Hechos 24 - NandevaBiblia

Pablo ijeta ijehe Felix hỹnonde

¹ Pandepo arajyape pai ruvisha Ananías, vãhẽ oho hãndi Cesareape a'ãmo tũpaope miñaka'iare hareka pente pyryrepy'ia Tertulo he'iashuva. Kovare jyraha huvisha'õpe ñymbyvaishohe verãre Pablo.

² Veruhama Pablo ñymbatyavaperã, Tertulo õñepyrõ ijetahe, heishu Felix: Karai mburuvisha, nde rupii ĩme rekoha pyavapy hareka opava mbai rikatu rijapova rupii, heta mbai haikaviva japoha ko ñanyrẽtape.

³ Kova mbai oparupi heshaha, nde Felix pyakaviva hãrã yrypyaivive vy'aha'ẽ.

⁴ Tẽvã potãã pukuite nymangatũhãrã, airure nde ndypya kavi rupii yrỹrẽndu verã sapy'aite.

⁵ Vãhẽã rãngashu ko kuimbai mbairasykue rãĩmi, hareka oparupi opa mbijajao Judiore hareka haiteiva miñakashu nazareno ryhevare.

⁶ Hãma pota myngyajy tũpao, hãme rãnga pysyha,

⁷ tẽvã syndarore juhuvisha, Lisias iche yrymbytepe hareka mbaretepe heky yrepoivi,

⁸ hãma heishu porãmba ñonokareare ou verã nyrẽndape. Ndetei katu rypyrãndushu, hãmerãpo rikuakui ãñete kova ore he'iaheva.

⁹ Israelvare haipe'ẽvãre kyrãĩ heijyve reta.

¹⁰ Haipema huvisha myha'ãngashu Pablo ijeta verã, hãrã Pablo hei: Avy'a aijetapo shijehe nynonderã, shara kuriã aikuaa ko tentape nde hai ripirĩmbivacherẽĩva.

¹¹ Ndetei katu rỹpyrãndukui 12 ararãã japo ãvãhe aiva Jerusalenpe ãmombai verã Tũpa.

¹² Shyreshãã reta mbava aijaka hãndirã, maĩrã opa ãmomohẽ tũpaope'õ retarã hareka Judiore ñymbatyseape, maĩrã maĩpi tenta retaipi.

¹³ Kova kuaretare katuã heshaka ãñetera mbai hei shyrehevare.

¹⁴ Tẽvã she aimbeupo, sherure ñu Tũpa rãnga amba'aposhu, ãĩme'ãĩ Tape Py'ahuape tẽvã haire heishu hekopemba'õ, shara aroja opa mbai Moisés mbypara vekua hareka Tũpa ĩñee mbeu'iare jykuatia.

¹⁵ Hãrã haire rãĩmi, ĩme'are jyve ãhãrõva Tũpaivi, mano vekuare kuerajy verã, heko kyambare hareka heko porãmbavare.

¹⁶ Hãme rãnga ãñehãñoĩ añymbyheko kavi verã Tũpa hỹnonde hareka kuaretare.

¹⁷ Heta ãño aiko mamaĩpi, haivi aijy shyrẽntape ameẽ verã maĩnunga shyrẽnta'ĩrũ retape hareka ambishaka verã Tũpa pevarã.

¹⁸ She rãnga ãñymypõtĩ'ãĩ tũpaoperã, Asiaivi ouvare shyresha reta, tẽvã mba'etynunga kuareta haipe hareka amambekoã mbavape.

¹⁹ Hai reta rãngapo jyveru ijeta shyrehe, ĩmere hei shyrehe verãrã.

²⁰ Maĩrã kope ĩme'õre tymbeu, ĩme hesha shyrehe porãmbava ajaporã Judiore juhuvisha pirĩmbivache'iare hỹnonde ãĩme ãĩrã.

²¹ Koñei haire hỹnonde asapukerã hai: Ã'ẽ pymaĩpẽĩ shyrehe shara aroja manovare kuerajy verã.

²² Felix henduma kovarã kuaa kavimava Pee Py'ahuva ryheva, kyrãĩ heja kova, heishu reta: Syndarore juhuvisha Licias oumajyrã aikuaa kavivepokui kova ryheva.

²³ Haipema Felix heishu 100'õ syndarore juhuvisha Pablo mbyperesoaveteri'ẽ verã hareka jochamba verãre Pablo ñi'irũre pohyshurã hareka ma'ẽĩehe ñygarekohe verãre.

²⁴ Mbovy arama hasajyrã hykuaĩ oujy Felix, hyreko Drusila hãndi, haijyve Judiovare, hãrã henõkajy Pablo hẽndushi verã Jesucristore jairojava ryheva.

²⁵ Tẽvã Pablo ijeta'ẽhẽ hekope kavi jaikova ryhevarã, jajijokoshi mbai porãmbava hareka iko ñandyrehe verãrã, Felix myngyje hãrã heishu: Ekuajyvy, ha'ereipo aryrẽnokajykui.

²⁶ Felix hãrõ jyve Pablo meẽshu verã kyrypoti poishi verã, hokava rehe hetajy hẽnoka ijeta hãndi verã.

²⁷ Mokue ãño kyrã hasa, haivi Felix õhẽ mburuvishaivi hãrã Porcio Festo ichejy hendakuepe. Hãma Felix pota haikavi'ẽ hãndi Judio retarã mbypereso heja Pablo.