Hechos 7 - NandevaBiblia

Esteban ndei jukaharã hei vekua

¹ Hãrã Pai juhuvisha vasu pyrãndushu Esteban: Ãñetera kyrã hei ndyreheva rãĩmi?

² Esteban hei: Shyryvyre hareka terure, shyrẽndupi: Ñanu Tũpa hĩmbipeva ijeshakambashu arykai ñanderu Abraham Mesopotamiape, ndei oho iko Haranperã,

³ heishu: “Heja ndy'yvy hareka opaite nyrẽntarãre, haivi ekua yvy she aheshakande verãpe”.

⁴ Hãrã Abraham õhẽ tenta Caldeovi hareka oho iko Haranpe. Haivi tuu manomarã, Tũpa rahashu reta hoka yvy ã'ẽpeve pikopẽĩpy.

⁵ Tẽvã mba'ety mbaiva meẽshuva kope, ipy pente ñono verãpemba ẽvã, tẽvã heimba arykai meẽñoĩshu verã ña'ãporã, hareka hai manomarã ñymoña hãndiare pytashu verã, ajema Abraham mba'etyre tay.

⁶ Tũpa heimbajyshu: Rĩmoña hãndiare tenta mbyryva ikova rãĩmi iko jyrekui, jokuehareiire verã, hareka 400 ãño kavipo jyvarehahe retakui.

⁷ Tũpa heivejy: “She ajahepohekui tenta pyrokuereii'ia, hareka haire õhẽma haivirã shemombaipo retakui kope”.

⁸ Hãrã Tũpa ẽẽ hãndi pente ñeevapeĩ Abraham, hãrã meẽshu pire chĩchiava akua ñee me'ẽãva mãndu'ahe verã. Hãrã Abraham tay Isaac oamarã 8 arape piremi chĩchĩshi, hareka Isaak kyrãmi japo jyvehe tay Jacob, haivi Jacob kyrã japo jyvehe tayre 12 reva.

⁹ Hãrã Jacob tayre, heshatã rupii õvẽnde reta tyvy José hareka rahaha verã yvy Egiptope. Tẽvã Tũpa ẽẽ hãndi José,

¹⁰ hareka nohẽshu opa mbai ojepy'apyvaivi. Meeshu ãrãndu hareka mburuvisha vasu ikoshi verã pente kuimbai mbyvya verã Faraón Egiptope'õ, hãrã mburuvisha vasu ñonoshu José mburuvisharã Egiptope hareka oo vasu ña'ãpova opa heja ipope.

¹¹ Hãrã vãhẽ ara ñymbahy hareka jyhasa asy vasu opaite yvy Egiptope hareka jyve Canaanpe, haivi ñanderure kuaaveãma mãĩvirapo vãheshu hou verãre.

¹² Tẽvã Jacob kuaama Egiptope ĩme'ẽ trigorã, tayre mondo haipe, hokava hai ñanderure tynondeite ohovare.

¹³ Mokue jyrahaheaperã, José jykuaakashu ticheyre, haiperãma mburuvisha Faraón kuaa kavi marãva retara José ñymoña hãndiare.

¹⁴ Hãrã José mondo veruka tuu Jacob hareka opaite ñymoña hãndiare, 75 ñynoĩva kuaretare.

¹⁵ Kyrã jehurã Jacob oho iko yvy Egiptope, haipe mano hareka jyve opaite tynonde vekuare.

¹⁶ Haivi hetekue rahaha Sikempe hareka haipe ñotyha, haimba arykai Abraham hepyre ovashi vekua Hamor tay retaivi Siquempe.

¹⁷ Hãrã Tũpa heiva iko serima Abraham ñee me'ẽãshu vekuarã, Abraham ñymoña hãndiare ñymbyheta tenta Egiptope.

¹⁸ Hãrã Egiptope õñepyrõ yngava mburuvisha vasu vapyjy, kuambashuva José.

¹⁹ Hokava mburuvisha mbytavy'i opaite ñande jaikova hareka heta reko asyshu ñanytynondevare, haivi opamba jukaka sanjay oarããvamire potavẽãma ñymbyhetarã.

