Juan 2 - NandevaBiblia

Pente omendava Canápe

¹ Mbahapy arajyape iko omendava Canápe tenta Galileape'õ. Jesús ishy haipe'i jyve.

² Jesús hareka mboireare hãndi mbe'uha jyveshu oho verãre.

³ Hãrã vino mba'etymashu retarã, Maria heishu Jesús: Opamashi reta vino!

⁴ Jesús heishu: Taupe, marã'ĩrãra kyrã rereshe? Nde'iave rãngateri vãhẽ shy'ora.

⁵ Hãrã Maria heishu haipe jokueha'õre: Opaite pijaposhukui hai heipeva.

⁶ Haipe ẽẽ 6 kambushi yy hyru, Judiore ijoherã poryseva, haire ohohea japoseva rãĩmi. Pepenteĩ 100 litro rupi javeva.

⁷ Jesús heishu jokueha'õre: “Opa pymynyhẽ yy kova kambushire”. Haivi opa mynyhẽ reta.

⁸ Jesús heishu reta: “Ã'ẽ mĩshĩĩ pynohẽ, pyrahashu karuvasu ñyngareko'ẽhea”. Hãrã kyrã japo reta.

⁹ Haipe karuvasu ñyngareko'ẽhea hãã yy vino japoashiva, kuamba ryheve mãĩvira nohẽhã kova vino, jokueha'õ retaĩ kuaa, shara haire nohẽ yyvi. Hãrã karu vasu ñyngareko'ihea hẽno tẽmerã.

¹⁰ Hãrã heishu: Opava reta rãnga ñonokuei vino kapyryva karuvasu õñepyrõmarã, haivi hẽnohãkavare hetama hourã, ñonohãkuei vino porãnungambava. Tẽvã ndemba rỹnatu vino kapyryva ã'ẽpeve verã.

¹¹ Kova heshaha verã Jesús japova Caná yvy Galileape hai tynondeite japova. Kyrã heshaka ñymbaikatukue hãrã mboireare jyrojahe.

¹² Haivi Jesús oho tenta Capernaumpe, mĩ'ĩrũshu ishy, tyvyre hareka mboireare; haipe mbovy ara pyta reta.

Jesús mohẽ tũpaovi mba'ova hareka mavẽnde'õre

¹³ Vãhẽserima Pascua Judiore jy'areterã, Jesús oho tenta Jerusalenpe.

¹⁴ Haipe tũpaope hesha õvende'õre vaka, avisha, pykasu, hareka okambia ñynõĩva kuaretare jykyrypoti ynga tenta vasuivi veruvare, vapy ñynoĩ ñymesa retape.

¹⁵ Jesús hesha hokavarã, heky pente tukumbu, hãrã opa mohẽ reta tũpaovi hũmba ryheve avisha hareka vaka. Mbijaparashi kyrypoti okambia'õre ñymesarã, opa ityshi jykyrypotire yvype.

¹⁶ Pykasu õvende'õ retape hei: “Kovare pynohẽ koivi! Avy pijaposhi Sheru hoo mba'ovaha'ẽ ipea!”

¹⁷ Haipe mboireare manduahe kuatia Mbyparahavape heiva: “Ndero ahaihuiterã shyposhykue tata rãĩmi vejy shyrehe”.

¹⁸ Haipe Judiore pyrãndushu: Marãva mbaikavi heshaha verãrapo ryheshaka'ore, kuaaha verã ĩmeryreva mbaikatu kyrã rijapo verã?

¹⁹ Jesús heishu reta: Opa pymambai ko tũpao, mbahapy arapepo ãmupũãjykui.

²⁰ Haipe Judiore heishu: 46 ãño rãnga japohare kova tũpao mupu'ãhã verã kova tũpao; hãmera nde mbahapy arapẽĩpo rũmupũãjykui?

²¹ Tẽvã tũpao Jesús ijetahea hai, ha'i hete.

²² Hãrã Jesús kuerajyma manovare mbyteivirã, mboireare manduahe hei vekuare, hãrã roja reta kuatia Mbyparahavapy'õ hareka Jesús heiva.

Jesús opa kuaa kuaretare pyape'ẽvã

²³ Jesús ĩme'ẽ Jerusalenpe Pascua areteperã, heta'ẽ jyrojaheare shara hesha reta mbaikavi heshaha verã hai japova.

²⁴ Tẽvã Jesústeiva rojãã reta, shara hai opa pyrykuaa.

²⁵ Ikotẽvẽã mbe'uashu verã marãvã kuaretara, shara hai opamba kuaa kuaretare pyape'õ.