Juan 12 - NandevaBiblia

Pente taupe ñõhẽhe Jesús mbai pisheka kavi

¹ Hãrã 6 aravape ndeiteri vãhẽ arete Pascua verã, Jesús oho Betaniape Lazaro iko'iape hai mynguerajy vekua manovare mbyteivi.

² Haipe pynturã japo reta karuvasu Jesús heepe. Marta mbory ñono'ẽ mesape hou verãre; haipe Lazaro vapy'ẽ jyve Jesús karu hãndi verã.

³ Maria veru mbai pishekatuva yvotyivitei japohava, hareka hepyva, Jesús ipyre kyty. Hãrã opa kytyherã ñãkahaapy mitĩnijy. Haipe oo ipe opa vyhasa mbai pishekatu vekua.

⁴ Hãrã Judas Iscariote, Jesús mboireareva jyve, hareka pysyka'ẽshu verã hei:

⁵ Marã'ĩrãra kova mbai pishekatuva õvendehãã 300 nikere repy; haivi pavete'iare mẽ'ẽhashu verã?

⁶ Tẽvã Judas ha'ẽã manduahe pavete'ia retarã, shara manarõserãmeĩ. Hai kyrypoti mbatyhava hyru ñyngareko'ihea, hareka ñomi'i mombohapyvarã.

⁷ Haipe Jesús heishu Judas: Ma'ẽihe ko taupe! Shara hai natumbare mbai pishekatuva ara shõtỹharã pevarã.

⁸ Kuareta pavetevare opa ara ñõĩpo piko hãndi, tẽvã she opa arããpo aiko pynypãũpe.

Ñemiãpeĩ ñee ñonoãhe Lazaro jukaha verã

⁹ Heta'ẽ Judiore kuaava Jesús Betaniape'ẽrã, jyraha haipe hesha verãre Jesús hareka jyve Lazaro, Jesús mynguerajy vekua.

¹⁰ Haipe pai juhuvishare pente ñeepẽĩ ñynoĩ juka verã jyve Lazaro.

¹¹ Shara hai rehe heta Judiovare ohovẽãma haykue, hareka jyrojahe reta Jesús.

Jesús iche Jerusalenpe

¹² Kuareta hetava jyraha tenta Jerusalenpe arete Pascua pevarãpe, pareemajyrã heta'ẽ kuaava Jesús vãhẽpo oujyve Jerusalenperã.

¹³ Hãrã jasyja reta karãnday hoky jyraha hỹvãĩti reta Jesús hareka sapuke jyrerã hei: Yrỹmondojepeve, Ũrũtũpa! Tojehovasa Ñandeja heepe ouva! Tojehovasa Israel juhuvisha vasu!

¹⁴ Jesús hesha pente mbirikarayrã jupihe, Tũpa ĩñee mbyparahavape heiva rãĩmi:

¹⁵ “Avy pykyje tenta Sionpe'pẽiva! Pymãĩhe ouma punduruvishavasu, mbirikamire ou”.

¹⁶ Jypyiterã mbo'ehareare kũããmba reta mbaivara he'ise kova jehu'õ. Tẽvã Jesús manorã hareka kuerajymarã, manduajyhe reta opaite kova mbai ikova Tũpa ĩñee mbyparahavape heiva rãĩmi opa iko.

¹⁷ Opaite kuaretare Jesús ẽẽ hãndi vekuare, Lazaro hẽno ita jo'oavaivi hareka mynguerajyrã manovare mbyteivirã, haire opa mbeu heshava.

¹⁸ Hãrã kuaretare õhẽ hỹvãĩtishu reta Jesús, shara haire kuaa mbaikavi heshaha verã hai japova.

¹⁹ Tẽvã fariseore hei jyre ijupe: Pyheshama mbaiveamapo katu jajapo. Pymãĩhe, marãra opaite kuaretare jyraha hipii!

Tenta Greciape'õre heka jyre Jesús

²⁰ Jerusalenpe ohovare õmombai verã Tũpa Pascua aretepe, haire mbytepe'ẽjyve Greciavare.

²¹ Kovare ñymbojahe Felipe, hai jyve tenta Betsaidava, Galileape'õ, jurureshu reta: Karai, pota rãnga heshahave Jesús.

²² Felipe oho mbeushu Andres, hãrã mokuevea jyraha mbeushu Jesús.

²³ Jesús heishu reta: Vãhema ora kuareta Tay õmomba'eha verã.

²⁴ Ãñete hai pee, trigo hãỹ o'ã yvyperã hareka jaiãrã kyrãĩĩ pyta, tẽvã timity ñotyhãrã hareka jairã hẽñorã hetapo'ia.

²⁵ Hãrã ĩme'ẽ hykoveĩ haihuvevarã jyvarepohe, hipityãpo tykove opambava, tẽvã hykove haihumba hipitypo tykove opambava.

