Juan 18 - NandevaBiblia

Jesús rahaa mbyperesoha

¹ Jesús opama ñymboirã, oho hãndi mboireare Cedron yy syry'õmi hyvaisho kyty, haipe ẽẽ pente ñana'õmi, haipe Jesús iche hãndi mboireare.

² Judas, pysyka verã kuaa kavi jyve hokava ñana'õmi, shara haipeñoĩ Jesús mboireare ñymbatyse hãndi.

³ Haipe Judas vãhẽ oho hãndi syndarore hareka tũpaope ñyngareko'õre, paire juhuvisha hareka fariseore mondova. Raha reta sapepyare, tata yvyrare myhendyava hareka kyse pukuva.

⁴ Jesús opama kuaa mbaivara ikopoherã, õhẽ hỹnonderã pyrãndushu: Mbavara pyhekapi?

⁵ Haire heishu: Jesús Nazareno. Jesús heishu reta: She hai. Haire mbytepe ĩme'ẽ jyve Judas, Jesús pysykava.

⁶ Jesús “She hai”, heimashu retarã, haykue syryrã opa japara reta, kupetei rokua yvyre reta.

⁷ Jesús hykuaĩ pyrãndujyshu reta: Mbavara pyhekapi? Hãrã haire heishu: Jesús Nazareno.

⁸ Hãrã Jesús heijyshu reta: She ãmbeuma rãngape, she hai. She shyrekapirã, pyma'ẽĩhe kovare opajy toho.

⁹ Hokava jehu Jesús hei vekua ikoma verã: “Sheru meẽshe vekuare, penteã kãñy”.

¹⁰ Haipema Simón Pedro kyse puku ĩmereva, nohẽrã jasyjashi Malco nambi jakata kyty'õ, pai ruvisha jokuerea.

¹¹ Jesús heishu Pedro: Ñoñajy ndykyse puku hyrupe. Ryrojãra ãĩme'ãĩva ahasa'asy verã Sheru heisheva rãĩmi?

Jesús rahaha pai juhuvishare hỹnonde

¹² Haivi syndarore juhuvisha hãndi, hareka Judio ñyngareko'iheare pysy reta Jesús, hãrã pokua reta.

¹³ Haivi raha reta Jesús Anas hentape, Caifas hyvaja hareka haimba pai juhuvishare hokava ãñope.

¹⁴ Ko Caifas rãnga heimbashu Judio juhuvisha retape, haikavivepo penteĩ kuimbai mano opava rehe.

Pedro hei kuambava Jesús

¹⁵ Simón Pedro, hareka ĩrũ mbo'ehareare hãndi oho Jesús haykue. Hokava mbo'eharea jykuaamba jyve hãndi pai ruvishavasu, hãrã iche hãndi Jesús pai ruvisha vasu ho'ipe.

¹⁶ Tẽvã Pedro õchepeĩ ĩmehai katoape. Haipe mbo'eharea pai ruvishavasu jykuaa hãndiva õhẽjy katuape, ijeta hãndi taupe õchepe ñyngareko'õrã ma'ẽĩhe iche Pedro.

¹⁷ Haivi taupe õchepe ñyngareko'õvã pyrãndushu Pedro: Nde ha'ẽãra jyve ko kuimbai mboireare penteva? Hãrã Pedro heishu: Mba'ety, ha'eã rãnga she.

¹⁸ Hokava arape ro'y ẽrã, jokuehareare hareka syndarore jatapymba reta tata, ñymbouvapẽĩ jypee ñynoĩ verã. Hãma Pedro ñymboja jyve ñymbou'õre ẽvãpe jypee hãndi verãre.

Pai ruvishavasu pyrãndushu Jesús

¹⁹ Haipe pai ruvishavasu õñepyrõ pyrãndushu Jesús mbaretara mboireare, hareka mbaivara pyrỹmboihe.

²⁰ Jesús heishu: She rãnga aijetañoĩ kuaretare hỹnonde; Judiore ñymbatyseape hareka tũpaoipi apyrỹmboiñoĩ, opaite henta'õre ñymbatyseaipi. Mba'ety ñemiapeĩ aijetaheva.

