Hechos 25 - NandevaBiblia

Pablo rahaha Festo hỹnonde

¹ Hãrã Festo vãhẽ Cesareape mburuvisharã vapy verã. Mbahapy arajyape oho Cesareaivi Jerusalenpe.

² Hãma pai ruvishare hareka Judio juhuvishare jyraha hai ẽvãpe ñymbyvaishohe verãre Pablo.

³ Hãrã jurure kavishu reta Festo, veruka verã Pablo Jerusalenpe, shara haire opamaĩ hei reta juka verãre pehupi.

⁴ Tẽvã Festo heishu reta Pablo mbyperesohavape ĩme'ẽ Cesareape, hareka haiteiva oho verã haipe.

⁵ Hãma heishu reta: Punduruvisharã'õre toho shendiekui Cesareape, hãrã ko kuimbai ĩme porãmba japorã, haipepo pymbojahekui.

⁶ Festo pytavejy Jerusalenpe 8 aravaipi, haivi ohojy Cesareape. Parejyrã vapy mburuvishare vapyseape, hãrã veruka Pablo.

⁷ Pablo ichemarã Judiore opa jerehe reta Jerusalenvi ouvare hareka heta heihe reta mbai pohyva, tẽvã mba'ety añeteva mbeuva.

⁸ Haipe Pablo ijocha verã hei: She ajapoãhe porãmba Moisés mbypara vekuare, tũpaore maĩrã Cesar rehe.

⁹ Tẽvã Festo pota ẽẽkavi hãndi Judio retarã, pyrãndushu Pablo: Ripotara reho Jerusalenpe nimbivachehaka verã shynonde kova mbai rehe?

¹⁰ Pablo hei: Ãĩme rãnga huvishavasu Cesar ryhevare hỹnonde, shimbivachehaka verãpe rikuaa kaviva ajapomba porãmba israelva retare.

¹¹ Ĩme'ẽ porãmba ajapova shukahahe verãrã, ambasyã shyrykovere tẽvã mba'ety ñee añeteva ko heijyre shyreheva mbavẽãpo katu shiñono haire ipope. Airureshu mburuvisha vasutei shimbivachekati.

¹² Hãrã Festo pyrãndu mbarakuaaserea retape, haivi hei: Nde rirurehe nimbivacheka verã mburuvishateiva; kyrãrã'ãshe rehopo hai ẽvãpe.

Pablo rahaha mburuvisha Agripa hỹnonde

¹³ Hãrã mbovy arajyape Mburuvisha vasu Agripa hareka hyreko Berenice oho Cesareape marãndushu verã Festo.

¹⁴ Hãrã haipe mbovy ara pytarã, Festo mbeushu mburuvisha vasu Pablo heko ryheva, hãma hei: Ĩme'ẽ pente kuimbai Felix hejashu mbyperesohavape.

¹⁵ Ãĩmeteri Jerusalenperã, pai juhuvishare hareka israelitare miñaka'iare ijeta porãã jyrehe she, haivi jurure jyre jukahaka verã.

¹⁶ She haipe haishu Romape mburuvisharã'õre jypykuava rãĩmi, jukãã mbavape mbivachehakambashuva mbai mbeuva hãndi, hareka ijetarãni ijehevape.

¹⁷ Hãrã haire jyveru koperã ambupukumbape; parejyrã ñymbatyare vapyseape avapyrã amondoravĩ aruka ko kuimbai.

¹⁸ Tẽvã ou mbivachekavare mba'ẽã heihe reta, she ãĩmoatẽã rãĩmi.

¹⁹ Tẽvã haire ohoheva ryhevãĩ koñeĩ heihe, arykai Jesús mano vekua hareka Pablo hei hykoveteri'iva.

²⁰ She aikuaveama ajapo verã, hãrã apyrãndushu Pablo kyrẽyra oho Jerusalenpe mbivachehaka verã kova mbaire.

²¹ Tẽvã hai jurure mburuvisha vasu Augusto mbivachekashu verã, hokava rehe rãnga ambyperesoka ahejashu katu amondopeve mburuvisha vasu ẽvãpe.

²² Haipema Agripa hei Festope: “She rãnga shykyrẽy ahendu jyveshu ko kuimbai”, hãrã Festo heishu: “Parepo rỹhendukui”.

²³ Ĩrũ aramajyrã Agripa hareka Berenice vãhẽ jyveru, iche reta opa ñimimonde kavi reheve o'ipe mburuvishare hareka karai vasure ko tentape'õre hãndi, hãma Festo veruka Pablo.

²⁴ Hãrã hei: Mburuvisha vasu Agripa, hareka karaire ñaimbatyñaĩ hãndiare mbytepe, kope'ẽ kuimbai heta israelvare ijeta porãmbahesheva Jerusalenpe hareka Cesareape, heijyshe reta manoñoĩ verã.

²⁵ Tẽvã she pevarã hainy mbaimba japova mano verã, shara haitei jurure mburuvisha vasu Augusto hỹnonde mbivachehaka verã, hãrã amondopokui hai ẽvãpe.

²⁶ Hãrã mba'ety are añeteva ambyparahe verã kuatiape karai mburuvisha, hãma aru pynynonde hareka ĩãrẽve nynonderãni aru mburuvisha vasu Agripa, nde rypyrãndushu verã. Hãmerãpo aikuakui ambyparahe verã kuatiape amondoshu verã huvisha vasu.

²⁷ Shara hãĩshe hekopemba verã jarahaka pente mbyperesoava, ñambeu kavimba mbaivara he'iahe.