Juan 6 - NandevaBiblia

Jesús myngaru 5.000 kuareta

¹ Haivi Jesús oho Galileape'õ yyvasu hyvaisho kyty, mbyheeavajy Tiberias.

² Heta kuareta oho haykue, shara hesha reta mbaikavi heshaha verã japova mynguera'i ñymbairasy vekua retarã.

³ Haivi Jesús jupi yvyturusure, haipe vapy mboireare hãndi.

⁴ Vãhẽserima Pascua verãpe, Judiore jy'arete.

⁵ Jesús hesha heta ohohipiva kuaretare, hãrã pyrãndushu Felipe: Maivirapo javashu kuaretare hou verã?

⁶ Jesús kyrã hei kuaa verã marãrapo hei Felipe, shara Jesús kuaa kavi mbaivarapo japokui.

⁷ Felipe heishu Jesús: 200 ara hepykuemba jave'ẽ ñande verã rãnga pãhã pysesẽmi hou verãre.

⁸ Hãrã Andres, Simón Pedro tyvy, mboirea jyve heishu Jesús:

⁹ Kope'ẽ pente sanjaymi ĩmerea pandepo pãhã trigo kui japohashia hareka mõkue pira; tẽvã jave'ãĩpojy ñandekui opa ñamemeẽshu verã.

¹⁰ Haipe Jesús hei: Pereshu kuaretare tyvapy. Kapi'ata kavi'ẽ haipe, hãrã opa vapy reta 5.000 rupi'ẽ haipe kuimbaire.

¹¹ Jesús pãhã hekyrã ñymboi'ĩãrẽ, meẽshu mboirea retarã mẽmeẽshu kuaretare vapy'ovare. Kyrãi japojy pira, mẽmeẽshu haire pota houva rãĩmi.

¹² Opama hỹvãta retarã Jesús heishu mboireare: Pymbatyjy hẽmby vekua, mãhẽ opareii jyvare ijehekui.

¹³ Haire mbatyjyrã 12 kanata kavi mỹnyhẽjy pãhã hareka pira hẽmby vekua.

¹⁴ Kuaretare heshama Jesús mbaikavi heshaha verã japorã, hei reta: Ãñeteñoĩ rãnga kova hai Tũpa ĩñee mbeu'ia ou verã ko yvy'ĩãrẽ.

¹⁵ Tẽvã Jesús kuaa haire pota mbaretepe huvisha vasurã raha ñono jyrerã, hãrã ha'i oho jupijy yvyturusure.

Jesús vata yy ĩãrẽ

¹⁶ Pỹntuma'ia Jesús mboireare hasa jyraha yyvasuhupi,

¹⁷ haivi jupi reta pente kanoaperã, õñepyrõ hasa jyraha yy hyvaisho kyty, vãhẽ verãre Capernaumpe. Pỹntuma vẽkua, Jesús oujyvyãteri haire ẽvãpe.

¹⁸ Haipe mundii yvytukue ñakua ourã, yykue mupũãveru.

¹⁹ Mboireare jyrahama 5 kilometroipirã, hesha reta Jesús vata ou yy ĩãrẽ kanoa jykotyrã, opa kyje reta.

²⁰ Tẽvã Jesús heishu reta: Avy pykyje, she rãnga!

²¹ Haipe mboireare potatẽ jupishu reta kanoape, tẽvã vãhẽ jepe jyrahashi hyvaisho kyty, haire ohovape.

Kuaretare hekajyre Jesús

²² Pareejyrã, kuaretare yyvasu hyvaisho kyty ĩmeĩ'iare, kuaajy reta Jesús mboireare ohojyvyã hãndi retarã hareka kanoa koñeĩ'õ jyrahajypyrã.

²³ Tẽvã ĩme'ẽjy yngava kanoare vãhẽ ouva tenta Tiberiaivi, pãhã hou jyre vekuape hyvache hareka Ñandeja ñymboi ĩãrẽrã.

²⁴ Hãrã kuaretare heshama Jesús hareka mboireare mba'ety haiperã, jupi reta hokava kanoape jyraha heka verã Capernaumpe.

