Hechos 19 - NandevaBiblia

Pablo oho Éfesope

¹ Apolo ẽẽ teri Corintoperã, Pablo hasa tentami retaipirã vãhẽ oho Éfesope. Haipe hesha mbovy Jesús mboireare,

² hãrã pyrãndushu reta: Me'ẽãra jyvepe Espiritu Santo pirojamarãme? Haire heishu: Henduhãã rãnga'ore ẽẽvã Espiritu Santo.

³ Hãrã Pablo pyrãndushu reta: Mãrãva ñymyngaraira pijapo? Haire heishu: Juan pyrymyngaraivape.

⁴ Pablo heishu reta: Ãñete rãnga Juan myngarai opaite heko porãmba vekuaivi ñymbeujy vekuare, tẽvã heishu kuaretare jyrojahe verãkui hai haykue ou verã, hokava jaishu Jesús.

⁵ Kova mbai hendu retarã ñymyngarai reta Ñandeja Jesús heepe.

⁶ Haivi Pablo ipo ñono'ĩãre retarã, Espiritu Santo ou ĩãrẽ reta hareka ñee yngaivapy ijeta retarã mbeu reta Tũpa he'ikava ñee.

⁷ Opaite ñymyngaraivare ẽẽmba haipe 12 kuimbai.

Pablo iko'i Éfesope

⁸ Pablo mbahapy jasy kavimba oho Judiore ñymbatyseape, haipe kyjembape mbeu Ñee hareka õñehãã mbyrojaka jyve kuaretare Tũpa huvisharã'õpe'õ ryheva.

⁹ Tẽvã a'ãmore pya mytãta hãrã ñatẽy roja reta, hareka ijeta porãhe reta Tape Py'ahuva kuaretare hỹnonde. Hãrã Pablo syryshi reta hareka raha mbo'ehareare pente kuareta Tirano he'iashua pyrỹmboi'õpe. Haipe opa ara ijetashu reta.

¹⁰ Mokue ãño kavi kyrã japo, hãrã opaite ikovare yvy Asiape, hendu Ñandeja ĩñee.

¹¹ Tũpa hetamba japo mbai heshaha verã Pablo rupii,

¹² tarapo hareka mondeava Pablo hetere oja vekua rahaha ñonohahe ñymbairasy vekuare, hãrã haire opa kuerahe ñymbairasykue, hareka mbaiposhyre opa õheshi reta.

¹³ Tẽvã ĩme'ẽ Judiore vatarei'iare mbaiposhyre kuareta retaivi mohe jyreare pota poryjyre Ñandeja Jesús hee, hãrã hei reta mbaiposhype: Jesús, Pablo mbeu'ia heepe hai pee, pẽhẽshivi!

¹⁴ Hokava japo Judio Esceva he'iashuva tay 7 õre, hai jyve paire juhuvisha penteva.

¹⁵ Tẽvã mbaiposhy ĩjetarã mbyhovairã hei: Aikuaa rãnga Jesús, hareka aikuaa mbavara hai Pablo, tẽvã, peera mbava?

¹⁶ Haipe ko kuimbai mbaiposhy ĩmerevekua opohe reta, pyrãtãkuepe jepyhe reta, hãrã nanitei ñyvãhẽ reta haivi, hareka opa mbypepere reta.

¹⁷ Opaite Éfesope'iare, Judiova hareka haimba Judiovare, kuaama reta kovarã opa kyje reta hareka õmomba'ea vasu Ñandeja Jesús hee.

¹⁸ Heta haipe hãirã jyrojavare ñymbeujyrã mbeu reta mbai porãmba arykai japo vekuare,

¹⁹ hareka opaite paje'iare veru jykuatiare opa hapyka kuaretare hỹnonde. Haipe pya mbijeta ñynoihe reta kuatia hepykuerã, hipity 50 mil kyrypoti nikere!

²⁰ Kyrã Ñandeja ĩñee ñymbyhetave oho hareka heshaka ñymbaikatukue.

²¹ Kova mbai opama hasarã, Pablo hei oho verã tenta Jerusalenpe, hasa verã Macedoniaipi hareka Acayaipi. Haivi heijy haipema'ẽrã oho verãjy Romape.

²² Hãrã mondo mokue mborysereare Macedoniape, Timoteo hareka Erasto, hai pytave teri ẽẽ Asiaperã.

