Juan 5 - NandevaBiblia

Jesús mynguera pente kuimbai vatamba vekua

¹ Kova mbai ikovaivi mbovy aramajyrã Jesús oho Jerusalenpe, Judiore jy'arete ñynoĩvape.

² Haipe Jerusalenpe avishare hõche he'iashua hyvache, ĩme'ẽ pente yy mbyhyruhapya hebreo ĩñeepe he'iashua Betesda, ĩmereva pandepo hõche.

³ Haipe heta'ẽ ñeno ohova ñymbairasy vekuare; heshamba kũvaĩpiare, japava hareka vatamba vekuare, hãrõtẽ'õre yy õmyĩrã verã.

⁴ Haipe sapypy'ãĩ vejy pente Tũpa jokueva my'õmy verã yy, hãrã yy my'õmyãrã tynonde vejypya, kuerahe mbairasykue.

⁵ Hãma haire mbytepe ĩme'ẽ pente kuimbai 38 ãñoma ñymbairasyva.

⁶ Jesús hesha ñenotẽ'i yvyperã, hareka kuaa kuriã kyrã'irã, pyrãndushu: Ripotara rykuera?

⁷ Hãrã kuimbai ñymbairasy'ia heishu: Sheja, mba'ety rãnga mbava shymbyvejypy verã yy õmyĩmãrã; potatẽ avejypyva, yngava ñymytynondejy shyhevi.

⁸ Jesús heishu: Pũ'ã, hupi ndurupa, ekuajyvy!

⁹ Haipevãĩ hoka kuimbai kuera, hupi huparã vatajy. Hokava iko putu'uava jy'ara ẽrã,

¹⁰ hãrã Judiore juhuvisha heishu hoka kuimbai kuerava: Putu'uava jy'ara rãnga'ẽ, ẽãnde ryraha verã ndurupa.

¹¹ Tẽvã hai heishu reta: Shymynguerava rãnga heisheje: “Hupi ndurupa, ekuajyvy”.

¹² Haipe haire pyrãndushu: Mbavara heindeje: “Hupi ndurupa, ekuajyvy?”

¹³ Tẽvã kuimbai kuãã mbavara mynguera, shara kuareta hetava haipe'õ mbyteivi Jesús õhẽjy oho.

¹⁴ Haivi Jesús heshajy kuimbai tũpaoperã heishu: Ã'ẽ rykuerama. Mãĩkavi, ãteñoma japokui mbai porãmbava, mãhẽ jehundekui mbai porãmba'eiteveva.

¹⁵ Ko kuimbai oho Judiore juhuvisha ẽvãpe, haipe mbeushu reta Jesús mynguerava.

¹⁶ Hãrã Judiore moña jyre Jesús, shara putu'uava jy'arape hokava mbai japo.

¹⁷ Tẽvã Jesús heishu reta: Sheru rãnga mba'apoñõĩ hai ã'ẽpeve, hãrã she amba'apoñoĩ jyve.

¹⁸ Kova rehe Judiore potaiteve jukajyre Jesús, shara japo pente mbai japohamba verã putu'uava jy'arape harekajy ñimbivache'i hãndi Tũpa, hei Tũpa haiva Tuu.

Tũpa Tay ñymbaikatukue

¹⁹ Haivi Jesús heishu reta: Añetevape hai pee, Tũpa Tay katuãã japo maĩnunga ijuhuvireii; Tuu hesha japovãĩ japo jyve. Opa maĩnunga Tuu japova, Tay japo jyve.

²⁰ Shara Teru haihu Tay, hãrã opa mbai heshakashu hai japova rupii; hãmã heshakave teriposhu maĩnunga tivishaveva, kyrã mbyrypymãĩ verã.

²¹ Tuu mũpũãjyva rãĩmi mano vekuare hareka meẽjyshu tykove, kyrãĩ jyve Tay meẽ jyveshu tykove hai pota meẽshuare.

²² Hãrã Tuu jahẽãhe kuaretare, koñeĩ meẽshu Tay mbaikatu jahe pyryrehe verã,

²³ opaiteva kuaretare õmombai verãre Tay, Tuu õmombaiva rãĩmi. Tay õmombaimbava, õmomba'eã jyveshu Tuu hai mbou vekua.

