Juan 13 - NandevaBiblia

Jesús joheshu mboireare ipy

¹ Arete Pascua serima'ẽvã, Jesús kuaa vãhẽma jy'ora ko yvy'ĩãrẽ, ohojy verã vate arapy Tuu ẽvãpe. Jesús haihuñõĩmba, hai mĩ'ĩrũre vekuare ko yvy'ĩãrẽ'õre, hãrã ã'ẽ heshakashu reta hai heko jyhaihukue.

² Hãrã Jesús mboireare karuñynoĩ hãndivape, Ãña mijemaĩmba Juda Iscariote pyape, Simón tay, pysyka verã Jesús.

³ Jesús kuaa opa mba'e Tuu ñono ipoperã, hai kuaa Tũpa ẽvãivi ourã hareka ohojy verã Tũpa ẽvãpe.

⁴ Hãrã karuma ñynoĩrã Jesús pũã mesaivi, jasoiva hekyrã, ijokuapy toalla.

⁵ Haivi ratonape yy ñonorã õñepyrõ joheshu mboireare ipy, hãrã toalla ijokua'ipya mitinijypy.

⁶ Simón Pedro ipy johemapo'ẽshurã hai hei: Sheja, haira rijoheposhe shepy?

⁷ Jesús heishu Pedro: Ã'ẽ rikũããteri ajapo'ãĩva, tẽvã ndei rikuaakavi.

⁸ Pedro hei: Añonoã rãngaponde rijoheshe verã shepy! Jesús heishu: Ajohẽãnderã, haivẽãmapo ndekui shyryheva.

⁹ Hãma Simón Pedro heishu: Sheja, akuarã avy shepyĩ joheshe, johe jyve shepore hareka shãka.

¹⁰ Tẽvã Jesús heishu: Hairãã opa jahuva koñeĩpo ipyĩ johe, shara hai kyaveama'ẽ. Hãrã pee pyndykyaveama, tẽvã ha'ẽã opaĩ kyamba'õ.

¹¹ Jesús hei: “Ha'ẽã opaĩ kyamba'õ”, shara kuaa'ẽ mbavarapo pysykakui.

¹² Jesús opama mboireare ipy joheshurã mondejy mondeva ĩãrẽ'õ, haivi vapyjy mesaperã, heishu reta: Pikuaara ajapo pyndyreheva?

¹³ Pee rãnga shymbyheepi “Pyrỹmboi'ia” hareka “Sheja”, haikavi rãnga kyrã pererã, shara haishe.

¹⁴ Hãrã she, Pyrỹmboi'ia, hareka Peeja pepy ajoheperã. Kyrãpo pepenteĩ pijohe jyve pindijupe pepyre.

¹⁵ She aheshakamape, ajapova rãĩmi pijapo verã jyve.

¹⁶ Ãñete hai pee, katuã jokueharea vateve'ẽshi jokuerea, hareka katuã mondohava vateve'ẽshi mondokava.

¹⁷ Pikuaa kavi kovarã, hareka pijaporã pyvy'apokui.

¹⁸ Ha'ẽã opaĩ aijeta'ãĩ pyndyreheva; shara she aikuaa mbava retara apyhỹrõ. Tẽvã ikoñõĩpo Mbyparahavapy'õ heiva: “Karu'ẽ shendieva, ñymbyvaisho shyrehe”.

¹⁹ Ã'ẽvãĩ hai pee ndeiteri ikorã, ikomarã pyroja verã She Ñoĩva.

²⁰ Ãñete hai pee, ãmondova myvãhẽ kaviva, shymyvãhẽjyve; hãrã shymyvãhẽva, myvãhẽjyve shymbou vekua.

Jesús mbeu Judas pysyka verã

²¹ Kova opa heirã, Jesús ñandu pyape vyambavarã hei: Ãñete hai pee, pente pynymbyte'õpo shypysykakui.

²² Haipe mboireare opa mãĩ ijehe, shara kuãã reta mbavara Jesús hei'ẽhe.

²³ Pente mboirea Jesús haihuveva, vapy'ẽ jichere karu ñynõĩrã,

²⁴ hãrã Simón Pedro mỹhã'ãnga'ẽshu, pyrãndushu verã Jesús mbavara hei'ẽshu.

²⁵ Hãrã hai ñymbojavejyhe pyrãndushu Jesús: Yreja, mbavarapokui?

²⁶ Jesús heishu: Ãmãkypo kova pãhã pysẽvẽ, hãrã ameẽshua haipokui hokava. Haivi mãky pãhã pysẽverã meẽshu Judas Iscariote, Simón tay.

²⁷ Hãrã Judas pãhã pysevẽ hekymarã, Satanas iche pyape. Haipe Jesús heishu: Nareã japo rijapo verã.

²⁸ Tẽvã haipe mesape karu'ẽ hãndivare, mba'ety kuaava marã'ĩrãra kyrã heishu.

²⁹ Judas rãngamba kyrypoti hyru ñyngareko'ihea, hãrã ĩme'ẽ mõãte Jesús heishua oho ova verã mba'etyshuare Pascua pevarã, maĩrã, mẽmeẽshu verã maĩnunga pavetevare.

³⁰ Hãrã Judas pãhã pysevẽ opama hourã, ãrẽã õhẽ oho. Pyntumãĩmba.

Ñee py'ahuva japoa verã

³¹ Judas ohomarã Jesús hei: Ã'ẽ, kuareta Tay heshakapo pyrãtãkue, hareka hai rupii Tũpa heshakapo pyrãtãkue ĩme'areva.

³² Hãrã she aheshaka Tũpa pyrãtãkuerã, Tũpa heshakapo jyve marãra shypyrãta, hareka areãpo kyrã japokui.

³³ Shyrayre, kỹvẽãmapo ãĩme'ãĩ pynymbytepe, shyrekapopikui, hãrã Judiore haishua rãĩmi ã'ẽ haijyvepe: Aha verãpe katuãpo peho.

³⁴ Ahejape kova ñeẽ japoha verã py'ahuva: Pijyhaihupo. She apyryhaihuva rãĩmi, hãrã kyrãmipo pyhaihu jyve pepenteĩ yngavare.

³⁵ Pijyhaihurã, opaite kuaretare heshapo pyndyrehe, pee haiva she amboivare.

Jesús hei Pedro ñomi verã

³⁶ Simón Pedro pyrãndushu Jesús: Sheja, matyrapo reho? Jesús heishu: She aha verãpe, katũãpo ã'ẽ reho shaykue; tẽvã ha'ereipo rehokui.

³⁷ Haipe Pedro heishu: Sheja, marã'ĩrãra katũãpo ã'ẽ aha ndipikui? She ãĩjyve ãmano nendie verã!

³⁸ Jesús heishu: Ãñeteratẽ nde rẽĩ rỹmano shendie verã? Ãñeteĩte hainde, ndeiteri uru ñeerã, mbahapyjypo rerekui shykuambava.