Juan 4 - NandevaBiblia

Jesús hareka taupe Samariape'õ

¹ Fariseore kuaa Jesús mbyhetave hai mboireare hareka hetave pyrỹmyngarai Juan Bautistaivi.

² Ajemaĩ Jesús haimbate pyrỹmyngaraiva, mboirearetaĩ japo.

³ Jesús kuaama hokavarã, õhẽ Judeaivi, ohojy Galileape.

⁴ Hãma ohojyrã hasañõĩpo Samariaipi.

⁵ Ohomarã vãhẽ oho tenta Sicar he'iashuape Samariape, Jacob tay José hejashu vekua yvy hyvache.

⁶ Haipe'ẽ poso Jacob ña'ãpo vekua; Jesús kangyrã, poso hyvache vapy, ndose serima'ivape.

⁷ Haipe vãhẽ ou pente taupe Samariape'õ nohẽ verã yy posoivi, Jesús heishu: Tauve mishĩĩ ndy'yy.

⁸ Jesús mboireare jyraha tentape hou verã ova verãre.

⁹ Haipe taupe Samariape'õ heishu Jesús: Marã'ĩrãra nde Judiova rirureshe yy, she Samariape'ãĩvã? (Shara Samariape'õre ijetããmba hãndi Judiore)

¹⁰ Haipe Jesús heishu: Rikuaa Tũpa meẽvarã, hareka mbavara jurure'i nde yy, nde riruretẽshu verã hareka hai meẽtẽ nde verã yy meẽva tykove.

¹¹ Taupe heishu: Sheja, mba'ety rãngaryre rynohẽpy verã yy, hareka kypevãĩ'ẽjy poso, maĩvirapo rỹnohẽkui hokava yy meẽva tykove?

¹² Yreru Jacob rãnga heja'ore ko poso, haiteiva hou hãndi tayre hareka hũmbare. Ndera mbai vasuveshi hai?

¹³ Jesús heishu: Opaite houva kova yy, hykuãĩpo ju'uhejykui;

¹⁴ tẽvã yy ameẽva houva, ju'uhe veamapokui. Shara ko yy she ameẽ verã, yy õhẽ'õ rãĩmipo'ẽkui pyape, meẽshu verã tykove opambava.

¹⁵ Haipe taupe heishu: Sheja, meẽveshe hokava yy shu'uheveama verãve, mãhẽ hykuãĩ ai ãnohẽ ãĩjykui ko posoivi.

¹⁶ Jesús heishu: Ekua mbeushu neme, hareka eii hãndikui kope.

¹⁷ Taupe hei: Shemẽã rãnga aishe. Haipe Jesús heishu: Haikavi rãnga rere mba'ety ryreva neme;

¹⁸ shara pandepomaryre nemekue, hãrã ã'ẽ ryrekoryrea ha'ẽ'ãĩjy nemeĩte; añeteva rãnga rere.

¹⁹ Hokava taupe hendurã heishu: Sheja, hainymbashe nde haiva Tũpa ĩñee mbeu'ia.

²⁰ Yrỹtynondeva Samaritanokue reta rãnga õmombaivasu Tũpa ko yvyturusure, tẽvã pee Judiore pere Jerusalenpe õmomba'eashu verã.

²¹ Jesús heishu: Nde taupe, shyroja, vãhẽserima ara mbaveama ou verã ko yvyturusure õmombaivasu verã Tũpa, hareka oho verã Jerusalenpe.

²² Pee samaritano reta rãnga pemombai pikuambavape; tẽvã ore Judiova õmomba'eashu kuaahava; shara Judio retaivi ou pyrỹmondojepeva.

²³ Tẽvã vãhẽma ara, ã'ẽvãĩpo ãñẽtẽite õmombai'iare Tũpa, õmombaishu verã Espiritupy hareka añetevape. Shara Tũpa kyrã pota õmomba'eashu.

²⁴ Tũpa hai Espiritu, hãrã õmombai'ishuare õmombaipo jyveshu Espiritupy hareka añetevape.

²⁵ Haivi taupe heishu Jesús: She aikuaa jyve ou verã Mesia, Cristo he'iashua; hai oumarã opa mbaipo mbeu kavi orekui.

²⁶ Jesús heishu: Hai rãnga she Mesias, rijetarẽĩ hãndiva.

²⁷ Haipe vãhẽjy ou mboirea retarã mbyrymaĩhe hesha taupe ijeta'i hãndirã. Tẽvã mbavẽã pyrãndushu mbaivara pota, maĩrã, mbaivarera ijeta'i hãndi.

