Hechos 9 - NandevaBiblia

Saulo Jesús jyrojaherã vẽkua

¹ Saulo potañoĩ opa juka Ñandeja mboireare. Hãrã oho pai juhuvisha'õpe,

² jurureshu kuatia oho verã Judiore ñymbatyseape Damascope, potañoi vãheshu raha mbyperesoka verã Jerusalenpe opaite õiva Pe py'ahuvape kuimbai hareka taupeivive.

³ Haipe vãhẽserima oho tenta Damascoperã, mondii ou juri pente sapeva araivi.

⁴ Saulo oa yvyperã hendu pente ñee heiva: “Saulo, Saulo marã'irãra shymoñari?”

⁵ Saulo hei: “Mbavara nde, Karai?” Ñee vateivi ouva heishu: “She hai Jesús, nde rymoña ryreva.

⁶ Pu'ã hareka iche tentape, haipepo mbe'uandekui rijapo verã”.

⁷ Kuimbaire oho hãndivare opa omyã reta, hareka ijetã kyje retarã, tẽvã mba'eã hesha reta.

⁸ Saulo puãrã hareka sarekote'irã mba'ẽã hesha; hãrã shambekyĩ raha reta Damascope.

⁹ Haipe'ẽ Saulo mbahapy ara katumba heshava kuvãĩpi hareka karumba, yyimba houva.

¹⁰ Damascope ĩme'ẽ pente mbo'eharea Ananías he'iashua. Hesape'ou Tũpa heishurã: Ananías! Hai hei: “Kope ãĩme'ãĩ Sheja”.

¹¹ Ñandeja heishu: Pũ'ã hareka ekua vataha'õĩpi Ndakata kyty he'iashua hãrã hekakui Judas hentape pente kuimbai Saulo he'iashua tenta Tarsope'ia haipe ñymboi'ẽ,

¹² hareka hesape'ouva hesha pente kuimbai Ananías he'iashua, iche hareka ipo ñonohẽrã heshajy verã.

¹³ Hãrã Ananías hei: Karai, heta mbai ahenduhe kova kuimbai, hareka heta mbai porãmbava japo'iheva heko kyamba Jerusalenpe.

¹⁴ Hãma ã'ẽ vãhẽ ou kope pai juhuvishare kyrã heishurã, raha mbyperesoka verã opaite ndyree heno'iare.

¹⁵ Tẽvã Ñandeja hei: Ekua, shara apyhỹrõma hokava kuimbai ijeta shyrehe verã opaite yngava tenta retaipi'õ, huvisha vasure hareka jyve israelitare.

¹⁶ She ambyheshakapo heta hasa'asy verã shyreepe jyrojarã.

¹⁷ Ananías oho iche oo Saulo ẽvãpe, ipo ñonohẽrã heishu: Shyryvy Saulo, Ñandeja Jesús ijeshakandeje Damascope reirã. Hai shymbou kope ai verã, ryheshajy verã hareka nytynyhe verã Espiritu Santo.

¹⁸ Haiperaveĩ Saulo hesare oashi pira pire rãĩmivarã hãrã heshajy kũvãĩpi. Hãrã puãrã myngaraiha.

¹⁹ Haivi õñepyrõ karu pyrãtajy verã. Saulo mbovy ara pytajy hãndi mbo'ehareare Damascope.

Saulo ñimiñee Damascope

²⁰ Saulo õñepyrõ ravi mbeu Judiore ñymbatyseape, hei Jesús haiva Tũpa tay.

²¹ Opaite henduvare mbyrymaĩrã heijyre: Ha'eãra kuepi Jerusalenpe, pota mby'oparea Jesús hee heno'iare? Ha'eãra kuepi haiteiva kope ourã pysykarã, raha mẽ'ẽkava pai juhuvisha retape?

²² Tẽvã Saulo ñymypyrãta jyvyĩ ijeta Espiritu Santo ñymbai katupy mbeu Jesús haiva Mesia, tẽvã Judiore Damascope'õre kuaakaviã reta.

