Juan 11 - NandevaBiblia

Lazaro manorã vẽkua

¹ Ĩmenda'ẽ pente kuimbai Betaniape'õ ñymbairasyva Lazaro he'iashua, Maria hareka kypyy Marta hentape.

² Hoka Maria, Lazaro hiindy, haimba oho mbipishe katushu vekua Ñandeja ipyre, hareka ñãkahaapy mitĩnijy.

³ Haipe hiindy mokue'iare he'ikashu reta Jesús: Yreja, ni'ĩrũ ryhaihuva Lazaro rãnga ñymbairasy'ẽ.

⁴ Jesús hokava hendurã hei: Ko mbairasy ha'ẽã rãnga opa verã ñymãnope; Tũpa ñymbaikatukue heshaka verãĩ rãnga, ko Lazaro ñymbairasykue rupii Tũpa heshakapo hai Tay mbaivasuva.

⁵ Jesús haihushu Marta, kypyy Maria hareka Lazaro.

⁶ Jesús hendutẽ Lazaro ñymbairasyva, pytaveejy mõkue ara hai ẽvãpe.

⁷ Haivi, kova opamarã, Jesús heishu mboireare: Jahajy Judeape.

⁸ Haipe mboireare heishu: Pyrỹmboi'ia, ka'ãmẽĩ haipe'õ Judiore ndyrekajyre pota itape ndukarã, hãmera potama rehojy haikyty?

⁹ Jesús heishu reta: Pente arava ĩmere 12 ora. Kuareta arape vatava vapiã, shara kuarasy sapeshu.

¹⁰ Tẽvã pỹntuaipi vatava vapipo, shara mba'ety sapeshuva.

¹¹ Haivi Jesús heishu reta: Ñani'ĩrũ Lazaro rãnga ochema, tẽvã ahapo ãmomba.

¹² Haipe mboireare heishu: Yreja, Lazaro ochẽĩ'ẽrãmẽãra he'ise kuera verã.

¹³ Jesús rãnga he'ise Lazaro manomava, tẽvã mboireare pya mbijetajyrehe mõã ochẽĩ'ẽshurã.

¹⁴ Haivi Jesús mbeu kavishu reta: Lazaro rãnga manoma.

¹⁵ She avya'ãĩ, ãimeã'ãĩ haiperã, shara haikavive pee pevarã, piroja shyrehe verã. Tẽvã jaha ñamaĩhe.

¹⁶ Haipe Tomas, mbyheavajy “Mokuepya” heishu mbo'eharehãndiare: Jahave ñamano hãndi verã ko pyrỹmboi'ia.

Jesús hai tykove

¹⁷ Jesús vãhẽ oho tenta Betaniaperã, hesha urũndy arama hasa Lazaro ñotyhãva.

¹⁸ Betania mbyryã'ẽshi Jerusalen, mbahapy kilometroipi,

¹⁹ heta Judiore oho Marta hareka Maria hentape, mbypya kavijy verãre jykyvy manoshirã.

²⁰ Marta kuaama Jesús vãhẽ ourã, õhẽ hỹvãĩtishu, tẽvã Maria hoo'ipẽĩ ĩmehai.

²¹ Haipe Marta heishu Jesús: Yreja, kope rĩmẽrẽirã, shykyvy manombatẽ verã.

²² Tẽvã she aikuaa Tũpa meẽñoĩpo nde opaite rirureshuvarã.

²³ Jesús heishu: Ndykyvy kuerajypokui.

²⁴ Marta heishu Jesús: Ãñete she rãnga aikuaa, puãjypokui manovare kuerajyma'ẽrã, ara opavape.

²⁵ Haipe Jesús heishu Marta: She hai manovare mynguerajy'ia, hareka tykove. Shyrehe jyrojava, ajemaĩpo mano kuerajyñoĩpo.

²⁶ Hãrã opaite hykove teri'iare jyroja shyreheva, opa ara pevarãpo mano. Ndera ryroja kova mbai?

²⁷ Marta heishu Jesús: Kyrãĩte, Sheja. Aroja nde haiva Cristo, Tũpa Tay ou verã aryka'e ko yvy'ĩãrẽ.

Jesús jaheo Lazaro ñotyhã vekuape hỹnonde

²⁸ Haivi kova mbai opa heirã, Marta oho hẽno kypyy Maria, ñemiãpẽĩ heishu: Pyrỹmboi'ia vãhẽma ou kope, hai nyrẽnokaje.

²⁹ Maria hendu hokavarã pũã oho Jesús ẽvãpe.

³⁰ Jesús icheãmba teri Betaniape, ĩmeĩmba teri'ẽ Marta hỹvaĩtishuape.

