Juan 15 - NandevaBiblia

Jesús hai uva jypy añeteva

¹ She hai uva jypy añeteva, hãrã Sheru hai ñyngareko'ẽhea.

² Hãrã pente hãka i'ãrã, jasyjashi; tẽvã iarã jasysyja hareka opa johe, hetave ia verã.

³ Pee rãnga pykyaveama, ko ñee ambeupe vekua rupii.

⁴ Pẽĩkatu shyrehe, hãrã she'ãĩpo jyve pyndyrehe. Shara uva hãkãkuereii katuãpo ia jypyre ẽ'ẽãrã; kyrã jyvepe peĩã shyreherã katuãpo mbai pijapo.

⁵ She hai uva jypy, hãrã pee hai hãkare. Hãrã ẽẽ shyreheva hareka she ãiheva rãĩmi, hetapo ia; shara shyrehembape mba'ẽãpo pijapo.

⁶ Hãrã ẽmba shyreheva, mombohapo hãka jipiva rãĩmi, mbatyha momboha verã tatape.

⁷ Pẽĩkatu jyve shyreherã, hareka pijapojyve she haivarã, pirurehe pipotava hãrã mẽ'ẽãpope.

⁸ Sheru õñemombaivasu jyve heta mbai pijapova rupii hareka kyrãrã ãñete iko pyndyhevi she amboi'areare.

⁹ Sheru shyraihuva rãĩmi, apyryhaihu jyve, hãme pikopo jyve jyhaihu ĩme'arevape.

¹⁰ Pijapo she haivarã, pikopo jyve jyhaihu ĩme'arevape, Sheru heiva opa ajaposhurã aiko jyhaihukue hai ĩmerevape.

¹¹ Kyrã aijeta, pyvy'ãĩ shendie verã hareka pynytynyhẽ verã vy'akue.

¹² Kova hai she haiva ameẽpeva: She apyryhaihuva rãĩmipo, pijyhaihu jyve.

¹³ Jyhaihu tivishaveva ĩmerea rãnga meẽva hykove ñi'ĩrũ retare.

¹⁴ Pee rãnga hai shi'ĩrũre, pijapo she hai peevarã.

¹⁵ She apyrỹmbyheeveamapo “jokueharea”, shara jokueharea kuãã hai jokue'õ japova. She apyrỹmbyhee “shi'ĩrũre”, shara opa ambeupe Sheru heishe vekuare.

¹⁶ Peeã shypyhỹrõpi, sheii rãnga apyrỹpyhỹrõ. She apyrỹmondo heta mbai pijapo verã hareka opareiimba ryheva. Kyrãrã Sheru meẽpope opa mba'e shyreepe pirureshua.

¹⁷ Kova hai pijapo verã: Pijyhaihu.

Yvy'ĩãrẽ'iare pyndyreshatããpo

¹⁸ Kuareta yvy'ĩãrẽ'iare pyndyreshatããrã, pynymanduapohe sherãni shyreshatãã retarã.

¹⁹ Pee haijyve, kuareta yvy'ĩãrẽ'iare Tũpa jyrojambahea ryhevarã pyndyraihupo jyve, haire jyhaihuva rãĩmi. Tẽvã she apyrỹpyhyrõma yvy'ĩãrẽ'õ retaivi, hãme rãnga kuaretare pyndyreshatãã, shara pikoveama haire ikova rãĩmi.

²⁰ Pynymanduahe kova she hai pee vekua: “Mba'ety jokueharea vateve'ẽshia jokue'õ”. Hãrã pũã shyrehe retarã, pũãñoĩpo jyve pyndyrehe. Hãrã she haiva haire japorã, pee pereshuva japoñoĩpo jyve.

²¹ Opaite kova mbai japoñoĩpo pyndyrehe reta she rehe, shara kuãã reta shymbou vekua.

²² Hãma aĩã aijetashu retarã, haire mba'etytẽre verãre mbai porãmbava. Tẽvã ã'ẽ katuveama heky ijuhuvi reta mbai porãmba vekua.

²³ Hãrã shyreshatamba'iare, Sheruave heshatãã jyve.

²⁴ She aĩã ajapo mbaikavi heshaha verã haire mbyteperã, mba'etytẽre verãre mbai porãmbava hareka mbavamba katu japova. Hãrã haire ajemaĩ heshatẽ reta kova mbai, tẽvã shyreshatãã jyre hareka jyve Sheru.

²⁵ Tẽvã kyrã jehu shara ikoñoĩpo ñee mbyparahava haire jykuatiape'õ: “Shyreshatããrei jyre”.

²⁶ Tẽvã oupokui Sheru õĩvi pynymbypya kavi verã, hokava hai Espiritu Santo añeteva ryheva, hãrã hai ijeta kavipohekui Shyree.

²⁷ Hãrã pijetapo jyvehekui Shyree, shara õñepyrõãivive shimi'ĩrũpi.