Hechos 20 - NandevaBiblia

Pablo oho Macedonia hareka Greciape

¹ Kuareta opa ikoraiva opamarã, Pablo hẽnoka Jesús mboireare mbarakuaashu verãre, hareka opama ñimiñeeshurã ñykuãkuãvãjy hãndi reta, haivi oho Macedoniape.

² Opama vata hoka yvy retaipirã, hareka hetama mykyrẽyshu jyrojava retarã, ohojy Greciape.

³ Haipe pyta mbahapy jasy. Hareka varkope ohoserima'ia Siriape, kuaa Judiore ĩñee ñono ñynoĩhearã, hãrã hei yvyipĩĩ oujy verã Macedoniaipi.

⁴ Mi'ĩrũshu reta Sopater, Pirro tay Bereape'õ, Aristarco hareka Segundo hai Tesalonicavare, Gayo Derbespe'õ, Timoteo, Tikico hareka Trofimo, hairetamba tenta Asiape'õvare.

⁵ Kovare ñymytynonde yryhevirã, jyraha ỹry'ãrõ reta Troaspe.

⁶ Tẽvã ore õhẽhã Filipoivi varkope, arete pãhã jy'oumbava ryheva hasamarã, hãrã pandepo aravape hipityhashu reta Troaspe, haipe shiu (7) ara pytaha.

Pablo vãhẽ oho Troaspe

⁷ Ara semana oñepyrõheape, ñymbatyha pãhã pyse'ãhã verã, haipe Pablo mboishu Jesús jyrojaheare. Ohojymapojy ĩrũ arajyaperã, pyhare mbytepeve ijeta.

⁸ Haipe ñymbatyha'õpe oo vate'õpe, heta'ẽ haipe lampara myhendyava;

⁹ hareka pente kunumi Eutico he'iashua petanore vapy'ẽ. Pablo pukuitema ijetarã hokava kunumi hypehyiterã oche haipe, hãrã oo mbahapy jyvohy'õivive oa, jyrahajy mupuãrã hã'õvẽkueĩma'ẽ.

¹⁰ Hãrã Pablo vejy, kuãvã kunumirã heishu Jesure jyrojavare: Avy pykyje, manoã rãnga.

¹¹ Haivi Pablo hykuaĩ jupijy; pyseã pãhã, opa hou retarã, ko'ẽpeve ñimiñee. Haivi oho.

¹² Hãma ko kunumi hykove ryheve rahajy reta hentape, hokava mykyrẽ'yĩtevejy reta.

Pablo ohojy Troasvi Miletope

¹³ Ore ñymytynondeharã ohoha varkope tentami Asonpeve, haipe hupihajy verã Pablo hai hei oreva rãĩmi, shara hai pota yvyipĩĩ oho.

¹⁴ Hãrã vãhẽhama tentami Asonperã Pablo jupirã ohoha hãndi Mitilenepe.

¹⁵ Haivi õhẽha hareka pareemajyrã hasaha Quio hỹnonde, pareejyrã vãheha Samonpe varko ñymbo'yseape. Pente arajyape vãhẽha ohoha Miletope.

¹⁶ Kyrã japoha shara Pablo ñatẽy hasa Éfesoperã, shara potãã kỹỹĩte pyta Asiaperã, pota'areã vãhẽ oho Jerusalenpe Pentekoste jy'areterãpe.

Pablo ijetashu Éfesope tũpao miñaka'iare

¹⁷ Miletope imeteri'ẽrã, Pablo hẽnoka tũpaope miñaka'õre, Éfesope'õre ijeta hãndi verã.

¹⁸ Opama vãhẽ jyveru retarã heishu: Pee pikuaa marãra aiko jypyite ãvãhẽ'ai ko Asiaperã.

¹⁹ Heta ara aiko penendie aijokueka Ñandejape airojamba shijehevape, heta ajahe'o hareka heta ahasa'asy Judiore pota japojyre shyrehevape.

²⁰ Tẽvã apoiã ambeupe haikavipe verã, apyrỹmboi opavare hỹnonde hareka pynyrẽta retaipi.

²¹ Judiore hareka haimba Judiovare haishu reta oujy verã Tũpa kyty, hareka jyve jyrojahe verã Ñandeja Jesús.

²² Ã'ẽ ahapo Jerusalenpe, shara Espiritu Santo kyrã heisherã, aikuamba'ãĩva mbaivara shy'ãrõ'ẽ haipe.

²³ Koñeĩ aikuaava hai, opaite tentare ahavaipi Espiritu Santo heishe shy'ãrõ'ẽvã shymbyperesoha verã hareka heta aiko'asy verã.

²⁴ Tẽvã opaite kova mbai ha'ẽã shypya mbyvyamba'õ; hareka shyrykove ha'ẽãjyveshe mba'eite, koñeĩ aipota vy'a ryheve ahahe ko añaniva japyapeve. Hareka hekope kavi ajapo Ñandeja Jesús hejasheva, ãmbeu'ai Tũpa Ĩñee Kavi jyhaihukue ryhevarã.

²⁵ Aikuaa kavi mba'etypokui peeva Tũpa huvisharã'õpe'õ ryheva ambeushu vekuare, shyreshajy verã.

²⁶ Hãrã ã'ẽ ko arape, aipota hai pee, mba'etyma oa sheãrẽ verã, mbava peeva Jesús jyrojambaheape manorã,

²⁷ shara opama ambeupe Tũpa potava, mbaimba añomivape.

²⁸ Hãrã pingareko pindijehe hareka opaite tũpaope ñymbatyvare, shara Espiritu Santo pynypyhyrõ pingarekohe verã Tũpa jytũpao, ha'ei huvypy ova vekua.

²⁹ Shara aikuaa kavi ahamarã, ouñoĩ verã yngavare, avara vasu ñarõva rãĩmi pota mby'opava tũpao.

³⁰ Hãrã pynymbyteivipo mbava pũãkui mbai ãñetembava pyrỹmboihe verã, Jesús mboireare raha verã haykue.

³¹ Pimoãpẽĩ, hareka pymanduapohe mbahapy ãño, arakuepe hareka pyharekue shysay ryheve pepenteĩ peeva apyrỹmbarakuaa.

³² Ã'ẽ shyryvyre, airureshu Tũpa jyhaihupe ñyngareko pyndyrehe verã hareka ñee haikavivapy ñyngarekopyndyrehe verã. Hai ĩmereva mbaikatu hareka meẽpe verã pyrãtakue hareka heta mbai haikaviva mbeuva rãĩmi hai ña'ãpova retape meẽ verã.

³³ Mapeã aipota pyhevi pymeẽshe verã ita vera tĩĩva, ita vera ijuva hareka mondeava.

³⁴ Kyrãte verã, sheteiva amba'apo, apity verã mba'etysheare hareka shimi'ĩrũ'iare pevarã jyve.

³⁵ Haiñoĩ apyrỹmboihe marãrapo pymba'apo hareka ikotẽvẽva pymbory verã, ñanymanduahe Ñandeja Jesús hei vekuarã: “Me'ẽã ñandevaivi javyave, mbai ñameẽrã”.

³⁶ Opama hei kovarã, Pablo ĩñesu jurure hãndi reta.

³⁷ Hãrã opa jaheo reta, kuãkuãvashu reta Pablo hareka pypytejyre.

³⁸ Hãrã opaite mbasyjyrehe shara heishu reta heshaveãma verãre. Haivi mĩ'ĩrũshu reta varko ẽvãpeve.