Juan 14 - NandevaBiblia

Jesús rupii katu ñavãhẽ Tuu ẽvãpe

¹ Avy pejepy'apy, pirojahe Tũpa hareka piroja jyve shyrehe.

² Sheru hentape heta'ẽ pynyrẽndarã; kyrããrã, ãmbe'ũãmbapope, aha ãmyhẽvãpe verã pynyrẽndarã.

³ Ahajyma opa ãñono kavi pynyrẽndarãrãpo aijy apyryrahakui, jaiko pãvẽĩ verã she aikovape.

⁴ Pikuaa rãnga matyrapo ahajy hareka pikuaajy tape.

⁵ Tomas heishu Jesús: Yreja, kuahãã rãnga matyrapo reho. Marãrapo kuaahajy tape?

⁶ Jesús heishu: She hai tape, añeteva hareka tykove. She rupii katupo vãhẽha Sheru ẽvãpe.

⁷ Shykuaapirã, pikuaapo jyveshu Sheru, hãrã ã'ẽ pikuama, shara pyheshapẽishu.

⁸ Haipe Felipe heishu: Yreja, ma'ẽĩhe tyheshahave Nderu, hãrã haikavimatẽpove orekui.

⁹ Jesús heishu: Felipe, kuriãã rãnga aiko ai penendie, hãmerã nde'iave shykuaa? Shyresha'ia reta rãnga, heshama jyve Sheru. Marã'ĩrãra rirureshe aheshakape verã Sheru?

¹⁰ Ryrojããra Sheru hãndi pentevãĩ orerãme? Kova haipeva ha'ẽã shijuhuvirei haiva, Sheru iko'i shypyapeva rãnga japo.

¹¹ Shyroja rãngapopi Sheru hãndi pentevãĩ orerã, hareka Sheru shypyape'ẽvã, kova pyrojãarã opava maĩnunga ajapo vekuaĩ pyroja.

¹² Ãñete hai pee, jyroja shyreheva japopo jyvekui opa maĩnunga she ajapova, hareka hetavepo maĩnunga japokui, shara ahajypo Sheru ẽvãpe.

¹³ Hãrã opaite maĩnunga shyreepe pirureva ameẽpope; Teru mbyvetehashu verã Tyray rupii.

¹⁴ She ajapoñoĩpo maĩnunga shyreepe pirureva.

Jesús mbeu mbouñoĩ verã Espiritu Santo

¹⁵ Shyraihupirã, pynatupo she haipeva.

¹⁶ Hãrã airureposhukui Sheru mboupe verã, pente pynymbory verã hokava hai Espiritu Santo opa ara pinimi'ĩrũ verã.

¹⁷ Hokava Espiritu Santo haipo pynymboihekui mbai añeteva, hãrã Tũpa jyrojambaheare katuãpo mẽ'ẽãshuhai, shara haire heshãã hareka kuãã. Tẽvã pee pikuashu shara hai ikoma'i penendie, hareka ikopo pyndypyape.

¹⁸ Apyryrejããpo tuumbare rãĩmi, aijypo aiko penendiekui.

¹⁹ Kõõima'ẽ, kuaretare shyreshaveama verãpe, tẽvã pee shyreshajypokui, shara ãmanoãpokui, hãrã pee pymano'ãĩpo jyvekui.

²⁰ Hoka arape pikuaapokui Sheru hãndi pentevãĩ orevarã, hareka pikova shypyape hareka she aikova pyndypyape.

²¹ Henduva hareka japova she haiva, hokava hai ãñete shyraihuva, shyraihuva Sheru haihupo jyveshu, hãrã she ahaihupo jyve, hãmã aheshakaposhu marãvara she.

²² Haipe Judas heishu Jesús (haimba Iscariote): Yreja, marã'ĩrãra oreĩpo rijeshakajy'ore, rijeshakããraposhu kuaretare?

²³ Jesús heishu: Shyraihuva japopokui she haiva, hãrã Sheru haihuposhu, Sheru hareka She ouhapo ikoha hãndi.

²⁴ Tẽvã shyraihumba, japoã she haiva. Hãrã pee pyhendupẽĩva ko ñee ha'ẽã shiñee, Sheru shymbou vekua ĩñee rãnga.

²⁵ Opaite kova mbai ambeu'ãĩpe, ãĩmẽteri'ãĩ penendierã.

²⁶ Tẽvã Espiritu Santo Sheru shyreepe mbou verã hai pynymbypya kavi verã, pynymbo'epo hareka pynymymandu'akahe verã opaite hai pee vekua.

²⁷ Ahejape pyavapy. Ameẽ pee shypyavapykue, ãmẽ'ẽãpe kuaretare meẽva rãĩmi. Avy pejepy'apy hareka avy pykyje.

²⁸ Pyhenduma rãnga hai'ãipeva ahajypo, tẽvã aijypo aiko penendiekui. Pee ãñete shyraihurã pyvy'aĩtẽ verã, shara pikuama ahajypo Sheru ẽvãperã mbaivasuve shyheviva.

²⁹ Ãmbeupe kova mbai, ndeiteri jehurã, ikomarã pyroja verã.

³⁰ Hetaveamapo aijetape, shara vãhẽma ou Ãña ko yvy'ĩãrẽ huvisha'õ. Hai mbaivapẽã jepy shyrehe,

³¹ tẽvã kyrãñoĩpo jehu kuaretare kuaa verã jyve she ahaihushuva Sheru, hareka ajaposhu hai heisheva. Pupũa, jaha koivi!