²⁰ Hokava arape Moisés oamba arykai. Hai pente sanjay mbyhoryshuva Tũpa hareka mbahapy jasy kavi tuure ñyngarekohe hentape.

²¹ Haivi heja retarã, mburuvisha vasu tajyteiva raharã mẽmby rãĩmi ñyngarekohe.

²² Hãrã Egiptope'õre mbo'eshu reta Moisés ñy'ãrãndu rehe hãrã ĩmere mbaikatu heiva hareka japovape.

²³ Haivi 40 ãño mbotyrã, Moisés pota hesha tyvyre Israelitavare.

²⁴ Haipe hesha pente Egiptova jyvareiterehe hai henta ĩrũkuemirã, hepyrã, juka hoka egipciova.

²⁵ Shara hai mõãte tyvy israelitare Tũpa hejareiishu verãre hai rupii; tẽvã haire kuãã hareka ñanduã.

²⁶ Pareejyrã, Moisés hesha mokue Israelitava ñyrãrõ ñynoĩrã, hareka pota jocharerã hei: Pee rãnga pente'ovare, mãrã'ĩrãra pindijupii pirãrõpẽĩ?

²⁷ Hãrã penteva hapisha pota nũpareva mañashu Moisés hãrã hei: Mbavara niñono ururuvisharã hareka rĩngareko yryrehe verã?

²⁸ Potarã ã'ẽ shijukarẽi jyve, ka'ãme pente egipsiova rijukava rãĩmi?

²⁹ Hokava Moisés hendurã ñemi hareka oho yvy Madianpe. Haipe iko tenta yngaivi ohova rãĩmi hareka mokue hĩnjapo haipe ĩmere.

³⁰ Hasama 40 ãño yvy ikoambape Sinai he'iashua yvyturusu hyvache, pente Tũpa jokueva ijeshakashu Moisés yvyrare tata hendy'õ rãĩmi.

³¹ Moisés mbyrymaĩ heshava rehe, hãrã ñymbojavehe heshakavi verãrã, hendu Ñandeja ĩñee heishurã:

³² “She hai nytynondevare ñu Tũpa, Abraham ñu Tũpa, Isaak hareka jyve Jacob” Moisés õñepyrõ opa ryry kyjerã, hareka ẽẽãshu maĩhe verã.

³³ Hãrã Ñandeja heishu: “Nohẽ ndypasa, shara rypyrõ rẽĩvape hai yvy kyambava.

³⁴ She ahesha mãrãra hasa'asy ñynoĩ shyryhevare Egiptope, ahendu pya porãã ñynoĩrã hãrã avejy apoikashi verãre. Eii, ã'ẽ arỹmondojypo Egiptope”.

³⁵ Ajemaĩ haire japoãshu Moisés heiva, hãrã heishu reta: “Mbavara niñono rĩngareko yryrehe verã hareka mburuvisharã?”, Tũpa mboushu mburuvisharã hareka mbaivape hejareii verã, Tũpa jokueva rupii yvyra õpe ijeshakashurã.

³⁶ Moisés haimba arykai ñanytynondevare nohẽ vekua, hareka japo mbai heshaha verã, ko yvy'ĩãrẽ iko verã, yyvasu Pyntava hareka yvy ikoambaipi 40 ãño.

³⁷ Moisés teiva heimbashu arykai Israelita ñymoñashiare: “Tũpa mboupokui tyvyre mbytepe pente ñimiñee'ia, she shymbouhava rãĩmi”.

³⁸ Ha'ẽĩ rãnga jyve Moisés iko jyre hãndi kuaretare yvy ikoambaipi, hareka Tũpa jokueva ijeta hãndiva yvyturusu Sinaipe, hãndijy ñanytynondevare hareka hai me'ẽãshu ñee tykove meẽva myvãhẽ ñande verã.

³⁹ Tẽvã ñanytynondevare japoseãshu hai heiva, koñeĩ mbijiche reta hareka pota jyrahajy Egiptope.

⁴⁰ Hãrã heimbashu reta Aarón: “Ore rãnga pota rijapo pente Tũpa ỹrynonde oho verã; shara kuaahãã mãrãra'i Moisés hãrã opa yrynohẽ yvy Egiptoivi”.

