Juan 19 - NandevaBiblia

¹ Hãrã Pilato hei nupahã verã Jesús.

² Haivi syndarore ñope pente korona juuvi hãrã ñonohẽ reta Jesús ñakare, hareka mymondeka reta pente mondeava pỹnta hũũva.

³ Haivi õñepyrõ hovaipi nũpashu retarã hei: Tiko puku Judiore juhuvishavasu!

⁴ Pilato hykuãĩ õhẽjyrã heishu reta: Pymãĩhe, ko kuimbai aru katoape pyhesha verã, she aheshããhe maĩnunga porãmba japova.

⁵ Hãrã Jesús nohẽha katoaperã, ñakare ĩmere juu ñopẽha vekua, hareka mondeava pỹnta hũũva mondere. Haipe Pilato hei: Pymãĩhese, koo'ẽ pynynonde ko kuimbai!

⁶ Pai ruvishare hareka syndarore tũpao ñyngareko'ihea, Jesús heshama retarã õñepyrõ sapuke reta: Mbysavava kurusure! Mbysavava kurusure! Pilato heishu reta: Pyraha, pymbysavavape. Shara aheshããhe maĩnunga porãmba japova.

⁷ Judiore heishu: Ore rãnga ĩmerekoha ñee mbyparahava, haipy hei manoñoĩ verã, shara hei ijehe Tũpa Tay.

⁸ Pilato hendu kovarã, kyjeiteve'ijy.

⁹ Hãrã Pilato ichejy huvisha ho'ipe hareka pyrãndushu Jesús: Mãĩvi reivara nde? Tẽvã Jesús mba'ẽã hei.

¹⁰ Hãrã Pilato heishu Jesús: Mba'ẽãrapo rereshe? Rikuããra shepope ẽvã arỹmbysavavaka verã kurusure, hareka ãmã'ẽĩjy ndyrehe verã?

¹¹ Jesús heishu: Mbaimbatẽ rijapo shyrehe verãra Tũpa ñonoã nderã; hãme rãnga shiñono vekua ndepope tivishaiteve ĩmere hai ijehe mbai porãmba.

¹² Haipema Pilato heka marãrapo ma'ẽĩjyhe Jesús; tẽvã Judiore sapuke jyrerã hei: Rỹmã'ẽĩjyherã, nde haiveamapo huvishavasu Romape'õ ñi'ĩrũ! Ĩme'ẽ hei ijeheva haiva huvishavasu, ñymbyvaishomahe huvishavasu Romape'õ!

¹³ Pilato henduma hokavarã, nohẽkajy Jesús katoape. Hãrã pirĩmbivache'õ vapyseape vapy. Hebreope mbyheeava Gabata, he'iseva itaivi japoava.

¹⁴ Hokava jehu ndei Pascua ara vãhẽrã, ndose serimarã. Pilato heishu Judiore: Koo'ẽ punduruvishavasu!

¹⁵ Tẽvã haire sapuke jyre: Tymano! Tymano! Mbysavava kurusure! Pilato heishu reta: Marãrapo ambysavava punduruvishavasu kurusure? Pai ruvishare heishu: Penteĩ rãnga'ẽ ururuvisha, hokava hai huvishavasu Romape'õ.

¹⁶ Haipema, Pilato meẽshu reta mbysavava verãre kurusure, hãrã raha reta.

Jesús mbysavavaha kurusure

¹⁷ Jesús õhẽ jukurusu ryheve oho verã “Tãkã kãvẽ Rẽnda” he'iashuape, Hebreore ĩñeepe he'iseva Golgota.

¹⁸ Haipe mbysavava reta kurusure, hareka mõkue kuimbai hãndi, pente jasu kyty ñonohã ĩrũ jakata kyty, hãrã Jesús mbytepe ñonohã.

¹⁹ Haivi Pilato ñonoka kurusu ĩãrẽ pente ñee heiva: “Jesús Nazareno, Judiore juhuvishavasu”.

²⁰ Heta Judiovare mbijeta hokava ñee. Shara Jesús mbukurusuhavape mbyrya'ẽshi tenta, hareka ñee ñonohã Hebreo, Griego hareka latinpe.

