Hechos 16 - NandevaBiblia

Timoteo mi'ĩrũ Pablo

¹ Pablo vãhẽ oho Derbe hareka Listraperã haipe hesha pente mbo'eharea, Timoteo he'iashua, pente taupe Judiova memby ko taupe jyrojava jyve Jesús Cristore, tẽvã tuu hai Greciape'õ.

² Jesure jyrojavare Listra hareka Iconiope'õre mandua kavihe Timoteo,

³ hãrã Pablo pota Timoteo oho hãndi ohovaipi. Tẽvã tynonde pire chĩchĩkashi, potãã Judiova haipi'iare poshy ñynoĩrã, shara haire kuaa kavi tuu Greciape'õrã.

⁴ Opaite tenta hasava retaipi, meẽ kuatia pente ñeepe Apostolre hareka tũpaope mĩñaka'iare Jerusalenpe'õre mbypara vekua, opaite kuaretare japo verã.

⁵ Hãrã jyrojava tũpaope'õre, ñymỹpyrãta oho jyrojakuepe hareka opa ara ñymby hetave oho py'ahu jyrojavare.

Pablo hesape'ẽ pente kuimbai Macedoniape'õ

⁶ Hasa jyraha reta Frigia hareka Galaciape, shara Espiritu Santo ñonoãshu reta mbeu verãre Tũpa ĩñee Asiape.

⁷ Vãhẽma jyraha Misiaperã, pota jyraha jyre Bitiniape, tẽvã Jesús jy Espiritu ñonoãshu reta.

⁸ Hãma hasa reta Misia jurirã, oho reta Troaspe.

⁹ Haipe Pablo pyhare hesape'ẽ pente kuimbai Masedoniape'õ ñymbou'ẽ hareka jurureshu: “Ei Macedoniakyty, yrỹmboryvei”.

¹⁰ Haivi Pablo heshama hesape'orã, opa ravẽi õĩã kavi ohoha verã Macedoniape, shara kuaaha kavi Tũpa ỹrỹrẽno haipe ohoa mbe'ua verã Ñee kavivarã.

¹¹ Hãma ohoha varkope Troasvirã, symyĩ ohoha Samotrociape, hãmã ĩrũ arajyape vãhẽhã ohoa Neapolispe.

¹² Haivi ohoajy Filipospe, hai tenta tynonde'õ Macedoniape. Haipe mbovy ara pytaha.

¹³ Pente putu'uava jy'arape õhẽhãshi tenta vãsu ohoha yy syryva hyvache, moa haikavi jurureha'ẽ verãpe, vapyha ijetahashu taupere haipe ñymbaty'õre.

¹⁴ Hãrã pente taupe Lidia he'iashua, tenta Tiatirape'õ mondeava pynta hũũva hepyva õvẽnde'õ Tũpa õmombai'ia, jasaka kavi'ẽhe Pablo ijeta'ẽrã, hãrã Ñandeja peashu pya jasaka kavihe verã Pablo hei'õva.

¹⁵ Hai ñymyngaraima henta ĩrũre hãndirã, jurure'asy orerã hei: Ãñeteĩte pyroja she airojava Ñandejarerã, pekua pypytave shyrẽtape. Irĩmiñerã'i yryrahapeve hentape.

Pablo hareka Silas mbyperesoha

¹⁶ Pente arape ohoha ñymbo'eharã, haipe heshaha pente kuñataĩ jokueha'reirea ñymbai kuaa'ia ñyvãĩtĩhã hãndi. Hai heta mbykyrypoti ijarãreare, ñymbai kuaa'irã.

¹⁷ Kova kuñataĩ ou iripii hareka Pablo, sapuke: Kova kuimbai reta rãnga hai Tũpa vate õ jokueva, haire mbeupe ohojepeva hape.

¹⁸ Hãrã heta ara kova japo'i. Pablo henduseveãma heivarã, jerepyrã heishu mbaiposhy taupe iko'ipya: She hai nde Jesucristo heepe, ẽhẽshi ko kuñataĩ! Hãrã haipevaĩ mbai porãmbava õhẽshi ko kuñataĩ.

