Hechos 4 - NandevaBiblia

Pedro hareka Juan mburuvishare hỹnonde

¹ Pedro hareka Juan kuaretare ñimiñeeteri'ẽshuva, vãhe ou paire hareka saduceore, tũpao hõche ñyngareko'ihea juhuvisha hãndi.

² Poshy jyreshu Pedro hareka Juan, mboi ñynoĩ kuareta retaperã hareka mbeujyre manovare katu puãjy Jesús puãva rãĩmi.

³ Hãrã pysyrã raha mbypereso reta, ĩrũ arajyapeve, shara pyntumapo'i.

⁴ Tẽvã hetamba Ñee hẽnduvekuare rojajy; 5.000 rupiimba rojaitevare, kuimbaire jepeiva.

⁵ Ĩrũ arajyape ñymbaty reta Jerusalenpe haipe'õ Judio juhuvishare, hãndi kuakuavare hareka Moisés mbypara vekua pyrỹmboi'iheare.

⁶ Pai juhuvisha vasu Anas ẽjyve hãndi reta hareka Caifas, Juan, Alejandro hareka opaite pai ruvisha ryhevare jepeii.

⁷ Haivi veruka reta Pedro hareka Juan, hãrã haire mbytepe ñonorã, pyrãndushu reta: Mbava ñymbaikatupera maĩrã mbava heepera pijapo kova mbai?

⁸ Pedro tynyhe Espiritu Santoivirã heishu reta: Mburuvishare Israelpe'õre,

⁹ pypyrãndu rãnga ore mbaikavi japoa vekua kuimbai ñymbairasyva rehe, mãrãra kuera.

¹⁰ Mbe'uha kavi, opaite Israelpe õre kuaa verã, ko kuimbai pỹnonde'õ, Jesucristo Ñazaretpe'õ heepe kuera. Kova Jesús pee pymbysavava vekua kurusure hareka Tũpa mynguerajy mano vekuare mbyteivi.

¹¹ Jesús hai ita mbijicheha vekua opaite oo japo'iare, tẽvã haivi ikoshi ita mbijypyhapyva.

¹² Mba'etyhe mbava ko ojepeva ryheva, shara Ñandeja yngava tyree me'ẽã ñande ko yvy'ĩãrẽ, ñanymondo jepe verã.

¹³ Mburuvishare heshama mãrãra Pedro hareka Juan ijeta pyavasu ryheve, hãrã kuaa mondo reta ha'ẽã ñy'ãrãnduvarã hareka mbaimba kuaavarã, mbyrymaĩ reta; kuakavi reta Jesús iko'i hãndia retarã.

¹⁴ Hesha reta kuimbai kuera vekua ñymbou ñynoĩ hãndi retarã, hãrã katuã heijyhe reta mbai porãmba japova.

¹⁵ Hãrã heishu reta õhe verã hokava ñymbatyha õĩvi, ha'ei retaĩ ijupii ijeta verã.

¹⁶ Hãrã hei reta: Mbaivara jajapopohe kova kuimbaire? Opaite rãnga Jerusalenpe'õre kuaa opa mbai heshaha verã japorã hãrã katuã ñañomi.

¹⁷ Tẽvã, ã'ẽ japysypo reta poima mbeu verãre, ñamyngyjepo reta ỹnteñoma ijeta verãre Jesús heepe.

¹⁸ Haipe hẽno retarã heishu reta, ỹnteñoma ijeta verãre hareka pyrỹmboihe verã Jesús heepe.

¹⁹ Tẽvã Pedro hareka Juan heishu reta: Pypya pimbijetano haikavirapo ore japoharã pee pereva maĩrã Tũpa heiva?

²⁰ Shara ore mbe'uhañoĩpo heshahava hareka henduha vekua.

²¹ Haivi mburuvishare ijeta pohyjyshu retarã ma'ẽĩmahe reta kuaretare rehe, vãhẽãshu mãrãrapo nũpaka reta shara haipe ikova rehe opaite õmombaishu Tũpa.

²² Hoka kuimbai kuera vekua mbai heshaha verã rupii, 40 ãñomare.

Cristo ryhevare jurure jyrojape hareka pyavasupe

²³ Pedro hareka Juan poiamashi retarã, jyraha ñi'ĩrũre ẽvãpe hãrã opa mbeushu reta opaite paire juhuvisha hareka kuakuavare heishu vekuare.

²⁴ Haire opama hendurã opaĩ hỹnatu jurure reta Tũpape hãrã hei reta: Sheja, nde rijapo vekua yvy hareka ara vate'õ, yy vasu hareka opa mbai ẽẽpyare,

²⁵ nde rere vekua Espiritu Santo rupii hareka David rijokueva, juru rupii: Mãrã'irãra tenta vasure poshyite jyre reta hareka kuaretare mbaimba vekuareĩ pya mbijeta?

²⁶ Opaite mburuvisha vasure yvy'ĩãrẽ'õre ñymyhẽva ñyrãrõ verãre, hareka huvishare ñymbaty ñymbyvaishohe verãre Ñandeja hareka Mesias hai pyhỹrõva.

²⁷ Ãñete rãnga Herode hareka Poncio Pilato ñymbaty reta kova tentape, yngaivi ouvare hareka Israelitare hãndi hãrã puãhe reta Jesús, nimbijokue heko kyamba, nde rypyhyrõ vekua,

²⁸ iko verã opa mbai nde rere vekua rãĩmi.

²⁹ Ã'ẽ, Sheja, maĩhe haire ĩñee hei pota urũnupavare hareka meẽshu rijokuevare pyavasu, kyjehambape mbeu verãre niñee,

³⁰ hareka heshaka'ore nymbaikatu myngueraha verã ñymbairasyva, tiko mbai heshaha verã hareka mbai kavi heshaha verã nimbijokue Jesús heko kyamba.

³¹ Haivi opama jurure retarã, oo haire ñymbaty ñynoĩvape opa ryry; hareka haire opa tynyhe Espiritu Santo hãrã mbeu reta Tũpa ĩñee kyjembape.

Jesús jyrojajahevare ikova rãĩmi

³² Opaite jyrojavare pente pyapeĩjyre hareka pente ñeepeĩ ñynoĩ; hareka mba'ety heiva ha'ei ña'ãpova mbai ĩmereva, opava ña'ãpovare haire ña'ãpova jyve.

³³ Apostolre, mbaikatukue ryheve, mbeu jyre Ñandeja Jesús kuerajy manovare mbyteivirã hareka Tũpa heta maĩkavihe reta.

³⁴ Mba'ety haire mbytepe ikotẽveva; opa mbai ĩmereva yvy maĩrã oo, ovende retarã hepykue veru reta,

³⁵ haivi veru meẽshu reta Apostolre, hareka pepenteĩ meme'ẽãshu reta mbai ikotẽveva rupii.

³⁶ Kyrã haire mbytepe ẽjyve mbory'ẽshua paire tũpaope, José he'iashuva, Apostolre mbyheembajypy reta Bernabé, he'iseva “mbypya kaviva hapishare”, hokava hai Chiprepe'õ;

³⁷ ko kuimbai mbyhepymba yvy ĩmereva, haivi hepykue verumba meẽshu Apostol retape.