²¹ Hãrã pai ruvishare heishu Pilato: Avy mbypara “Judiore juhuvisha vasu”; haikavivepo rymbyparahe, hai hei ijeheva rãĩmi Judiore juhuvishava.

²² Tẽvã Pilato heishu reta: Ko ambyparava rãĩmi, kyrãmãĩpo pyta.

²³ Hãrã syndarore hupima Jesús kurusurerã, mondere vekua hekyrã mbijao urũndy kavi pepenteĩ pevarã. Hareka heky reta Jesús jasoi vekua, tẽvã pente puku vekuarã hareka mbyvyvyamba vekuarã,

²⁴ hãrã syndarore hei ijupe reta: Avy ñamyndoro, haikavivepo jaivareherã mbarapo raha. Kyrã iko hoka Mbyparahavapy'õ heiva: “Amonde vekua ñimbijaohe reta, ajasoiva jyvarehe reta mbarapo raha”. Kyrã katĩ japo reta syndarore.

²⁵ Jesús jukurusu hyvache'i ishy Maria, hãndi ishy kypyy, Maria Cleofas hyreko hareka Maria Magdalena.

²⁶ Jesús heshama ishy, hareka mboirea hai haihuvarã, heishu: Taupe, koo'ẽ nymemby.

²⁷ Haivi heishu mboirea: Hoka'ẽ ndesy. Haivima Jesús mboirea raha Maria hai hentape.

Jesús mano

²⁸ Kova mbai opamarã, Jesús kuaama opa maĩnunga vãhẽma japyaperã, hareka iko verã Mbyparahavapy'õ heivarã, hei: Shu'uhe.

²⁹ Haipe'ẽ pente haro tynyhẽ'õ vino irova, haipe makypy reta pente esponja, ñapĩti yvyra japyrerã, mboja reta Jesús jurure.

³⁰ Jesús hou vino irovarã, hei: “Opama iko”. Haivi ñakã mbiroa yvy kytyrã, mano.

Pente syndaro kutu Jesús jichepe

³¹ Akuape Pascua ara serimarã, Judiore potããmba tyretekue pytashi kurusure putu'uava jy'arape, arete vasupo'ẽrã. Hãrã jurureshu reta Pilato my'õpekashi verã kurusure savava'õre tyma, haivi mbyvejyha verã.

³² Hãrã jyraha syndarore my'õpeshi reta mokue'õre tyma Jesús jichere mbysavavaha vekuare.

³³ Tẽvã ñymboja Jesús ẽvãperã hesha reta manoma, hai reheĩ my'õpeãshi reta tyma.

³⁴ Hãrã penteva syndaro kutu yvyra puku hakuavapy Jesús jichepe, hãrã haipevaĩ õhẽshi tuvy hareka yy.

³⁵ Kova hesha vekua mbeupe hareka japuã; hai kuaa añeteva mbeurã, pyroja verã jyve.

³⁶ Kova mbai jehu iko verã Mbyparahavapy'õ heiva: “Pente kãvẽĩmba my'õpẽhãshi verã”.

³⁷ Ĩme'ẽjy Mbyparahavapy'õ heiva: “Heshapo reta kutu vekuare”.

Jesús ñotyha

³⁸ Kova mbai opamarã, José tenta Arimateape'õ, jurureshu Pilato mbyvejy verã kurusuivi Jesús hetekue. José jyve Jesús mboirea ñemiapeĩ iko'i jyve haykue, shara kyjete'ishi Judiore. Pilato meẽmashurã, José oho raha Jesús hetekue.

³⁹ Nicodemo jyve, pente pyntu oho ijeta hãndi vekua vãhẽ oho jyve mbai pishekatuva ryheve, mirra, aloe mbihi'ahava.

⁴⁰ Kyrã José hareka Nicodemo ñonohẽ reta Jesús hetekue mbai pishekatuva hareka mamapy reta pente tarapo pyrẽrĩva, Judiore japoseva rãĩmi manova ñotymapo retarã.

⁴¹ Jesús kurusure mbysavavaha vekuape hyvache'ẽ yvoty hetava, haipe'ẽ pente ita jo'oava py'ahu'õ, manova ñotyhamba terivape.

⁴² Haipe ñono reta Jesús hetekue, shara mbyryã'ẽrã, hareka vãhẽ serimajyseve putu'uava jy'ara.