Juan 16 - NandevaBiblia

¹ She hai pee kova mbai potãã poi piroja shyreherã.

² Pymohẽãpokui Judiore ñymbatyseavi, hareka vãhẽpo ara mbava pindijukamarã, mõate haikaviva japova Tũpa pevarã.

³ Haire kyrãpo japo, shara shykũãã reta hareka jyve Sheru.

⁴ She hai pee kova mbai, ikomarã pynymanduahe verã ambeumapeva kova. Tẽvã jypyiterã ambe'ũãpe kova mbai, shara ãĩmeteri'ãĩ pynymbytepe.

Espiritu Santo japova

⁵ Tẽvã ã'ẽ ahajypo shymbou vekua ẽvãpe, hareka mba'ety pynymbytepe pyrãndusheva matyrapo aha.

⁶ Tẽvã kova mbai ambeuperã pynymbyvy'ã.

⁷ Tẽvã añeteva ambeupe, haikavivepo ahajyrã. She ahããrã ouãpo Pynymbypya kavi verã; tẽvã she aharã, amboupokui.

⁸ Espiritu Santo oumarã heshakaposhu kuaretare opaiteva haiva mbai porãmba japo'iare; hareka ĩme'õ pente heko kyambaa hape hareka Tũpa ñimbivache ryheva.

⁹ Heshakaposhu haire haiva mbai porãmba'iare, shara jyrojãã shyrehe;

¹⁰ heshakaposhu reta mbaivara hai tykove kyambava hape, shara ahapo Sheru ẽvãpe, hãrã pee shyreshaveãmapokui;

¹¹ hãrã heshakaposhu reta Tũpa ñimbivache ryheva, shara jaheamahe huvisharã'õ ko yvy'ĩãrẽ.

¹² Heta ĩme'are hai pee verã, tẽvã ã'ẽ katũãpo opa pikuaa.

¹³ Tẽvã Espiritu añeteva oumarã, hai kuaakapope opava mbai añeteva; shara ijetããpo ijuhuvireii, heipo jyve opaite hai henduva hareka kuaakapope maĩnunga iko verã.

¹⁴ Haipo she mombaivasukui, shara pysypo ameẽshu verã hareka kuaakapope.

¹⁵ Opava Sheru ĩmereva sha'ãpova jyve; hãme rãnga hai peeje Espiritu pysypo ameẽshuva hareka pynymbykuaakapo jyve.

Vyambaa vekua ikoposhi vy'akue

¹⁶ Vãhẽserima, shyreshaveamapi verãpe, tẽvã kutymijyapepo shyreshapijykui. Shara she ahajypo Sheru ẽvãpe.

¹⁷ Haipe Jesús mboireare pyrãndu ijupe: Mbaivara he'ise hokava? Hei ñande vãhẽserimava jaheshaveamashu verãpe, hareka kutymijyape jaheshajy verã. Shara hainda ohojypo Tuu ẽvãpe.

¹⁸ Mbaivara he'ise “Vãhẽserima”? Jaikũããny marã'ĩrãra kyrã hei ñande.

¹⁹ Jesús kuaa haire pota pyrãndu jyreshurã, heishu reta: She rãnga hai peeje vãhẽserima shyreshaveamapi verãpe, tẽvã kutymijyapepo shyreshapijykui. Haira hokava pypyrãndupi ijupe?

²⁰ Ãñete rãnga hai pee, pijaheopo hareka pyvy'ãpopi, kuaretare vyañynoĩ hairã. Pyvyambatẽvãra, pyvyamba vekua ikoposhikui vy'akue.

²¹ Pente taupe membyma potarã heta mbyhasa'asy, shara vãhẽma ara hasyshu verã. Tẽvã sanjay oamarã, manduambajyheva hasykue. Shara vy'aite'i veru pente sanjay yvy'ĩãrẽrã.

²² Kyrãĩ jyvepe ã'ẽ pyvy'ãpẽĩ, tẽvã aijyma apyryresharã vy'akue pynytynyhẽpokui, pente vya mbavamba katu heky pyndyhevi verã.

²³ Hoka arape mbaiveamapo pypyrãndushekui, añetevape hai pee Sheru, meẽñoĩpopekui shyreepe pirureshuva.

²⁴ Ã'ẽpeve mba'ẽãteri pirure shyreepe; pirure hãma mẽ'ẽãpope pynytynyhẽ verã vy'akue.

Cristo ipope'ẽ kova yvy

²⁵ Ñee ñymyhã'ãngape rãnga aijeta'ãĩpe ã'ẽpeve. Vãhẽpokui ara ãñimiñeeveamape verã ñee ñymyhã'angape, ambeu kavipopekui Sheru ryheva.

²⁶ Hoka arape pirureposhukui shyreepe; hãrã ha'eãpe airure pyndyrehe verã Sherupe,

²⁷ Sheru teiva rãnga pyndyraihu. Shara shyraihupirã hareka pyroja she aiva Tũpaivi.

²⁸ She ãhẽ Sheru ẽvãĩvi hareka ai ko yvy'ĩãrẽ, hãrã ahejapojy ko yvy, ahajypo Sheru ẽvãpe.

²⁹ Hãma mboireare heishu: Ã'ẽ rãnga rijeta kavirẽĩ, ñee ñymyhã'ãngape, hãrã kuaa kavima.

³⁰ Ã'ẽ kuaahama opa mba'e rikuaava, hareka rikotẽveã mbava mbai pyrãndu nde. Hãrã rojaha reiva Tũpaivi.

³¹ Jesús heishu reta: Ãñeterã ã'ẽ pyrojama?

³² Vãhẽma ara, ã'ẽvãĩ opa pimomohẽ verã, hareka shẽĩpo shyrejapikui. Tẽvã, ha'ẽã sheiĩ ãĩva shara Sheru aĩ hãndi.

³³ Opaite kova mbai ambeupe pyndypya vapy verã piroja shyreherã. Hetapo pyhasa'asy ko yvy'ĩãrẽ, tẽvã avy pykyje, shepopema rãnga'ẽ ko yvy.