Hechos 6 - NandevaBiblia

Pyrỹmbory vẽrã 7 pyhyrõha

¹ Hokava arape ñymbyhetave oho Jesús mboireare, opaite ijetava griego ĩñeepe õñepyrõ ijeta porããhe reta hebreo ĩñeepe ijetavare, hei reta ñyngarekoha kaviãhe opaite taupere hai ryheva retarã, ĩme manoshiare, hou verãre mẽ'ẽhavape.

² Hãrã opaite 12 Apostolre opa mbatyka Jesús mboirea retarã heishu: Porãã ore hejaha verã Tũpa ĩñee mbe'uha ia karu verãpe ñyngarekoha'ihe verã.

³ Hãrã shyryvyre, pyheka pynymbyteivi 7 kuimbai pyrojava, tynyheva Espiritu Santo hareka ñy'arãnduva, ñañonopokui ipope hokava haire japo verã.

⁴ Kyrã ore jururehapo hareka pyrymbo'ehateripohe Tũpa ĩñee.

⁵ Hãrã opaite haipe ñymbatyvare haikavishu reta he'iava rãĩmi, haivi ñono reta Esteban, kuimbai tynyheva jyrojakue hareka Espiritu Santo, Felipe, Procopo, Nicanor, Timoteo, Parmenas, Nicolas Antioquiape'õ jyrojahe vekua Judiore ohoheva.

⁶ Haivi veru reta Apostolre ẽvãpe, hãmã haire ñymboishu Tũpa, hãrã ipore ñaka ĩãrẽ ñono.

⁷ Tũpa ĩñee mbe'uha jyvyĩ rahaha hareka ñymbyhetave Jerusalenpe Ñandeja Jesús mboireare, hareka heta paire jyrojaheva jyve.

Esteban pysyharã vẽkua

⁸ Esteban, Tũpa mynyheshu mbaikatu hareka maĩkavihe, hai rupii japo opa mbai kavi heshaha verã hareka mbai heshaha verã opaite kuaretare mbytepe.

⁹ Hãrã puã reta kuimbaire sinagoga he'iashua Libertospe'õ hareka Cirene, Alejandria, Cilicia hareka Asiape'õre hãndi, haivi õñepyrõ ijeta pohyshu reta Esteban,

¹⁰ tẽvã jepyãhe reta, shara ãrãndu ryheve ijeta Espiritu Santo meẽshuvapy.

¹¹ Haipe meẽshu reta kyrypoti a'ãmore heihe verã Esteban jahe'ihea Moisés hareka Tũpa.

¹² Kyrãpypei opa mbi'ikorai kuaretare, kuakuavare hareka jyve Moisés mbypara vekua pyrỹmboi'iheare; hãrã opa ou ĩãrẽrã, pysyshu retarã raha reta Judio mburuvisha vasu ñymbaty'õpe.

¹³ Haipe veru reta kuareta mba'etyva mbeu verã: Ko kuimbai poiã ijeta porããhe tũpao kyambava hareka Moisés mbypara vekua.

¹⁴ Ore henduha heirã Jesús Nazareno opa mambai verã ko tũpao hareka yngava ñonojy verã jaikova rãĩmi Moisés heja ñande vekua.

¹⁵ Hãrã opaite mburuvisha ñymbaty'õpe vapy ovare maĩhe Esteban, hareka hesha reta hova, pente Tũpa jokueva hova rãĩmi.