Hechos 28 - NandevaBiblia

Pablo vãhẽ oho Maltape

¹ Opamatẽ ohoajeperã, kuaahajy ko yvy japua'õva yy mbytepe'õ Malta he'iashuarã.

² Haipe Maltape'õre ỹrỹmyvãhẽkavi reta, shara ro'y hareka haivi'ẽseverã. Hãrã haire tata jatapyvasu, haipe yrỹrẽno reta jype'eha hãndi verãre.

³ Pablo oho mbaty'i jypea, rahama mombopy tatarã, õhẽshi pente mboi tata hakushurã, hãrã ipope shuu.

⁴ Haipe'õre hesha Pablo ipore mboi savava'irã, hei ijupe reta: Kova kuimbai imerã puruka'ia, shara yyvasu ohojepematẽshia, tẽvã vate araivi pirĩmbivachekava mã'ẽĩãpohe ĩmeĩ'i verã.

⁵ Pablo mbyvava mboirã, ity tatape, tẽvã mamba'ẽã'i.

⁶ Maltape'õre hãrõ rurushu maĩrã sapy'aĩ juka verã, tẽvã hetarei hãrõ reta, hãrã heshama mamba'ẽã'irã, yngai heijyrejy, hareka hei reta Pablo hai pente Tũpa.

⁷ Haipe Maltape'õre mbytepe iko jyve pente mburuvisha Publio he'iashua hai tivishare jy'yvy. Hai yrymyvãhẽkavi hentape, hareka mbahapy ara ñyngareko yryrehe.

⁸ Haipe Publio tuu hupare'ẽ hyehasypy hareka mbakuseve. Pablo oho maĩhe, hãrã opama jurure'ĩãrẽrã, ipo ñono'ĩãrẽ hareka mynguera.

⁹ Kova mbai japova rehe, heta ñymbairasy vekuare Maltape'iare jyveru Pablo ẽvãpe, hareka opa myngueraha jyve.

¹⁰ Hãrã haire heta ñyngareko kavi yryrehe, hareka jupiamajy varkoperã, opaite meẽjy'ore pehupi ho'ua verã.

Pablo vãhẽ oho Romape

¹¹ Mbahapy jasyma pytaha Maltaperã, jupihajypy pente varko ara ro'ype haipe pyta vekua. Hokava hai varko Alejandriape'õ hareka ĩtire'ẽjy Castor hareka Pólux hã'ãnga.

¹² Vãhẽha ohoha Siracusape, haipe pytaha mbahapy ara.

¹³ Haivi ohohavejy vãhẽãpeve Regiope. Paremajyrã rovaima'ẽ, haivi mokue aravape vãhẽhã ohoha Puteolipe.

¹⁴ Haipe heshaha a'ãmo Jesure jyrojavare, hãrã jururejy'ore pytaha hãndi verãre pente semana, haivi ohoha Romape.

¹⁵ Haivi Jesús jyrojaheare Romape'õre, kuamaimba reta hãrã jyveru ỹrymyvãhẽ reta Foro Apiope hareka “Mbahapy Tabernas” he'iashuapeve, Pablo heshamarã, meẽshu gracia Tũpa hareka kyrẽ'yjy.

¹⁶ Vãhẽama ohoa Romaperã, huvishare ñonoshu reta pente oo Pablo ha'ĩ pyta verãpe, hãndi pente syndaro ñyngarekorehea.

Pablo ñimiñee Romape

¹⁷ Romape vãhẽha ohoharã mbahapy araheape, Pablo hẽnoka Judiore juhuvisha hareka ñymbatyma hãndi retarã heishu: Shyryvyre ajemaĩ ajapoã porãmbava ñanyrẽtare hareka ñanytynondevare jypykuava rãĩmi, tẽvã Jerusalenvare shiñono Romavare ipope.

¹⁸ Romavare opama pyrãndu kavishe retarã, pota poijyre shyhevi, heshama reta mba'eã ajaporã.

¹⁹ Tẽvã Judiore iñiñono pyrãtaveshyre, hãme rãnga airure Roma juhuvisha vasu shimbivache verã, tẽvã ha'ẽa she poramba aijetahe verã shyrẽnta'ĩrũre.

²⁰ Hãme rãnga apyrỹrẽnoka jyve, apyryresha hareka aijeta penendie verã, Israelitare hãrõva rehe rãnga shapĩtĩha ko kadenape.

²¹ Hãrã heishu reta: Vãhẽã ore Judeaivi kuatia hei ndyreheva hareka mba'etyjy ñandyryvyre Judeaivi ouva ijetavai ndyreheva.

²² Pota henduha ndijuruivi mbaivara rere jyvehe ko ikova, oparupi rãnga henduha porãmba ijetaheva ko mbai py'ahuva.

²³ Ñonombajyshu reta pente ara ñymbatyjy verãre, hãme hetaiteve oujy Pablo ẽvãpe. Hãrã ko'ẽĩ hareka ka'arupeve Pablo ijetaheshu reta Tũpa ẽvãpe'õ ryheva. Moisés mbypara vekua hareka Tũpa ĩñee mbeu'iare jykuatia rupii ijeta jyveshu reta haire roja verãre Jesús haiva Mesia.

²⁴ Ĩmeĩ'ẽ rojava Pablo heiva, tẽvã ĩme'ẽjy rojambava.

²⁵ Katuãma pente ñeepe ñynoĩ retarã, õñepyrõ opajy jyraha. Hãrã Pablo heishu reta: Haikavi rãnga ijetashu Espiritu Santo ñanytynondevare Tũpa ĩñee mbeu'ia Isaia rupii, hei:

²⁶ Ekua hoka tentape hareka ereshu: Pyhenduaratẽpo, tẽvã pikuaãpo; pyma'ẽãratẽ, tẽvã pyheshããpo.

²⁷ Shara pyare mytãta, japysare opa mboty hareka hesare opa mboty. Hãrã katuã hesha hareka hendu, hareka kuããpo reta. Potãã oujy shykoty retarã, hareka potãã amynguera retarã.

²⁸ Pikuaa kavipo ko Tũpa pyrỹmondojepeva mbe'uhama haimba Judio retape, hãrã haire hendu kavipo kova ñee!

²⁹ Pablo opama hei kova mbairã, akua Judiovare opama õhẽ reta, hareka ĩñee pohyjyre ijupe.

³⁰ Pablo pyta mõkue ãño pente oo poryhakashuvape kyrypotire, hãrã haipe myvãhẽ opaitea ouva hai ẽvãpe.

³¹ Mbaivamba jokoshuvape mbeu'i Tũpa ẽvãpe'õ hareka mboihe reta Ñandeja Jesucristo ryheva, mbavamba jochashuvape.