²⁴ Ãñeteĩte hai pee, she haiva henduva hareka jyrojahea shymbou vekua, ĩmemare tykove opambava. Jahehããpohe shara hasama ñymanoivi tykove opamba kyty.

²⁵ Ãñeteĩte hai pee, ouma ara hareka ã'ẽvãĩpo, manovare hẽndukui Tũpa Tay ĩñee hareka hẽndushua kuerajypokui.

²⁶ Shara Tuu ĩmere ijehe tykove, kyrãĩ jyve Tay, meẽshu tykove hai reko ijehe verã.

²⁷ Hãrã Tũpa meẽshu mbaikatu jahe pyryrehe verã, shara hai kuareta Tay.

²⁸ Avy pykyje kyrã haiperã. Vãhẽpokui ara mano vekuare, hendu verã jyve shiñee,

²⁹ hareka puãjypo ñotỹã vekuaivi. Hãrã heko kavivare kuerajypokui reko verã tykove, tẽvã mbai porãmba japo'i vekuare kuerajypokui jaheahe verã.

Jesús japo vekua heshaka hai ĩmereva mbaikatu

³⁰ She, shijuhuvii katuãã mbai ajapo. She ajahe pyryrehe Tũpa heisheva rãĩmi, hareka hekope kavipo ajahe pyndyrehe, shara ajapoã she aipotava; koñeĩ Sheru shymbou vekua potavãĩ ajapo.

³¹ Sheii aijeta kavi ai shijeherã, kova shiñee hai vekua mba'ẽãpo,

³² ĩme'ẽ yngava ijeta shyreheva, hareka aikuaa añeteva hai hei shyreheva.

³³ Juan Bautista pypyrãndukashurã vẽkua, hai añeteva mbeupe.

³⁴ Tẽvã aikoteveã kuaretare ijeta kavi shyrehe; hareka ãmbe'uipe, peojepe verã jyve.

³⁵ Juan rãnga hai mbai myhendyava hareka sapeva, potatẽ sapy'aite pyvyapipy hai mykõĩvãpe.

³⁶ Tẽvã Juan hei vekuaivi ĩme'are mbava ijeta kavive shyreheva. Hãma maĩnunga ajapova, hai Sheru japokasheva, hokava heshaka kavi ãñete Sheru shymbouva.

³⁷ Sheru shymbou vekua ijeta kavi shyrehe, ajemaĩ pyhenduãã hai ijetarã pyheshããvãĩjy marãvara Hai.

³⁸ Hai ĩñee icheã pyndypyape; shara pyrojãã hai mbou vekua.

³⁹ Pee rãnga piñymbo'eka kavihe Tũpa ĩñee kuatiape'õ, shara pimoãtẽ pyheshapy tykove opambavarã, ajemaĩ Ñee mbyparahava ijetatẽ shyreheva,

⁴⁰ tẽvã patẽy pei ãĩvape pyreko verã hokava tykove.

⁴¹ She ahekãã kuaretare ijeta kavi shyrehe verã.

⁴² Tẽvã she apyrykuaa kavi, hareka aikua Tũpape pyhaihuã.

⁴³ She rãnga ai Sheru heepe, tẽvã shymyvãhẽãpi; hãrã ĩme'ẽ ijuhuvii ouvarã, ĩmerã pymyvãhẽposhu haikui.

⁴⁴ Marãrapo piroja shyrehe, pota kuareta retaĩ ijeta kavi pyndyreheva, hareka pirojããhe Tũpa penteĩ'õ?

⁴⁵ Avy pimõã porãã aijeta pyndyrehekui Sheru hỹnonde. Porãmba ijeta pyndyrehe verã rãnga hai Moisés, pirojapihe vekua.

⁴⁶ Hãma Moisés pirojaherã, pirojatẽ jyve shyrehe verã, shara hai shyrehe mbypara kuatia.

⁴⁷ Tẽvã pyrojãã Moisés mbypara vekuarã, hãmera marãpo pyrojajy shiñee?