Jesús hai pãhã tykove meẽva

²⁵ Vãhẽma jyraha yyvasu hyvaishoperã hesha reta Jesús, hãrã pyrãndushu reta: Pyrỹmboi'ia, mbaipera rỹvãhẽrei kope?

²⁶ Jesús heishu reta: Añeteĩteva hai pee, shyrekapi shara opa pynyvãta apyrỹmyngarurã, ha'ẽã pikuama mbaivara he'ise hoka mbaikavi heshaha verã ajapo vekuarã.

²⁷ Avy ho'uava opa verãreheĩ pymba'apo, pymba'apojyvehe ho'uava opamba verãre, hareka meẽvã tykove opambava. Hokava hai ho'uava kuareta Tay meẽpe verã, shara Tũpa Teru, kyrã ñonoshu.

²⁸ Haipe kuaretare heishu Jesús: Mbaivarapo japoha, Tũpa potava japoha verã?

²⁹ Jesús heishu reta: Kova hai Tũpa potava, pirojahe hai mbou vekua.

³⁰ Hãrã pỹrandushu reta: Mbaivara ryheshakapo'ore mbaikavi heshaha verã, heshaharã rojaha verã? Mbaivarapo rijapo?

³¹ Yrỹtynondevare houmba jyre arykai mana yvy ikoambaipi. Mbyparahava heiva rãĩmi: “Tũpa meẽshu reta pãhã vate araivi ouva hou verãre”.

³² Jesús heishu reta: Ãñeteĩte haijype, ha'ẽã rãnga Moisés meẽpeva pãhã vate araivi ouva. Sheruteiva rãnga meẽpe pãhã añeteva vate arapy'õ!

³³ Pãhã tykove meẽva rãnga hai Tũpa mbouva vate araivi kuaretare pevarã.

³⁴ Hãrã heijyshu reta: Yreja, meẽñoĩve ore hokava pãhã.

³⁵ Jesús heishu reta: She hai pãhã meẽva tykove. Hãma shyrẽndape ouva ñymbahyveamapokui; hareka jyroja shyreheva haiveama ju'uhe verã.

³⁶ Tẽvã she haipeva rãĩmi, pirojãã shyrehe ajemaĩ shyreshatẽpiiva.

³⁷ Opaite Sheru pyhỹrõ vekuare, oupokui she ãĩvape; hãrã ãĩvape ouva, ãmohẽãposhu reta.

³⁸ She ai vate araivi ajapo verã shymbou vekua potava, ha'ẽã she aipotavãĩ ajapo verã.

³⁹ Hareka kova hai Sheru shymbou vekua potava; ãmykañymba verã hai meẽsheva, koñeĩ amynguerajy verã ara japyape.

⁴⁰ Sheru potava rãngajy kova; opaite mãĩ jykotyva Tay, hareka jyrojahea hipity verã tykove opambava; hareka amynguerajyposhukui ara japyape.

⁴¹ Kova mbai rehe Judiore õñepyrõ ijeta porããhe Jesús. Shara hei: “She hai pãhã vate araivi ou vekua”.

⁴² Hãrã hei reta: Kova kuimbai ha'ẽãra Jesús, José tay? Ñande rãnga jaikuaa tuu hareka ishy! Marã'ĩrãra hei vate araivi ouva?

⁴³ Haipe Jesús heishu reta: Ãteño pijetareii.

⁴⁴ Mba'ety rãnga ou verã shyrẽndape Sheru veruãshurã; hareka she amynguerajypokui ara japyape.

⁴⁵ Tũpa ĩñee mbeu'iare tynondeva mbypara vekuape kyrãmãĩ hei: “Tũpa opaitepo mboishu reta”. Hãrã opavare henduva hareka kuaa kavishia Sheru ĩñee, haipo shyryhevare.

⁴⁶ Mba'ety heshava Tũpa; Tũpaivi ouvañõĩte koñeĩ hesha.

⁴⁷ Ãñete hai pee, jyroja shyreheva ĩmemare tykove opamba verã.

