Hechos 5 - NandevaBiblia

Ananías hareka Safíra

¹ Pente kuimbai Ananías he'iashua hãndi hyreko Safira ovende reta jy'yvy.

² Ko kuareta, hepykue ñemihapeĩ heky hai ña'ãporã, hãrã hemby vekuaĩma veru reta hareka meẽshu Apostolre hareka hyreko kuajyve.

³ Hãma Pedro heishu: Ananías, marã'ĩrãra Satanas iche ndypyape ndapushu verã Espiritu Santo hãrã rỹmanãrõhe verã ndy'yvy hepykueivi?

⁴ Ha'ẽãramba yvy nde ña'ãpova? Hãrã rymbyhepymarã ha'ẽãrajy hepykue ndykyrypoti? Marã'ĩrãra hokava riñono ndypyape? Tũpape rãnga ndapu ha'ẽã kuareta retape.

⁵ Ananías kova hendumarã oa mano, hãrã hokava kuavare kyjeite reta.

⁶ Hãrã kunumire jyveru hetekue ñoma retarã raha ñoty reta.

⁷ Haivima mbahapy oraheaipi iche jyve Ananías hyreko kuamba ryheve mbaivara jehu.

⁸ Pedro pyrãndushu: Mbeushe, pymbyhepyramba yvy hepyre pee pereva rãĩmi? Taupe hei: Ẽẽ hai hepyre.

⁹ Haipe Pedro heishu: Marã'irãra penteva ñeepe piñiñono pindijapushu verã Ñandeja je Espiritu? Hokapema vãhẽjy jyveru neme hetekue raha ñotyvare, hãrã haire ã'ẽ ndyrahapo jyve niñoty verã.

¹⁰ Haiperaveĩ Safira oa mano jyve Pedro hỹnonde, hãrã ichejy kunumire heshama reta manorã, nohẽ rahajy reta ñoty verãre ĩme jichere.

¹¹ Opaiteva hokava tũpaope'ẽvãre, kova kuavare opa kyje reta.

Apostolre heta mynguera kuaretare

¹² Heta mbai heshaha verã hareka mbai kavi heshaha verã iko Apostolre rupii kuaretare mbytepe hareka opaite jaty reta Salomon hõchepe pente ñeepe.

¹³ Mbavẽã ynga retava kyrẽy jihia tẽvã ijeta kavihe reta.

¹⁴ Ñymbyhetave oho Ñandeja jyrojahevare, taupe hareka kuimbaire.

¹⁵ Kyrã, kuaretare opaite nohẽ reta ñymbairasyva hupare ryheve hareka miñenohasepya Pedro hasamarã, ñykuarãsy'ãĩ vejy ĩãrẽ verã a'ãmore.

¹⁶ Hareka tenta mbymbyrymba õĩva ou jyve kuareta hetava Jerusalenpe veruva ñymbairasyva hareka mbaiposhy imereva, hãrã opaiteva kuera.

Pedro hareka Juan oñemoĩhahe reta

¹⁷ Hãrã pai juhuvisha vasu hareka Saduseore ẽẽ hãndiva haipe opa heshatã'ãkue tynyhe reta.

¹⁸ Hãrã pysy reta apostolre, mbyperesoka verã.

¹⁹ Tẽvã pente Ñandeja jokueva, pynturã pea pyrỹmbyperesohaseape hõche, hãrã nohẽjyrã heishu reta:

²⁰ Pekua hareka pimbou tũpaope hareka pymbeushu kuaretare ko ñee tykove ryheva.

²¹ Kova hendurã ko'ẽĩ iche reta tũpaope pyrỹmboi verãre. Haipevãĩ pai juhuvishare hareka ẽẽ hãndiare, mbaty reta Judio juhuvishare ñymbatyhaseape opaite kuakuavare Israelpe'õre hãndi, haivi mondo veruka reta Apostolre pyrymbyperesohaseaivi.

²² Tẽvã vãhema jyra jokuehava retarã tẽvã vãhẽãshu reta; haivi oujyvyĩ reta mbeu verã.

