Hechos 3 - NandevaBiblia

Pedro hareka Juan mynguera Jesucristo heepe pente kuimbai vatamba vekua

¹ Pente arape ka'arumima ohorã Pedro hareka Juan oho reta tũpaope jurure verãre.

² Haipe'i pente kuimbai oarãvãĩ vatamba, opa ara rahaha hareka ñonohã õche “Mashyãva” he'iashuape jururete'ishu kyrypoti opaite tũpaope ichevare.

³ Hokava kuimbai vatambava hesha Pedro hareka Juan ichepo oho tũpaoperã, jururetẽ'ishu kyrypoti.

⁴ Hãrã Juan hareka Pedro mãĩjyreherã, Pedro heishu: Mãĩ yryrehe.

⁵ Haipe ko kuimbai mãĩkavihe, mõãte maĩnunga meẽposhu retarã.

⁶ Pedro heishu: Ita vera ijuva hareka ita vera tĩĩva mba'ety are, tẽvã ĩme'areva ameẽponde; Jesucristo Nazaretva heepe pũ'ã hareka vata.

⁷ Pedro opa ijetarã pysyshu ipo jakata kyty'õrã mupũã. Haipe vatamba vekua, tymare hareka pytare pyrãtajy.

⁸ Ko kuimbai vatamba vekua oporã õñepyrõ vata. Haivi iche hãndi reta tũpaope, opo'i vate õmombaishu Tũpa

⁹ Hãrã opaite kuaretare hesha vatajyrã hareka õmombai vasu jyve reta Tũpa,

¹⁰ opa mbyrymaĩ reta hareka kuãã reta mbaivara iko shara kuaa reta ko kuimbai hai vapyse'ia tũpao hõchepe “Mashyãva” he'iashuape.

Pedro mbeu Jesucristo ĩñee tũpao vasu hyvache

¹¹ Ko vatambava kuera vekua hejãã reta Pedro hareka Juan hãrã opaite kuareta tentape'õre mbyrymaĩterivare ryheve ñani jyraha õche vasu'õ kyty Salomon he'iashua.

¹² Pedro hesha kovarã heishu reta: Marã'ĩrãra pee Israelitare, mbyry pymaĩhe ko ikovare? Marã'ĩrãra pymãĩpi yryrehe, ore mynguerahava rãĩmi kova kuimbai maĩrã ore mbyvatahajya rãĩmi ỹrỹmbaikatu hareka yryrykove mbijicheava Tũpa pevarã rupii?

¹³ Abraham, Isaac, Jacob ñu Tũpa hareka ñanytynondevare ñu Tũpa rãnga, vateiteve ñono hai tay Jesús opaite jokueva retaivi, pee pymeẽ hareka piñomipyre Pilato hỹnonde, hai heimatẽã poishi verã.

¹⁴ Tẽvã pee piñomi heko Kyambava hareka hekope kavi'ia, haivi hendakuepe pirure poiashi verã Barrabas, puruka'ia.

¹⁵ Kyrã pijuka tykove Ija, tẽvã Tũpa mynguerajy manovare mbyteivirã hãrã ore hai hokava mbai heshaha vekua.

¹⁶ Ko kuimbai pyhesha hareka pikuava pyrãtajy shara jyrojahe Jesús hee. Ko jyroja ñonova Jesure myngueraiteshu pee pyheshava rãĩmi.

¹⁷ Hãrã ã'ẽ shyryvyre, aikua kova pee jyve punduruvishare mbai porãmba pijapohe pikuaa kavimbape.

¹⁸ Tẽvã Tũpa kyrã japo opa iko verã Tũpa ĩñee mbeu'iare rupii mbeu vekua; Mesia manoñõĩ verã.

¹⁹ Hãrã, opa kavi pymbeu mbai porãmba pijapo vekua hareka peijy Tũpa jykoty, hejareii pyndyhevi verã mbai porãmba,

²⁰ hareka katu Ñandeja mboupe ara vevyva, mbou Jesurã jypyiterãvãĩ Mesia rãĩmi pyhyrõã mbouhape vekua.

²¹ Tẽvã ã'ẽ Jesucristo pytateri'ẽ vate, opa mbai ñonoha kavipeve. Opa mbai heiva, Tũpa ĩñee mbeu'ia kyambava, arykaivare ikoterivape.

²² Moisés rãnga hei ñanytynondeva retape: “Ñandeja ñanu Tũpa rãnga mupuãpokui tyvyre pãũpe pente Tũpa ĩñee mbeu'ia she rãĩmiva, pyhendushukui hai heiva,

²³ shara opaite ñee hẽndumbashua hokava Tũpa ĩñee mbeu'ia mohẽãpokui jy'yvyivi”.

²⁴ Shara Tũpa ĩñee mbeu'ia Samuelvive õñepyrõ ijetahahe kova ara.

²⁵ Pee pevarã rãnga ko ñee Tũpa ĩñee mbeu'iare rupii Tũpa meẽva, hareka pee pevarãĩjy ñee me'ẽãva Tũpa japo vekua pynytynondevare hãndi. Shara Tũpa heimbashu Abraham: “Ndyrayre rupiipo she ahovasa opaite tenta yvy'ĩãrẽ'iare”.

²⁶ Pee pevarã tynõnde Tũpa mupuãjy tay Jesucristo, hai rupii pipity verã jyhovasa hareka hejaka pyndyhevi verã mbai porãmba pijapopi vekua.