¹⁹ Kova kuñataĩ jokuereare heshama katuveamapo kyrypoti heky retarã, pysy reta Pablo hareka Silas, hãma raha huvishare hỹnonde, plazape.

²⁰ Haipe heishu reta huvishare pirĩmbivache'ia: Ko kuimbaire haitẽjyve Judavare, opa myporãã ñynoĩ ñanyrẽta,

²¹ haire pyrỹmboihe jypykuava rãĩmi kuaahamba'oreva hareka ore Romavare porãã japoha verã.

²² Haipema henta'ore ñymbyvaishohe reta, hareka huvishare heishu myndoroshi verãre mondeva hareka nupã verãre yvyrape.

²³ Hetama nupa retarã, raha mĩje reta pyrỹmbyperesoavape, hãma haipe'õ huvisha, heishu ñyngareko kavihe verãre.

²⁴ Hãma kyrãma he'iashurã, haipe ñyngareko'õ, raha huvakyty, ñonohẽ reta ipyre yvyra miñyvỹhava.

²⁵ Tẽvã pyhare mbytepe Pablo hareka Silas ñymboiñynoĩ retarã hareka pyraheshu reta Tũpa, haipe ĩrũ mbyperesoareare jasaka ñynoĩhe reta.

²⁶ Haivi sapy'ãĩ hỹnatu yvyryry hãrã opa my'õmy oo jypyre, õchere opa jypea hareka mbyperesoareare opa jerashi kadenare.

²⁷ Haipe sareko huvisha haipe ñyngareko'õrã, heshama õche opaiteva jypea ohorã, heky jykyse ijuka verã, shara hei pyape, mbyperesohavare opama ñemiva.

²⁸ Tẽvã Pablo sapukerã heishu: Avy japo ndijehe porãmbava! Opaĩ ĩmehã'ẽ kope!

²⁹ Haipe veruka pente sapepy verã, ñani oho oo hapype, opa ryryrã ĩñesu Pablo hareka Silas hỹnonde.

³⁰ Katoape raha retarã, haipe pyrãndushu: Karaire, mbaivarapo ajapo ahajepe verã?

³¹ Haire heishu: Jyroja Ñandeja Jesucristore, hãrã reohojepe hareka jyve nyrẽtape'õre.

³² Haire mbeushu Ñandeja ĩñee, hareka opaite hentape'õre.

³³ Hoka orapevãĩ pynturã, hai raha joheshi mbypereha vekuaipi, haipevãĩ hai hareka hentape'õre ñymyngaraika reta.

³⁴ Haivi raha hentape myngaru verãre, hareka vya henta ĩrũre hãndi, Tũpa jyrojamavehe retarã.

³⁵ Kõĩmarã huvisha pirĩmbivache'ia mondo syndaro ñyngareko'i pyryrehevare he'ikashu verã mbyperesoava ñyngareko'iheare juhuvisha: Opa mohẽjy hokava kuimbaireta.

³⁶ Haipema mbyperesoavare ñyngareko'ihea juhuvisha heishu Pablo: Huvisha pirĩmbivache'ia reta rãnga he'ika she apyrỹmohẽjy verã, hãrã katuma pypyavapy ryheve pehojy.

³⁷ Pablo heishu reta: Opavare hỹnonde rãnga ũrũnupãhã mãĩ kavimba yryrehevape hareka ỹrỹmbypereso reta Romavatẽ oreva. Hãmera ã'ẽ pota ñemĩapeĩ ỹrỹmondojy reta? Kyrãã rãngapo! Hairetateiva rãngapo ou ỹrỹnohẽjy verã.

³⁸ Haipema syndaro ñyngareko'i pyryrehevare ohojy mbeushu reta huvisha pirĩmbivache'iare, heishu Pablo hareka Silas Romava retãrã. Kova hendurã opa myngyje reta.

³⁹ Haipe ou heishu reta Pablo hareka Silas haire mbasyva japoheare. Haivi nohẽjy retarã jurureshu õhẽ verãre tentaivi.

⁴⁰ Õhẽma pyrỹmbyperesoha õĩvirã Pablo hareka Silas oho reta Lidia hentape, haivi Jesure jyrojavare heshamarã hareka opama mykyrẽyshu retarã, oho haivi.