Saulo ñemishi Judiore

²³ Heta arama hasarã, Judiore pente ñeepe ñynoĩ juka verãre Saulo,

²⁴ tẽvã Pablo hendu pota japojyreheva. Arape hareka pynturã hãrõ reta kuaretare hokava tenta hõchepe juka verãre.

²⁵ Hãrã mbo'ehareare pynturã kanata vasupy ñono retarã, mbyvejy hokava tenta mangorapya õĩvi.

Saulo Jerusalenpe ẽẽ

²⁶ Vãhẽma Jerusalenperã, Jesús mboireare potate ñymbaty hãndivare, tẽvã opaĩ kyjeshi reta shara moãte ha'eã jyveshu mbo'earearã.

²⁷ Tẽvã Bernabé pysyrã hareka raha apostolre õpe. Haipe mbeushu reta mãrãra Saulo hesha Ñanderu Jesús pehupi Damascope hareka mãrãra ijetashu. Mbeujyve mãrãra Saulo Damascope kyjembape mbeu Ñandeja Jesús heepe.

²⁸ Kyrã Saulo pyta Jerusalenpe; Jesús ryhevare hãndi õhẽ hareka kyjeã ijetahe Ñandeja Jesús heepe.

²⁹ Haipe ijeta hareka hei ñynoĩ ijupii reta Judiore hãndi griego ĩñeepe ijetavare tẽvã haire õñepyrõ hei reta juka verã.

³⁰ Hãma pente'ovare Jesús jyrojaheare kuaama retarã, raha reta Cesareape haivi mondo tenta Tarsope.

³¹ Hãrã opaite tũpao Judeape'õre, Galilea hareka Samaria, reko reta pyavapy hareka ñymypyrãta jyrojakuepe. Ñandeja kyjeshiape iko reta, hareka Espiritu Santo mboryshu retarã ñymbyhetave jyraha.

Eneas kuerarã vẽkua

³² Pedro, opa rupi pohyse'iva, oho mãĩjyvehe heko kyambare Lidape iko'iare.

³³ Haipe vãhẽshu pente kuimbai Eneas he'iashua, japoma 8 ãño hupape'iva, vatajymbava.

³⁴ Pedro heishu: Eneas, Jesucristo nymynguera. Pũ'ã hareka ñono kavi ndurupa. Eneas haiperaveĩ pũã.

³⁵ Opaite Lidia hareka Saronpe'õre, hesha pũãjyrã hareka opa roja jyve reta Ñanderu Jesús.

Dorcas kuerajyrã vẽkua

³⁶ Hãrã ĩmemba'ẽ Jopepe pente mbo'eharea Tabita he'iashua, he'iseva griego ĩñeepe Dorcas. Kova taupe hykovepe heta mbai haikaviva japo hareka mbaimba ĩmereva mboryva.

³⁷ Hãrã iko hokava arape oa ñymbairasyrã hareka mano. Hetekue, opama johearã rahaha ñonoha ipe oo vate'õ.

³⁸ Katynga Lida mbyryã'ẽshi Joperã, Jesús mboireare kuaama Pedro haipe'ẽrã mokue kuimbai mondo reta heishu verãre: Narẽ'ãĩte ei Jopepe.

³⁹ Hãma Pedro pũãrã, oho hãndi reta. Haipe vãhẽmarã, raha reta Tabita hetekue ẽvãpe hareka opaite ĩme manoshiare haipe ẽẽjyve, jaheo ñynoĩ hareka mbyheshaka mondeava hareka jaso'iavare Dorcas imeteri'irã japo vekua.

⁴⁰ Pedro heishu kuaretare opa õhẽ verãre katoape. Haivi ĩñesu hareka ñymboi. Haivi mãi mano vekuarerã hei: Tabita, pũ'ã! Hai sarekorã hareka heshamã Pedrorã, vapy.

⁴¹ Pedro mbyhasashu ipo mũpũã verã, haivi hẽno heko kyambare hareka ĩme manoshiare, hãrã heshaka Tabita kuerajymava.

⁴² Kova opa kuaaha Jopepe hamemba heta'ẽ jyrojaheva Ñandeja.

⁴³ Haipe Pedro pyta heta ara hokava tentape, Simón he'iashua hentape; mymba pirere mba'apova.