Juan 3 - NandevaBiblia

Jesús mboi Nicodemo

¹ Ĩmemba'ẽ pente kuimbai fariseore mbytepe Nicodemo he'iashua, Judiore juhuvisha penteva.

² Pente pyhare oho Jesús ẽvãperã heishu: Pyrỹmboi'ia, kuaaha rãnga Tũpateiva nymbou ỹrỹmboi verãrã, heshara mba'ety katu japova ko mbaikavi heshaha verã nde rijapova, Tũpa ẽã hãndirã.

³ Hãma Jesús heishu: Añeteĩteva hai nde, oa py'ahujymba, katuãpo hesha Tũpa ẽvãpe.

⁴ Nicodemo pyrãndushu: Marãrapo pente kuimbai kuakuamava oa py'ahujy? Icherapojy ishy hyepe oa py'ahujy verã?

⁵ Jesús heishu: Añeteĩteva hai nde, oa py'ahujymba yy hareka Espiritu rupii, katuãpo iche Tũpa ẽvãpe.

⁶ Opaite tyro'oivi oava, hai tyroo; hãrã oava Espirituivi, espiritu jyve.

⁷ Avy kyje kyrã hainderã: “Rea py'ahujyñoĩpo”.

⁸ Yvytu rãnga peju pota pejua kyty, rỹhendu mbyhy'apurã, tẽvã rikuãã mãĩvira ou hareka mãtyra oho. Kyrã jyve opaite Espirituivi oavare.

⁹ Haipe Nicodemo hykuãĩ pyrãndujyshu Jesús: Marãrapo iko hokava?

¹⁰ Jesús heishu: Nde rãnga hai pyrỹmboi'ia kuaakatuva Israelpe, hãmera marãĩpo kova mbai rikua'ã?

¹¹ Ãñeteĩte hai nde, ore mbe'uha kuaahava, hareka kuaahakape ore hashahava; tẽvã pee pyrojãã mbe'uhapea.

¹² Ko yvy'ĩãrẽ'õ ryheva aijetaheperã shyrojããpirã, marãrapo pyrojajy aijetahepe mbai ara vate'õ ryhevarãme?

¹³ Mba'ety jupiva vate arapy, haivi vejy vekuãĩ rãnga; jaishu kuareta Tay.

¹⁴ Moisés mũpũãva rãĩmi yvy ikoambaipi mboi hã'ãnga bronceivi japoava, kyrãĩpo mũpũ'ãhã jyve kuareta Tay,

¹⁵ opaite jyrojaheare reko verã tykove opambava.

Tũpa jyhaihukue kuaretare pevarã

¹⁶ Shara Tũpa haihuite kuareta retarã, meẽ Tay pente'ia, opaite jyrojaheva potãã manorã, koñeĩ ĩmere verã tykove opambava.

¹⁷ Tũpa mbouã Tay yvy'ĩãrẽ jyvarehe verã kuaretare, hai rupii ohojepe verãĩ rãnga.

¹⁸ Tũpa tay jyrojahea, jyvarehãpohe; tẽvã jyrojambahea jyvareapohe, shara rojãã Tũpa Tay penteĩ'ia.

¹⁹ Jyrojambare jyvareamahe, shara mbai porãmba japo jyrerã, sapeva yvy'ĩãrẽ outẽã, timimbivaĩ pya ohovehe reta sapevaivi.

²⁰ Opaite mbai porãmba japo'iare, mymorãã kõĩvãpe'õ, hareka ñymbojããhe reta kõĩvã shara potãã heshaha mbai porãmba japo'irã.

²¹ Tẽvã mbai añeteva japo'iare ñymboja kõĩvape, opaiteva hesha verã Tũpa heishua japorã.

Juan Bautista ijetajyhe Jesús

²² Haivi Jesús oho hãndi mboireare yvy Judea kyty, haipe pyta hãndi reta mbovy ara, hareka myngarai'i kuaretare.

²³ Juan pyrỹmyngarai'ẽjyve Enonpe, Salim hyvache, shara yy heta'ẽ haipe. Kuaretare jyraha ñymyngaraika haipe.

²⁴ Kova mbaire iko ndeiteri Juan rahaha mbyperesoarã.

²⁵ Haipe Juan mboireare õñepyrõ hehei jyre ijupe hãndi pente Judio ijoheva ryheva rehe.

²⁶ Haivi haire oho heishu Juan: Pyrỹmboi'ia, kueve yy syryva Jordan hyvache rikori hãndi vekua, hareka rijeta kavirihea, ã'ẽ pyrỹmyngaraima'i jyve hareka opavare ou hai ẽvãpe.

²⁷ Juan heishu reta: Mba'ety maĩnunga ĩmere verã Tũpa mẽ'ẽãshurã.

²⁸ Peeteiva rãnga shyrẽndupi kyrã hairã, “she ha'ẽã Cristo, hỹnonderã mbouhavãĩ rãnga she”.

²⁹ Omendava ikovape tyrekorã ĩmerea hai temerã; hareka temerã ñi'ĩru haipe'ẽ hendu ijeta'ẽherã mbyvy'aite. Kyrãĩ jyve she avy'aite ãĩ jyve.

³⁰ Hai rãnga vatevepo oho'i ñymbaikatukue ryheve, tẽvã she avejyvepo aha.

Vate araivi ouva

³¹ Vate araivi ouva rãnga, opavare ĩãrẽ'ẽ. Kuaretare yvy'ĩãrẽ'õ, yvy'ĩãrẽ'õvãĩ ijetahe; tẽvã vate araivi ouva opavare ĩãrẽ'ẽ.

³² Hai mbeu heshava hareka hendu vekua; tẽvã mba'ety rojava.

³³ Tẽvã ĩme'ẽ rojavarã, my'ãñete Tũpa heiva,

³⁴ shara Tũpa mbou vekua ijetahe Tũpa ĩñee, shara Tũpa opaĩ meẽshu jy Espiritu.

³⁵ Tũpa rãnga haihu Tay, hãrã opa mba'e ñono hai ipope.

³⁶ Hãrã Tyray jyrojaheva ĩmemare tykove opambava; tẽvã Tyray rojambava, hipityãpo hokava tykove, koñeĩpo hipity ñunũpa pohyva Tũpaivi ouva.