²¹ Marã'ĩrãra rỹpyrãndu she? Pyrãndu jyveshu opaite shiñee hendu vekuare, hareka tymbeu jyve nde amboihe vekuare. Haire kuaa kavi she hai vekua.

²² Jesús kyrã heirã, pente syndaro tũpaope'õ haipe'ia, nupa Jesús hovaipirã heishu: Kyrãra jaijetashu pai ruvishavasu?

²³ Haipema Jesús hei: Ĩme'ẽ porãmbape haivarã, mbeushe. Tẽvã haikaviva hairãra, marã'ĩrã shunupa?

²⁴ Haivi Anas mondo Jesús pokuaha ryheve pai ruvishavasu Caifas ẽvãpe.

Pedro hykuãĩ heijy kuambava Jesús

²⁵ Haipe Simón Pedro ñymbou jypee'ẽ tata hyvacherã, heishu reta: Ha'ẽãra nde ko kuimbai mboireare penteva? Pedro ñomirerã hei: Mba'ety.

²⁶ Haivi pai ruvisha jokueharea penteva, Pedro nambi jasyjashi vekua hentarã, heishu: Aryreshãngamba jyve hãndi ñana'õpe.

²⁷ Pedro hykuaĩ ñomirejy Jesús. Haipema uru ñyrãã.

Jesús rahaha Pilato hỹnonde

²⁸ Haivi pai juhuvishare raha Jesús Caifas hentaivi huvishavasu Romava hentape. Kõĩmapotarã Judiore icheã, shara icherã ñymyngyapo reta mbyparahava japoa verã heiva rãĩmi; haire kyrã japo retarã katuãpo hou reta jykaru Pascua ryheva.

²⁹ Hãrã Pilato õhẽ katoape pyrãndushu reta: Mbaiva ñee porãmbara ĩme pyrehe kova kuimbai?

³⁰ Judiore heishu: Ko kuimbai ha'ẽã porãmba japo'iarã, veruambate nde verã.

³¹ Haipe Pilato heishu reta: Pyraha hareka pijapohe Moisés mbypara vekua heiva rãĩmi. Haipe Judiore heishu: Tẽvã ore Judiore katũã mbavape jukahaka.

³² Kyrã iko Jesús hei vekua marãrapo hai manokui.

³³ Pilato ichejy ho'iperã, hẽno Jesús, hãrã pyrãndushu: Haira nde Judiore juhuvishavasu?

³⁴ Jesús pyrãndu jyveshu: Ndera ndijuhuvi rereshe, maĩrã, yngava retara shymbeu nde?

³⁵ Pilato heishu Jesús: Shera hai Judio? Nyrẽta ĩrũre, hareka pai ruvisha reta rãnga, niñono shepope. Mbaivara rijapo?

³⁶ Haipe Jesús heishu Pilato: She ha'ẽã ko yvy'ĩãrẽ'õ huvishare rãĩmiva. Hai rãĩmi jyve sherã, shyryhevare ñyrãrõte verã potãã shiñonohã Judiore juhuvisha ipoperã. Huvisharã ãĩvape ha'ẽã ko yvy'ĩãrẽ'õ.

³⁷ Hãrã Pilato heishu Jesús: Akuarã haira nde huvishavasu? Jesús heishu: Hai rãnga, nde rereva rãĩmi. Ha'erã aa ko yvy'ĩãrẽ ambeu verã añeteva. Hãrã opaite mbai añeteva japo'iare, hendu jyve reta ambeuva.

³⁸ Pilato pyrãndushu Jesús: Mbaivara hokava añeteva? Hokava pyrãndurã Pilato õhẽjy Judiore ẽvãperã heishu reta: Ko kuimbai aheshããhe porãmba japova.

Jururehahe Jesús jukaha verã

³⁹ Tẽvã pee pipykuaa pente kuimbai mbyperesoava apoiñoĩshi Pascua areteperã; pipotara apoijyshi ko Judiore juhuvishavasu?

⁴⁰ Haipe kuaretare hỹnatu sapukerã hei: Hokava avy poishi hai! Poishi Barrabas! Barrabas haimba heko porãmbava.