²³ Hei reta: Heshaha karsel ñymboty kavi ãñete, hareka ñyngareko'iheare ñymbo'y ñynoĩ õnchere hỹnonde kyty: Pe'aharã vãhẽhãshu mbava hapype.

²⁴ Haipe henduma reta pai juhuvisha vasu hareka tũpaope ñyngareko'ia juhuvisha retarã, kuãã japo verãre hãrã pyrãndu jyre ijupe mbaivapera kova ohopo opakui.

²⁵ Haipe ou pente heishuva reta: Kuimbaire piminje vekua karselpe tũpaope pyrỹmboi ñynoĩ reta.

²⁶ Hãrã tũpaope ñyngareko'ia juhuvisha hãndi syndarore jyraha veru, tẽvã mba'ẽã japohe kyje jyve kuaretaivi mõã itape japiharã.

²⁷ Hãrã verumarã ñonoshu reta conciliope ñymbatyhasea hỹnonde haima pai juhuvisha heishu reta:

²⁸ He'iha kavi rãngape ỹnteñoma pypyrỹmboi verã Jesús heepe, tẽvã ã'ẽ pymytynyhẽma Jerusalen pypyrỹmboihea, hãrã pota pity yryrehe ko kuimbai ñymanokue.

²⁹ Pedro hareka ĩrũ Apostolre hãndi heishu reta: Ore japohã rãngapo kuaretare heiva, ore rãnga japohapo Tũpa potava.

³⁰ Ñanytynondevare Ñutũpa mynguerajymba Jesús, pee pijuka vekua pymbysavava kurusurerã.

³¹ Hokava rehe Tũpa ñonoshu vate jakata kyty, mburuvisha vasu rãĩmi hareka pyrỹmondo jepe verã opaite Israelvare hipity verã hejaha reiva mbai porãmba vekua.

³² Ore kova mbai heshahavare hareka mbe'uhava, Espiritu Santo jyve Tũpa meẽva opaite ĩñee henduva hareka japova.

³³ Haire kova hendumarã poshyitevejy reta, hãrã pota jukajyre reta.

³⁴ Tẽvã opaite mburuvishare mbytepe ẽẽ pente fariseo Gamaliel he'iashuva Moisés mbypara vekua pyrỹmboi ihea hareka opava haihuva hoka tentape, hãrã sapy'ãĩ nohẽka katoape Apostol retape.

³⁵ Haivi hei mburuvisha retape: Kuimbaire Israelpe peĩvã, pymaĩ kavirãni pijapohe verã ko kuimbaire.

³⁶ Pynymanduarahe kyyãteri Teudas puãrã vekua, oñemombai vasu vekua hãrã mi'ĩrũ 400 kuimbai rupii tẽvã hai jukahamba haivi opaite iko'i hipiare opa ñymomohẽ hãrã opareii.

³⁷ Haivi kuareta jypapava ikorã puamba Judas Galileape'õ, hãrã hetava raha haykue tẽvã jukahamba jyve, haivi opaite oho haykueva opa ñymomohẽ.

³⁸ Hãrã pyma'ẽĩpohe kova kuimbai retaivi, avy pijapohe reta maĩnunga shara kova kuaretare pota japovaĩrã, opareiipokui.

³⁹ Tẽvã Tũpaivi ouvarã katuãpo pymbai, hãrã pymaĩkavi avy piñyñonopeĩhe reta.

⁴⁰ Hãrã opa iñiñono hãndi reta pente ñeepe hẽnoka Apostolre hãrã opa nupaka reta vakapiperã hei jyvyĩshu reta ỹnteñoma ñimiñee verãre Jesús heepe. Hãrã poijyshi reta.

⁴¹ Hãrã Apostolre opajy õhẽ mburuvishare ñymbatyseaivi vy'ape, shara Tũpa ñonoshu reta kyrã hasa'asy verã Jesús heepe.

⁴² Opa arapema tũpaope hareka oomire ẽvãipi pyrỹmboi mbeu reta ñee py'ahuva Jesús hee ryheva.