⁴¹ Harã japo reta pente toro ray hã'ãnga, mymba juka reta meẽshu verãre hokava Tũpa hareka vy'a jyre ipopẽĩ kyrã japo retarã.

⁴² Hãrã Tũpa syryshi hai reta hareka ma'ẽĩhe õmombaishu reta jasytatare ara vate'õ. Shara Tũpa ĩñee mbeu'iare hei vekua mbyparaha vekuape kyrã ẽẽ: Mbaipera pẽẽ, kuareta israelitavare; pijuka mymbarã pymeẽshe 40 ãño yvy ikoambaipi pikorãme?

⁴³ Mba'ety, kyrãtẽ verã pyraha tũpaope Tũpa Moloc, hareka jasytata Tũpa Renfan, ta'ãngare peii pijapova pemombaishu verã. Hãrã hokava rehe apyrỹnohẽpo pynyrẽtaivi hareka apyrỹmondopo Babilonia ĩãrẽve.

⁴⁴ Ñanytynondevare yvy ikoambaipi jyrerã ĩmembare tavernakulo, haipe nãtu reta yvyra japoashia Tũpa meẽshuva Moisés, ñee mbyparahava japoha verã, heshahakashuva rãĩmi.

⁴⁵ Ñanytynondevare me'ẽãmbashu reta arykai ko tũpao hareka Josue ou hãndia reta verumba jyve yngava yvype'õre ndei heky retarã, Tũpa mõheshu reta hai hỹnondeivi. Haipe pyta reta David ara ikovapeve.

⁴⁶ Tũpa haihushu hokava mburuvisha David, hãrã pota mupuã arykai tũpao õmombaishu verã reta Jacob ñu Tũpa,

⁴⁷ tẽvã Salomon haimba mupũã arykai.

⁴⁸ Katynga ha'ẽã Tũpa iko'iva hoka tũpao kuaretare japovape. Tũpa ĩñee mbeu'ia heiva rãĩmi:

⁴⁹ Ara vate'õ hai avapy ãĩvape, hareka yvy hai shepy ãñono ãĩvape. Mãrãva oora rijapoposhekui? Ñandeja hei, maĩrã maperapo ẽẽ aputuu verãpe?

⁵⁰ Ajapoãra opa mbai sheii shepope?

⁵¹ Tẽvã pee, heishu reta Esteban: Pyndypya tãnta ñoĩva, papysa hareka pyndypya Tũpa kuambava rãĩmi pyre. Espiritu Santo piñymbyvaisho ñoĩpihe.

⁵² Mbava Tũpa ĩñee mbeu'ia retara reko asyãshu arykai pynytynondeva reta? Haire opa juka, arykaivaĩ ijeta jyrehe heko kaviva ou verãre hareka ã'ẽ oumarã, pee pymbytavyshu hareka pijukashu.

⁵³ Pee rãnga me'ẽhãpe ñee mbyparahava Tũpa ña'ãpova, hai jokuevare rupii, tẽvã pijapoãshu ĩñee.

Esteban jukaharã vekua

⁵⁴ Hãrã kova mbai hendu retarã, poshy jyre hareka hãĩ opa mbi'ipu reta.

⁵⁵ Tẽvã Esteban, tynyhẽ Espiritu Santorã, mãĩ vate arapy hãrã hesha Tũpa hĩmbipekue, hareka Jesús ñymboy'ẽ Tũpa jakata kytyrã.

⁵⁶ Hãrã hei: Ahesha vate arapy jypearã hareka kuareta Tay rãĩmi ou vekua ñymboy'ẽ Tũpa jakata kytyrã.

⁵⁷ Tẽvã jasaka ñynoĩheva japysa mboty reta hareka opa hỹnatu sapukerã opa ou ĩãrẽ reta Esteban.

⁵⁸ Haivi nohẽshu reta hoka tentaivi hareka japi reta itape, hãrã opaite heshavare kova hejashu reta monde vekua Saulo he'iashuva.

⁵⁹ Hãrã japiteri ñynoĩ itaperã, Esteban jururerã hei: Sheja Jesús, ndepope añono shyrykove.

⁶⁰ Haivi ĩñesurã hỹnatu sapuke: Sheja, avy ityhe reta mbai porãmbava. Hãrã kova opama heirã, mano.