Hechos 23 - NandevaBiblia

¹ Pablo maĩ'ihe haipe huvisha ñymbaty'õ retarã hei: Shyryvyre, ã'ẽpeve aiko shãka vapy kavi ryheve Tũpa hỹnonde.

² Haivi pai ruvisha Ananías he'iashua heishu Pablo hyvache'ia nupashu verã juruipi.

³ Pablo heishu: Tũpa nunupapokui nde, ndyrova mokuereiva! Nde rãnga ryvapyrẽĩ hokape shimbijiche verã Moisés mbypara vekuape heiva rãĩmi, tẽvã mãrã'ĩrãra shunupãka Moisés mbypara vekuape heimbatẽã kyrã rijapo verã?

⁴ Hãrã haipe'õre heishu reta: Marã'ĩrãra kyrã ndyposhyshu pai ruvisha Tũpa ñonova?

⁵ Pablo hei: Shyryvyre, aikuãã rãngambaje hai pai ruvisharã, shara mbyparahavape hei: Avy poshyshu nyrentape miñaka'õ.

⁶ Haivi Pablo heshama haipe'ẽ jyve Saduseo hareka fariseo retarã hỹnatu hei: Shyryvyre, she hai fariseo, pente fariseova tay, shyveruha kope shara arojashe mano vekuare kuerajy verã.

⁷ Pablo opama hei kovarã, Saduseo hareka fariseore õñepyrõ ijeta ñynoĩ ijupi, hãrã ñymbatyva opa ñymbijao.

⁸ Shara Saduseore hei manovare kuerajymbaa hareka mba'etyva Tũpa jokueva hareka espiritu, tẽvã fariseore roja hai hokava.

⁹ Opa sapuke reta, haipe ĩme'ẽ jyve Moisés mbypara vekua pyrỹmboi'iheare fariseova, pũã retarã hei: Ko kuimbai rãnga japoã porãmba. Ĩmerã Tũpa jokueva hareka espiritu ijetashu.

¹⁰ Kyrã ñimbitivishave oho ko ikova, hãrã syndarore juhuvisha kyje jukashu verã Pablo, hẽnoka syndarore nohẽ verãre Pablo haire mbyteivi, raha verãre syndarore ho'ipe.

¹¹ Hoka ĩrũ arajya pyharepe Ñandeja ijeshakashu Pablo hãrã heishu: Ñymykyrẽy katu Pablo, ko Jerusalenpe shymbeuva rãĩmipo, shymbeujykui Romape.

Ñemiãpẽĩ ijeta jyrehe Pablo juka verãre

¹² Hokava arape ĩme'ẽ Judiovare ĩñiñonova pente nẽẽpe Pablo juka verãre, hei reta Tũpa jahehe verãre japoã reta heivarã.

¹³ Hasamimba 40 kuimbai ẽvã ĩñiñonova hokava nẽẽpe.

¹⁴ Jyraha reta pai ruvisha hareka Judiore juhuvisha ẽvãpe heishu reta: Ore me'ẽã ĩrĩñee mbaimba ho'uha hareka mbusururuha verã Pablo ndei jukaharã.

¹⁵ Hãrã pee mburuvisharã pẽĩva, pirureshukui syndarore juhuvisha veru verã pynynõnde, mbai pikuaaveshi verã Pablo, hãrã ore õĩãmapokui jukaha verã ndei vãherã.

¹⁶ Tẽvã Pablo hiindy memby kuaa kovarã, oho kuartelpe mbeushu Pablo.

¹⁷ Pablo hẽno pente 100'õ syndarore juhuvisharã heishu: Raha ko kunumi syndarore juhuvisha vasu ẽvãpe, ĩmere mbeushu verã.

¹⁸ Syndarore 100'õ juhuvisha oho syndarore huvisha vasu'õperã heishu: Pablo mbyperesoarea rãnga shyrẽno'irã jurureshe aru verã ko kunumi, shara ĩmendare mbeu nde verã.

¹⁹ Hãrã syndarore juhuvisha pysyshu ipoperã raha hã'ẽĩ õpe pyrãndushu: Mbaivara rỹmbeuposhe?

²⁰ Kunumi heishu syndarore juhuvisha: Judio reta rãnga ĩñiñono pente nẽẽpe jurure nde verã hareka ryrahashu verãre pare Pablo Judio juhuvishare hỹnonde, mbai pyrãndu kaviveshu verã rãĩmi.

²¹ Tẽvã avy rojakui, ĩme'ãmo hasave 40 kuimbai ñemiãpe hãrõ'õre pehupi, ĩñee meẽ reta Tũpape mbaimba hou verã hareka mbusururu verãre jukapeve Pablo. Ã'ẽ ĩmema ñynoĩ haipe, hãrõ mbaivarapo rere jyve.

²² Haivi syndarore juhuvisha mondojy kunumirã heishu mbavamba mbeushu verã kova.

Pablo mondoha Felix ẽvãpe

²³ Haivi syndarore juhuvisha vasu hẽno mokue syndarore 100 ẽva juhuvisha heishu myhẽvã verãre 200 syndarore yvyipĩĩ'iare, 70 kavajure'iare hareka 200 mĩĩ ĩmereare pyntumarã oho verãre tenta Cesareape.

²⁴ Hareka heijy ñonokavishu verãre pente kavaju Pablo jupihe verã hareka vãhẽ kavi oho verã mbaimba jehushuape Felix Roma juhuvisha ẽvãpe.

²⁵ Hãrã meẽshu reta kuatia raha verã, Felix pevarã heiva:

²⁶ She Claudio Lisias, arỹmymarãndu huvisha vasu hekokaviva Felix Romape'õ.

²⁷ Kova kuimbai Judiore pysyva hareka jukaserimareare, tẽvã shysyndarore hãndi ahekyjyshi reta shara hai heishe Romavarã.

²⁸ Pota aikuakavi marã'ĩrãra maĩ jyrehe. Haivi arahakajy Judiore juhuvisha vasure ñymbatyseape.

²⁹ Katy ñee mbyparahava rehemba maĩjyrehe, tẽvã mba'etyre mbai reherapo juka reta hareka mbyperesoha verã.

³⁰ Mbe'uhashe imenda'ẽ pota ñemiãpe pysyva ko kuimbai jukaha vẽra. Hãme rãnga amondo nyrẽndape hareka añonojyveshu porãmba pirĩñono'iare hei verãre nynonde mbaiva rehera ñymbyvaishohe.

³¹ Hãrã syndarore he'iashuva rãĩmi, pynturã raha reta Pablo Antipatrispe.

³² Parejyrã syndarore yvyipi'iare opajy jyeru kuartelpe, tẽvã kavajure'iare ohoĩ hãndi reta Pablo.

³³ Vãhẽma jyraha Cesareaperã, meẽshu reta huvisha kuatia hareka Pablo.

³⁴ Huvisha opama mbijeta kuatiarã, pyrãndushu Pablo mape'õra hai hareka kuama Ciliciape'õrã,

³⁵ heishu: Ajasakapo ndyrehekui ñy'ãpo'i ndyrehevare oumarã. Hãrã he'ika ñyngarekohe verãre Herodes hoo vasupe.