³¹ Judiore haipe'ẽ hãndiare hentape, heshama Maria õhẽ ohorã opa jyraha jyve hipi, shara pyape hei reta tã'õvere ẽvãpe oho jaheojya.

³² Maria vãhẽma oho Jesús ẽvãperã, ĩñesu hỹnonderã heishu: Yreja, kope rĩmerẽĩrã shykyvy Lazaro manombatẽ verã.

³³ Jesús hesha Maria hareka Judiore ou hãndiare jaheojyrerã, paveteshu hareka pyape mbasyjyve.

³⁴ Hãrã pyrãndushu reta: Mapera piñoty? Haire hei: Yreja, ei mãĩhe.

³⁵ Haipe Jesús jaheo.

³⁶ Hãrã Judiore hei: Pyheshara marãra haihumbashu!

³⁷ Tẽvã ĩme'ẽ heihevare: Hai mynguera'i heshamba kũvãĩpiare, mba'ẽãmba katu japohe Lazaro manomba verã?

Lazaro kuerajy

³⁸ Jesús pyape mbasy ryheve ñymboja ita jo'oa vekuape, Lazaro hetekue ẽvãpe, hokava ita jo'oava, hõche pente ita vasupẽĩ mbotyhajy.

³⁹ Jesús hei: Pymbysyryshi mbotyhapya! Marta, manova hiindy heishu Jesús: Yreja, ĩnema rãnga'ãmo shara urũndy arama'ẽ manova.

⁴⁰ Jesús heishu: Ambe'ũarandeje, ryrojarã ryhesha verã Tũpa ñymbaikatukue?

⁴¹ Hãrã mbysyry reta ita vasu mbotyhapya. Jesús vate maĩrã hei: Sheru, gracia ameẽnde shara nde shyrẽndu.

⁴² She aikuaa shyrẽnduñoĩrã, tẽvã kova kuaretare rehe kyrã hainde, roja verãre nde hai shymbouvarã.

⁴³ Opama kova heirã hỹnatu sapuke: Lazaro, ẽhẽ katuape!

⁴⁴ Hãrã mano vekua õhẽjy, ipo hareka ipy mamahãpya ryheve, hãndi hova mbaso'iapya savana tĩĩ vẽkua. Jesús heishu reta: Opa pijorashi mamahãpya, hareka pymã'ẽĩhe tohojy.

Ñemiãpeĩ ñee ñonoãhe Jesús pysyha verã

⁴⁵ Heta Judiovare, Maria ou mi'ĩrũ vekuare heshama Jesús japovarã, jyroja jyvehe reta.

⁴⁶ Tẽvã a'ãmore jyraha fariseore ẽvãpe, mbeushu reta Jesús japo vekua.

⁴⁷ Haipe fariseo hareka pai ruvishare ñymbaty hãndi Judiore juhuvisha retarã hei: Mbaivarapo jajapo? Ko kuimbai rãnga heta mbaikavi heshaha verã japo.

⁴⁸ Ñama'ẽĩhe kyrãĩ'ẽ kovarã, opavapo jyrojahekui, hareka huvisha Romavare oupo opa mambaikui ñande tũpao hareka ñanyrẽta.

⁴⁹ Tẽvã Caifas he'iashua, pai ruvisharã'õ hokava ãñope heishu reta: Pee rãnga mba'ẽã pikuaa!

⁵⁰ Pyheshããra, haikavivepopekui pente kuimbai mano opava reherã, mahẽ opaite tentare jyvareahekui.

⁵¹ Caifas ijuhuvireĩã hei Tũpa mbykuaaka shara hai pai ruvisha hokava ãñope, hei Jesús manohẽ verã tenta Judiovare.

⁵² Ha'ẽã kova tenta ẽvãrei, ẽẽjyve opaite Tũpa jyrojaheare mbatyrã pente ñeepe ñono verã.

⁵³ Hãrã hoka araivive, Judio juhuvishare pente ñeepẽĩ ñynoĩ juka verã Jesús.

⁵⁴ Hãrã Jesús vata veamã Judiore mbyteipi, koñeĩ õhẽ Judeaivi hareka oho yvy ikoambaipi hyvache, tenta Efrain he'iashuape, haipe pyta hãndi mboireare.

⁵⁵ Vãhẽserima arete Pascua verãpe Judiore jy'arete, heta kuaretare oho Jerusalenpe ñymypõti'ẽ verã areterã.

⁵⁶ Hãrã hekajyre Jesús, tũpaope ĩmema ñynoĩrã pyrãndu jyre ijupe: Marãra pere jyve, Jesús ourapovekui areterã?

⁵⁷ Fariseore hareka pai ruvishare mbeushu kuaretare japo verã, ĩme'ẽ Jesús heshavarã, tymbeu orekui pysyha verã.