Juan 1 - NandevaBiblia

Tũpa ĩñee, meẽ tykove opambava

¹ Jypyiterãvãĩmba ẽẽ Ñee, hareka hokava Ñee ẽẽ hãndi Tũpa, hãrã hokava Ñee hai Tũpa.

² Jypyiterãvaĩmba Tũpa ẽẽ hãndi kova Ñee.

³ Hai rupii opava maĩnunga japoha, hãrã mba'ety hai rupimba japohava.

⁴ Haimba ẽẽhe tykove, hãrã hokava tykove hai kuaretare jysapeka.

⁵ Hãrã hoka hendyva sape timimbivape, hãrã timimbiva katuãã mbove.

⁶ Ĩmemba'ẽ arykai pente kuimbai Tũpa mbouva, Juan he'iashuva.

⁷ Hãrã hokava ou kuaa kaviveva, mbeushu verã kuaretare kova mbai sapeva ryheva, pota opavare jyrojaherã.

⁸ Juan ha'ẽãmba mbai sapeva; koñeĩ mbeu kavive verã ko sapeva ryheva.

⁹ Hãrã ko sapeva añeteĩteva, oumba ko yvy'ĩãrẽ sapehe verã kuaretare.

¹⁰ Hokava Ñee ẽẽñoĩmba ko yvy'ĩãrẽ, ajemaĩ Tũpa japoteã ko yvy hokava Ñee rupii, tẽvã kuaretare mba'ẽã kuaaseshi reta.

¹¹ Hentapetei ou, tẽvã henta ĩrũre myvãhẽãshu.

¹² Tẽvã opaite myvãhẽshuva hareka jyrojahevare; ikoshi reta Tũpa tayre.

¹³ Ha'eã turuvy hareka tyroo potava rupii oavare; ha'eãvãĩjy kuareta potava rupii, Tũpaivi oava reta rãnga hai.

¹⁴ Hãma hokava Ñee ikoshi kuareta, hareka iko'i ñanymbyteipi, tynyhẽ jyhaihukue hareka añeteva. Ore heshaha hĩmbipekue, hãrã hokava hĩmbipeva hai Tyray ña'ãpova, Teru meẽshuva tay penteĩ'ia.

¹⁵ Juan ijetaherã hei: “Kova rãnga hai kueve aijetaheperã haiheva shaykue ouva hai mbaivasuve shyheviva, shara ẽẽmaĩmba hai arykai ndei aarã”.

¹⁶ Hai jyhaihukue tynyhẽ rupii, opaiteva heta hipityka mbaikavikue.

¹⁷ Shara Tũpa meẽ ñee mbyparahava Moisés rupii, tẽvã jyhaihukue hareka mbai añeteva vãhẽ Jesucristo rupii.

¹⁸ Mba'ety heshava Tũpa; tẽvã Tay penteĩ'ia Tuu hãndi ẽvã, opa mbeu ñande marãvara hai.

Juan Bautista mbeu mbavara Cristo

¹⁹ Kova hai Juan mbeuva, Judiore juhuvisha Jerusalenpe'õre mondo pai ruvishare hareka Levitare hai ẽvãperã, pyrãndushu verãre haira mbava jyve.

²⁰ Haipe Juan mbeu kavi hareka ñomiãã: She ha'ẽã Cristo!

²¹ Haipe pyrãndujyshu reta: Mbavara nde? Ndera hai Tũpa ĩñee mbeu'ia Elías? Juan hei: Ha'ẽã rãnga she. Hykuaĩ pyrãndujyshu reta: Akuarã, ndera hai Tũpa ĩñee mbeu'ia hãrõha'õva? Hai hei: Mba'ety.

²² Haipema heishu reta: Akuarã, mbaveitera nde? Mbe'uhashu verã jyve yrỹmbouvare. Mbeu ore, mbavaitera nde?

²³ Juan heishu reta: She rãnga hai sapuke'ia yvy ikoambaipi: “Pymyhẽvãshu tape symyĩ ohova Ñandeja pevarã”, Tũpa ĩñee mbeu'ia Isaias heiva rãĩmi.

²⁴ Juan oho ijeta hãndivare hai fariseore jokueva.

²⁵ Hãrã heishu reta: Akuarã, marã'ĩrãra rypyrỹmyngarai ha'ẽã nde Cristo, Elías, maĩrã Tũpa ĩñee mbeu'iarãme?

²⁶ Juan heishu reta: Yypeĩ, she apyrỹmyngarai; tẽvã pynymbytepe ĩme'ẽ pente pikuaambava.