Porãmbava tivishava iko Éfesope

²³ Hokava arape tape py'ahuva rehe, iko porãmbava tivishava,

²⁴ hokava japo pente kuimbai Demetrio he'iashua, kyrypoti verava tarã'ãnga japo'ishia. Kova kuimbai japo ta'ãnga mishĩvamire Tũpa Artemisa ryheva, hareka heheta kyrypoti pysy'ĩãrẽ reta mba'apo'i hãndiare.

²⁵ Mbatyka mba'apo'i hãndia retarã heishu: Karaire, pee rãnga pikuaa kova jajapova rupii jaiko katurã.

²⁶ Tẽvã pyhesha hareka pyhenduva rãĩmi, Pablo hei kuareta japova Tũpa rã'anga haimbava Tũpa; kyrã hetavape heirã roja, ha'ẽã ko Éfesopeĩ ajete rãnga opaĩ tenta Asiaipi.

²⁷ Kova rãnga porã'ãĩte, shara ñavendeñaĩva katu oparei ñandyhevikui, hareka kyrãĩpo jehujyshukui tũpao opa rupi kuaahava Tũpa Artemisa, hareka opareiiposhi Tũpa taupe hã'ãnga omomba'eava, hai hokava õmombaiva opa Asia jy'yvyipi hareka yvy jerekue.

²⁸ Hendu reta kovarã, poshyite jyre hareka sapuke reta: Tiko puku Diana Efesiovare ñu Tũpa!

²⁹ Ikoma kuavẽãpy reta, opa ikorai reta hoka tentape'õre, pysy reta Gayo hareka Aristarco, mokue kuimbai Macedoniava mĩ'ĩrũ jyreva Pablo, hareka mbytyryry raha reta oo vasu ñymbatyhase'õpe.

³⁰ Haipe Pablo pota iche'i kuaretare ijetashu verã, tẽvã Jesure mboireare ma'ẽĩãhe iche.

³¹ Haaipe'ẽẽ jyve mburuvishare Asiape'õ, Pablo ñi'ĩrũre haihushuva, mondokashu ñee potamba iche verã haipe oo vasu ñymbatyhaseape.

³² A'ãmo haipe ñymbaty'õre sapukerã yngai hei'i, ĩrũre kyrãĩjy yngai hei'i, shara kuaretare kuãã japo verã opa ikorai reta hareka a'ãmore kuãã reta mbai verãra ñymbaty reta.

³³ Hãma kuaretare mbyteivi nohẽ reta pente kuimbai Alejandro he'iashuva, Judiore maña mondo reta kuaretare hỹnonde. Hãrã Alejandro ipope myha'ãnga jasaka verãre, ijeta verã Judiore rehe henta'õre hỹnonde.

³⁴ Tẽvã kuaama reta hai Judiovarã, opa sapuke reta mokue ora pukukue: Tiko puku Diana Efesiovare ñu Tũpa!

³⁵ Hãrã mbapara'õva hoka tentape, kuaretare opama mbijasakarã hei: Opaite Éfesovare, opaite ko yvy jerekue kuaa ko tenta Éfeso ẽẽ ipope ñyngarekohe verã ko tũpao Tũpa Artemisa hareka ha'ãnga, vate araivi vejyva.

³⁶ Mba'ety rãnga teri ko heiva ãñetembaje'i, hãrã piñymbypya vapyĩ hareka avy pijapo maĩnunga pypya pimbijeta kavimbaterihevape.

³⁷ Shara kova kuimbaire pee peruva, mba'ẽã japo reta, jaheãvãĩjyhe reta ko Tũpa Artemisare.

³⁸ Hãrã Demetrio, maĩrã mba'apo hãndivare ĩmere hei verã hapisharerã ha'ẽrã ẽẽ mburuvisha pirĩmbivache'ia; toho ẽvãpe tijeta hãndi.

³⁹ Pee jyve ĩmepyre pirure verãrã, katupo jaijetahe ñymbatyha'õpe mburuvishare hãndi.

⁴⁰ Shara katupo he'ia ñandyrehekui opa ñapũãva mburuvishare. Hareka pyrãndu ñande mãrã'irãra opa pikorai, jaikuãpokui jaishu verã.

⁴¹ Hãrã kova opama heirã, ñymbatyvare opajy oho.