⁴⁸ She hai pãhã, meẽvã tykove.

⁴⁹ Pynytynondevare houmbajyre mana yvy ikoambaipi, tẽvã opa mano reta.

⁵⁰ Kova hai pãhã ouva vate araivi, hãrã hokava houvare manovẽãmapo.

⁵¹ She rãnga hai pãhã meẽvã tykove ouva vate araivi; hãma houva ko pãhã manoveamapo. Ko pãhã ameẽ verã hai shyroo, ameẽpokui opaite kuaretare rehe ẽvã ko yvy'ĩãrẽ manomba verã.

⁵² Haipe Judiore ha'ire ijeta pohyjyre ijupiirã hei: “Marãrapo ko kuimbai ha'i hoo ho'uka ñande?”

⁵³ Jesús heishu reta: Ãñete hai pee, pe'ũã kuareta Tay hoo hareka pumbusururuã huvyrã, katuãpo ĩmepyre tykove.

⁵⁴ Hãrã shyroo houva hareka mbusururuva shuruvy, ĩmemare tykove opamba verã; hãrã she amynguerajypokui ara japyape.

⁵⁵ Shyroo hai ho'uava añeteva, hãrã shuruvy hai mbusururua verã añeteva.

⁵⁶ Shyroo houva, hareka mbusururuva shuruvy ẽẽ shendie, hãrã she ãĩjyve hãndi.

⁵⁷ Sheru shymbou vekua ĩmere tykove, hai rupii she aiko; kyrãĩ jyve shyroo houva hykovepo jyve she rupii.

⁵⁸ Aijeta'aĩhe ko pãhã ou vekua vate araivi. Kova pãhã ha'ẽã mana pynytynondevare hou jyre vekua rãĩmiva, haivi opa mano reta, tẽvã kova pãhã houva ĩmepore tykove opambava.

⁵⁹ Jesús pyrỹmboihe kova mbai Judiore ñymbatyseape Capernaumpe.

Ñee tykove opambava meẽva

⁶⁰ Hãrã Jesús mboireare hendu pyrỹmboihe kovarã hei reta: Kova ñee hai heiva rãnga javai jaikuaa verã. Mbavarapo kuaa nde kova?

⁶¹ Jesús kuaa mboireare ijeta jyrehe ñee hei vekuarã, pyrãndushu reta: Ajetẽãra'ẽpe kova?

⁶² Mbaivangamba ikotẽpo, pyhesha ko kuareta Tay jupijyma arykai iko'i vekuaperãme?

⁶³ Espiritu rãnga hai meẽva tykove; tyro'o mba'ẽã hai. She aijetahepeva hai añeteva Espiritu ryheva meẽva tykove.

⁶⁴ Tẽvã, ĩmeteri'ẽ pynymbytepe rojambava. Shara Jesús opamãĩ kuaa mbava retara rojãã, hareka mbavara pysykapo.

⁶⁵ Hãrã hei: Hãme rãnga hai pee, katũã kuaretare ou ãĩvape, Sheru veruãshurã.

⁶⁶ Haivive heta Jesús mboireare poi jyrahahipi hareka hã'ẽĩ heja reta.

⁶⁷ Haipe Jesús pyrãndushu 12 mboireare: Peera patẽyma shimi'ĩrũpi jyve?

⁶⁸ Hãrã Simón Pedro heishu Jesús: Yreja, akuarã mbavarapo ohoajy hipi? Niñee rãnga hai meẽva tykove opambava.

⁶⁹ Ore rãnga jyrojaha ndyrehe, hareka kuaaha nde haiva Cristo, Tũpa Tay.

⁷⁰ Jesús heishu: Sheeãra apyrỹpyhỹrõ 12 pẽĩva? Kyrãtẽva pynymbytepe'ẽ pente Añarã'ia.

⁷¹ Kyrã heirã, Jesús ijetahe Judas, Simón Iscariote tay. Shara Judas hai Jesús pysyka verã, haitẽ jyve penteva 12 mboireare.