²⁷ Hokava hai shaykue ouva, tẽvã mbaivasuve shyhevi. Jypasa ĩshaĩmba ẽshea ajorashu verã.

²⁸ Opaite kova mbai iko tenta Betaniape, ysyryva Jordan hyvaisho kyty, Juan pyrỹmyngarai'i vekuape.

Jesús hai Tũpa Avisha Ray

²⁹ Pareemajyrã, Juan hesha Jesús vãhẽ ou hai ẽvãperã hei: Pymãĩhe, kova hai Tũpa Avisha Ray, opa hekyva kuareta retaivi mbai porãmba vekua!

³⁰ Kovare rãnga aijetarã hai aihe kueve: “Shaykue ou pente kuimbai mbaivasuve shyheviva; ẽẽmaĩmba hai arykai ndei aarã”.

³¹ She aikuaa kaviã jyve mbavara, tẽvã she ai apyrỹmyngarai yype israelitavare kuaa verã mbavara hai.

³² Juan heijy: She rãnga ahesha pykasu rãĩmi vate araivi Espiritu Santo vejyherã.

³³ She aikuãã jyve mbavara hai; tẽvã shymbou vekua apyrỹmyngarai verã yype heishe: “Ryheshama pente kuimbai vejyhe Espiriturã, hokava hai pyrỹmyngaraiva Espiritu Santopy”.

³⁴ She aheshama, hãrã ambeu jyve haiñõĩva Tũpa Tay.

Jesús tynonde mboireare

³⁵ Pareemajyrã, hykuaĩ Juan ẽẽjy hãndi mokue mboireare.

³⁶ Heshama Jesús haipi hasa ohorã, Juan hei: “Pymãĩhe, hokava hai Tũpa Avisha Ray!”

³⁷ Hãrã kova mbo'ehareare mokue'ia henduma Juan heivarã, jyraha hipii Jesús.

³⁸ Haipe Jesús mãĩ haykuerã hesha ouhipia retarã pyrãndushu: Mbaivara pyhekapi? Haire hei: Rabi (he'iseva Pyrỹmboi'ia) mapera rikori?

³⁹ Jesús heishu reta: Pei pymaĩhe. Jyraha hãndi retarã hesha mapera iko'i, haipe pyta jyve hãndi reta hoka arape; shara ka'aru ora urũndyheama oho'iherã.

⁴⁰ Penteva hendu vekua Juan hareka ohova Jesús haykue, hai Andres, Simón Pedro ñymoña hãndia.

⁴¹ Andres tynonde japova hai oho heka tichey Simón; hesharã heishu: Vãhẽã rãngashuje Mesias! (He'iseva Cristo).

⁴² Haivi Andres raha Simón Jesús ẽvãpe. Jesús maĩherã heishu: Nde hai Simón, Jonas tay, tẽvã ã'ẽ nymbyheapo Cefas, he'iseva ita (Pedro).

Jesús hẽno Felipe hareka Natanael

⁴³ Pareemajyrã, Jesús hei ohojy verã Galilea kyty. Haipe hesha Felipe hãrã heishu: Ei shipive.

⁴⁴ Felipe hai Betsaidape'õ, Pedro hareka Andres iko'iape.

⁴⁵ Haivi Felipe oho heka Natanael, heshamarã heishu: Vãhẽha rãngashu kuimbai, Moisés mbyparahe vekua hareka Tũpa ĩñee mbeu'iare, hokava hai Jesús, José tay Nazaretpe'õ.

⁴⁶ Natanael hei: Katura Nazaretvi õhẽ mbai haikaviva? Felipe heishu: Ei mãĩhese.

⁴⁷ Jesús hesha Natanael vãhẽ ourã hei: Kõõ ou pente Judio añeteĩteva, japumbava.

⁴⁸ Natanael pyrãndushu Jesús: Marãĩra shykuaa? Jesús heishu: Felipe ndei oho mbeunderãvãĩ rãnga aryreshaje, yvyra igo ipe ryvapyrirã.

⁴⁹ Natanael heishu: Pyrỹmboi'ia, nde rãnga hai Tũpa Tay, nde hai Israel Juhuvishavasu.

⁵⁰ Jesús heishu: Aryreshaje igo ipe ryvapyrirã hainderãmeĩra, shyroja? Ryheshave rãngateripo kovaivi mbai vasuveva.

⁵¹ Jesús heijyshu reta: Ãñeteĩte hai pee, pyheshapokui ara vate'õ jypearã hareka Tũpa jokuevare jupi hareka vejy ñynoĩ'ĩãrẽrã ko kuareta Tay.