²⁶ Hãrã ĩme'ẽ pota japosheva haivarã, tou shaykue. Mãĩpi she ãĩvãpe, haipepo ĩme'ẽjyvekui japosheva aipotava, hareka Sheru õmombaivasuposhukui.

Jesús mbeu mano verã

²⁷ Ã'ẽ ajepy'apy ãĩ. Mbaivarapo ha'e? Hairapo: “Sheru mbyhasa shyhevi ko jepy'apy porãmba”? Tẽvã ha'ẽrãveara ai ajapo verã Sheru potava.

²⁸ “Sheru, heshaka nypyrãtãkue”. Haipe ñyhendu ñee vate araivi heiva: Aheshakama rãnga, tẽvã hykuaĩpo aheshakajy.

²⁹ Kuareta hetava haipe'õre hareka henduvare hokava ñee heijyre, hy'apuva rãnga, tẽvã ĩme'ẽjy heiva: Tũpa jokueva rãnga ijetashu Jesús.

³⁰ Jesús heishu reta: Ha'ẽã kova ñee shyrehẽĩ ĩñendukava, pyndyrehe rãnga.

³¹ Ã'ẽ kuaretare yvy'ĩãrẽ'õ mbivachehakapo, hãrã ko yvy'ĩãrẽ huvisharã'õ Ãña mohẽãpo katuape.

³² Tẽvã shumupu'ãhãjyma yvy'ĩãrẽivirã, opaiteapo arujy shijupekui jyroja shyrehe verã.

³³ Kyrã Jesús mbeu kavishu reta marãrapo mano kurusure.

³⁴ Hãrã kuaretare heishu: Ore rãnga henduha Moisés mbypara vekua heiva Cristo hykove japymba verã. Marã'ĩrãra rere kuareta Tay hupiha verã kurusure? Akuarã mbavara kuareta Tay?

³⁵ Jesús heishu reta: Ĩmeteripo'ẽ pynymbytepe sape'ẽva, tẽvã kỹỹvẽãmapo. Pyvata pyrekoteri ko sape'õrã, mahẽ pyndysapyakui timimbiva; shara timimbivape ikovare kũãã mãĩpirapo oho.

³⁶ Ĩmeteri'ẽ pynymbytepe sape'õrã pirojahese, hai ryhevare iko pyndyhevi verã. Jesús kova opa heirã oho, ñemishi reta.

Judiore jyrojããhe Jesús

³⁷ Jesús heta japo mbaikavi heshaha verã haire hỹnonde, kyrãtẽvã jyrojãhe reta.

³⁸ Kyrã jehu iko verã Tũpa ĩñee mbeu'ia Isaias mbypara vekuape: Sheja, mbavara roja ñambeuva? Mbavapera ryheshaka nymbaikatukue?

³⁹ Hãrã kuaretare katuã roja, shara Isaias kyrã mbyparajy:

⁴⁰ Tũpa opa mỹhãvẽshi hesare hareka pya mytãtashi reta. Potãã hesha retarã hareka kuaa reta pyaperã, jyroja shyreherã oujy shykotyrã, hareka amynguera verãre.

⁴¹ Isaias kyrã mbypara shara tynonde hesha Jesús hĩmbipekue, hãrã kyrã ijetahe.

⁴² Tẽvã, heta Judio jyroja jyvehe Jesús, hareka huvishavare. Mbe'uã retarãmeĩ opavare hỹnonde, shara kyjeshi fariseore, potãã mohẽshu reta Judiore ñymbatyseaivirã.

⁴³ Haire potãĩ kuaretare mbyveteshu, Tũpa õmombaitẽ verãivi.

Jesús ou mondojepe kuaretare

⁴⁴ Jesús hỹnatu ijetarã hei: Shyrehe jyrojava ha'ẽã shyrehẽĩ jyrojava, jyrojajyvehe Sheru shymbou vekua.

⁴⁵ Hãrã shyreshava, heshajyve shymbou vekua.

⁴⁶ She hai sapeva ai vekua ko yvy'ĩãrẽ, opaite jyroja shyreheva ikoveama verã timimbivape.

⁴⁷ Ĩme'ẽ shiñee hendutẽva japombavarã, sheeãpo ajahehe. Shara she aĩã ko yvy'ĩãrẽ ajahehe verã kuaretare, koñeĩ she ai amondojepeshu verãre.

⁴⁸ Hãrã ĩme'ẽ shiñee mbijicheva hareka japombavarã, ĩmemare jahehe verã. Ñee she hai vekuapo jahehekui ara japyape vãhẽmarã.

⁴⁹ She shijuhuvireĩã aijeta, Sheru shymbou vekua meẽshe ñeẽ japoa verã haipo apyrỹmboihe.

⁵⁰ She aikuaa Sheru heiva hai tykove opamba pevarã. Hãrã opaite, Sheru heisheva rãĩmi hai'ãijyve.