rãnga hei: Hokava Cristo haipokui huvishavasu David ñymoñashi vekua hareka Belenpe'õ, David henta, haivipo ou Cristo.

⁴³ Hãrã kyrã kuaretare ijeta jyrehe Jesús pente ñeepembaa ñynoĩvape.

⁴⁴ Ĩme'ẽ pota pysykava; tẽvã mbavẽã japohe maĩnunga.

Huvishare rojãã reta Jesús

⁴⁵ Hãma syndarore tũpaope'õre oujy fariseo hareka pai ruvishare ẽvãperã, haire pyrãndushu: Marã'ĩrãra peruambaje?

⁴⁶ Haipe syndarore hei: Mba'ety ko kuimbai rãĩmi ijetava!

⁴⁷ Haivi fariseore heishu: Peeavera piñymbytavyka jyve?

⁴⁸ Ĩmera'ẽ huvishare, maĩrã, fariseore jyrojaheare?

⁴⁹ Tẽvã kova kuaretare Moisés mbypara vekua kuambava retaĩ rãnga jyrojahe, hãrã Tũpa jahepohekui.

⁵⁰ Nicodemo hai jyve fariseore penteva, Jesús ẽvãpe pente pyharepe ohorã hei:

⁵¹ Ñee mbyparahava ñandy kuatiape'õ rãnga hei: “Katuã jahehahe pente kuimbai hẽnduhã terishurã hareka kuaahãteri japovarã”.

⁵² Haipe heishu reta Nicodemo: Galileape'õra jyve nde? Mãĩ kavipy kuatia Mbyparahava. Hãrã rikuaapo penteã Tũpa ĩñee mbeu'ia ou Galileaivi.

⁵³ Haivi pepenteĩ ohojy hentaipi.