²⁸ Haivi taupe heja ñykambushirã, oho tentape heishu kuaretare:

²⁹ Pei pymãĩhe pente kuimbai opaite kuaava ajapo vekuare. Ha'ẽãra kova Cristo?

³⁰ Hãrã kuaretare õhẽ tentaivirã, oho maĩhe reta Jesús.

³¹ Haipe mboireare hei jyvyĩshu reta: Pyrỹmboi'ia, karumitẽvẽ mĩshĩ.

³² Tẽvã Jesús heishu reta: Ĩme rãnga'are maĩnunga hau verã, pee pikuambava.

³³ Haivi mboireare õñepyrõ pyrãndujyre ijupe: Veruharambashuje hou verã?

³⁴ Jesús heishu reta: Shĩmbiu hai ajaposhu shymbou vekua potava, hareka opa ajaposhu verã hai heiva.

³⁵ Pee rãnga pere: “Urũndy jasyteri hemby'ẽ myno'õhã verã ñotỹava'ia”, tẽvã she hai pee, pymãĩhe ñotyãvare opama javyje, myno'õhã verãima'ẽ.

³⁶ Hãrã ñotyãvã'ia mynovã mẽ'ẽhãshu japova hepykue. Ko ñotyãva'ia myno'õhãvã rãnga hai tykove opambava pevarã, kyrã vyapãvẽĩ verã ñimĩtyva hareka ñotỹava'ia mynovã.

³⁷ Ãñete rãnga ko ñee heiva: “Pente'ẽ ma'ẽtyvarã, ĩrũre mynõjy”.

³⁸ She apyrỹmondo pymynõõ verã peemba piñotyva; yngava reta rãnga heta mba'apohe, hãrã haire ñotỹ vẽkua pymynõ'õĩmapo.

³⁹ Heta kuaretare Samariape'õ jyrojahe Jesús taupe heiva rupii: “Opaiteva rãnga mbeusheje ajapo vekuare”.

⁴⁰ Hãrã Samaritanore vãhẽ jyraha Jesús ẽvãperã jurureshu reta pyta verã haipe; hãrã pyta haipe mokue ara,

⁴¹ hãma hetave'ẽ jyrojaheare shara hairetateima hendu Jesús ĩñee.

⁴² Hãrã heishu reta taupe: Ã'ẽ haiveama nde rerevãĩ rojahava. Shara oreteima henduha hai heiva, hareka kuaahama añeteĩteva hai Cristo; opaite kuareta yvy'ĩãrẽ iare mondojepe verã.

Jesús mynguera huvisha tay

⁴³ Mokue arama hasarã, Jesús õhẽ Samariaivirã ohojy Galileape.

⁴⁴ Shara Jesús teiva hei, Tũpa ĩñee mbeu'ia mymorãhãã ha'i hentape.

⁴⁵ Vãhẽma jyraha Galileaperã haipe'õre horype myvãhẽ, shara haire jyraha jyve Pascua areterã Jerusalenpe; hareka hesha reta opa mbai Jesús japo vekua aretepe.

⁴⁶ Haivi Jesús oujy Caná Galileape, yy, vino japoshi vekuape. Haipe ĩme'ẽ jyve pente huvisha, tay ñymbairasyva tenta Capernaumpe.

⁴⁷ Huvisha kuaama Jesús oujy Judeaivirã, hareka Galileape ĩmema'ẽjyrã, oho hai ẽvãpe jurureshu oho verã hai hentape, hareka mynguerashu verã tay, mano verãima'õ.

⁴⁸ Haivi Jesús heishu: Pee pyheshãã heshaha verã hareka mbaikavi heshaha verãrã, pyrojããpo.

⁴⁹ Tẽvã huvisha hei jyvyĩshu: Sheja, ãrẽ'ãĩte'ei ndei shyray manorã.

⁵⁰ Haipe Jesús heishu: Ekuajy nyrẽntape, ndyray manoãpo. Ko kuimbai roja Jesús heishuarã, ohojy hentape.

⁵¹ Hãrã vãhẽjymapo oho hentaperã, jokuehareare õhẽ hỹvãitirã heishu: “Ndyray, kuerama”.

⁵² Haipe pyrãndushu reta mbai orapera tay õñepyrõ haikavijy'ẽ, haire heishu: Kã'ãme ka'arurã pente horaheape rãnga opashi ñãka hasykue.

⁵³ Haipe sanjay tuu manduahe hokape kavi Jesús heishua: “Ndyray manoãpo”. Hãrã hai hareka hoope'õre, opaiteva roja reta Jesús.

⁵⁴ Kova hai mokuehea mbaikavi heshaha verã Jesús japo vekua, oujy Judeaivi Galileaperã.