Juan 10 - NandevaBiblia

Ñee ñymyhã'ãnga avisha ñyngareko'ihea ryheva

¹ Haivi Jesús hei: Ãñeteĩte hai pee, ichemba avishare jykora hõcheipi, yngaipi icheva, hoka hai manarõ'ia hareka heko porãmba.

² Tẽvã õcheipi icheva hoka hai ãñetẽĩte avishare ñyngareko'ihea.

³ Hãma õche ñyngarekoheva peashu iche verã avishare ñyngareko'ihea, haivi hai hẽno pepenteĩ heepe, hãrã avishare kuaajyveshu reta ĩñee. Hãrã hai nohẽ koraivi.

⁴ Opama nohẽ katoape jy'avisha retarã, hỹnonderã ohoshu, hãrã avishare oho haykue shara kuaa reta ĩñee.

⁵ Tẽvã kuambaare haykue ohoãpo, opaĩpo ñyvãhẽshi reta, shara kuããshi ĩñee.

⁶ Kyrã Jesús ijetashu reta ko ñee ñymyhã'ãnga rupii, tẽvã haire kuãã mbaivara heishu reta.

Jesús hai avishare ñyngareko'ihea pya kaviva

⁷ Haipe Jesús hykuãĩ heijyshu reta: Añetevape haijype: She hai õche avishare iche'õĩpi.

⁸ Opaite tynonde ou shyhevi vekuare, hai manarõ'ia hareka heko porãmba'iare; hãme rãnga avishare ñee henduãshu reta.

⁹ She hai õche; she rupii icheva, ohojepepo; iche hareka õhepo koraivi avishare rãĩmi, hareka vãhẽñoĩposhu hou verã.

¹⁰ Manarõ'ia koñeĩ ou manarõ verã, puruka, hareka pyrỹmbai verã; tẽvã she ai ameẽ verã tykove, hareka heta pyree verã tykove.

¹¹ She hai avishare ñyngareko'ihea pya kaviva. Hãrã ko avishare ñyngareko'ihea pya kaviva, meẽpo hykove jy'avisha retare.

¹² Tẽvã mbyhepyashurãmeĩ mba'apova, heja avishare hareka ñyvãhẽshi, shara ha'ẽãhai avishare ñyngareko'ihea, hareka ha'eã avishare hai ña'ãpova. Hãme rãnga avara vasu ou opa momohẽ avishare, hareka oparupi opa oho.

¹³ Hãrã hokava kuimbai ñyvãhẽ shara kyrypoti rehẽĩ mba'apo. Hãrã mba'ẽãshu hai avishare.

¹⁴ She hai avishare ñyngareko'ihea pya kaviva; she aikuaa shy'avishare, hãrã haire shykuaa jyve.

¹⁵ Sheru shykuaa kavi, hãrã she aikuaa kavi jyveshu Sheru. Kyrãĩ aikuaa kavi jyve shy'avishare; hãrã haire shykuaa kavi jyve hareka she añono shyrykove shy'avisha retare.

¹⁶ Ĩmeĩ'are jyve ynga avishare haimba kova korape'õre, hokavare opapo arujyvekui. Hãrã haire japo verã jyve shiñee. Hãrã ẽpo pente jatyvapẽĩ, hareka penteĩpo'ẽ ñyngarekoheva.

¹⁷ Sheru shyraihu, shara aĩ shykove ameẽ verã, haivi ai apysyjy verã.

¹⁸ Mba'ety heky shyheviva shykove, koñeĩ sheii ameẽjy. Shara ĩme'are mbaikatu ameẽ verã hareka apysyjy verã. Kova hai ñeẽ japoa verã amyvãhẽva she ruivi.

¹⁹ Judiore hendu kovarã, ouma pente ñeepẽã ñynõĩjy.

²⁰ Heta'ẽ haire mbytepe heiva: Marã'ĩrãra pyhendushu? Kova kuimbai mbaiposhy ĩmere, hareka kuakuaã'i.

²¹ Tẽvã ĩrũre heijyve: Mba'ety rãnga mbaiposhy ĩmerea kyrã ijeta verã. Mbaiposhy ĩmereara mynguerã rãngapo pente heshambava kũvãĩpia?

Judiore juhuvisha mbijiche reta Jesús

²² Ro'ymba'i Jesús oho Jerusalenperã, haipe mby'arete ñynoĩ manduahe reta tũpao me'ẽãjyshurã vekua Tũpa.

²³ Jesús haipe vata i tũpao juri, õche Salomon he'iashua õĩpi.

²⁴ Haipe Judiore opajerehe, hãrã pyrãndushu reta: Mbaipeverapo kyrã yryre kuaa kavimba mbavara nde? Nde hai Cristorã mbeu kavi ore.

²⁵ Jesús heishu reta: Ãmbeuma rãngape, tẽvã shyrojãpi. Opa mbaikavi heshaha verã she ajapo Sheru ñymbaikatu rupii, hãrã hokava rupii shy kuaaha mbavara she.

²⁶ Tẽvã pee shyrojãã, shara ha'ẽãpe shy'avishare.

²⁷ Shy'avishare kuaa shiñee, hareka she aikuaashu reta, hãrã haire ou shaykue.

²⁸ She ameẽshu reta tykove opamba verã; hareka mapeãpo manokui, hareka mbavẽãpo heky ipoivi.

²⁹ Sheru ñymbaikatuveva, meẽshe hoka avishare, hãrã mba'ety yngare hekyshi verã ipoivi.

³⁰ Teru hareka She, penteĩ'õĩhã.

³¹ Haipe Judiore hykuaãĩ opa hekyjy reta ita japi verãre Jesús.

³² Tẽvã Jesús heishu reta: Heta mbaikavi ajapo pynynonde Sheru ñymbaikatu rupii. Marãvãĩte rehera pota itape shukapi?

³³ Haire heishu: Ndukahããpo itape mbaikavi rijapo vekua rehe, Tũpa porãã rijetaherã reheĩ rãnga. Kuimba'ẽĩ rãnga nde, tẽvã rijijapori Tũpa rãĩmi.

³⁴ Haipe Jesús heishu reta: Ñee mbyparahava pyndykuatiape'ẽ Tũpa heirã vekua: Pee rãnga hai Tũpare!

³⁵ Jaikuaa kavi rãnga mbyparahava, katumba mbairã ñambijicheva; Tũpa rãnga mbyhee tũpare, opaite ĩñee pysy vekuare.

³⁶ Tũpa shypyhỹrõ hãrã shymbou yvy'ĩãrẽ: Hãmera marã'ĩrã pere, she aijeta porãmbahea, Tũpa Tay she hairãme?

³⁷ Ajapoã maĩnunga Sheru japovarã, avy shyrojapi.

³⁸ Tẽvã ajaporã, ajema shyrojambatẽpiva, pyroja ajapovare, pikuaa kavi verã Sheru hareka she pentevãĩ orerã.

³⁹ Hykuãĩ pota pysyjyrejy, tẽvã Jesús õhẽshi reta haire pãũvi.

⁴⁰ Haivi Jesús ohojy yy syryva Jordan hyvaisho kyty hãrã haipe pyta, Juan Bautista pyrỹmyngarai'i vekuape.

⁴¹ Heta kuaretare oho hai ẽvãpe, hãma hei reta: Juan mapeã mbaikavi heshaha verã japo, tẽvã ãñetemba heihe vekua ko kuimbai.

⁴² Hãrã heta kuaretare haipe ẽvã roja reta Jesús.