Hechos 15 - NandevaBiblia

Jesucristo ryhevare japo ñymbaty vasu Jerusalenpe

¹ Hãrã vãhẽ ou kuaretare Judeaivi, Antioquiape õñepỹrõ mboishu reta Jesús jyrojaheare, pire chinchĩhambava Moisés heiva rãĩmi, katũãpo ohojepekui.

² Pablo hareka Bernabé pya ohoãhe reta, hãrã hokava rehe heta mbai hei ijupe reta. Hãma Tũpa jyrojaheare Antioquiape'õre mondo reta Pablo hãndi Bernabé hareka ynga reta mi'ĩrũ verã Jerusalenpe, kova mbai rehe jyraha apostolre hareka kuakuavare ẽvape ijetahe hãndi verãre.

³ Tũpao Antioquiaivi mondohavare hasa reta Feniciaipi hareka Samariaipi. Haipe Judio Tũpare jyrojavare mbeu marãra haimba Judiovare opa poishi arykai roja vekuare hareka pya hei jyve reta roja verã Tũpa. Kova ñee henduma retarã vy'a jyre.

⁴ Vãhẽmã jyraha Jerusalenperã, Apostolre hãrã kuakuava tũpaope'õre hareka Tũpa hope ñymboivare myvãhẽ kavi reta. Haipe Pablo hareka Bernabé mbeu kavishu reta opaite Tũpa japova haire rupii.

⁵ Tẽvã a'ãmo fariseo Jesús jyrojaheare, puã reta hareka hei reta: Ẽẽñoĩ rãnga ẽẽ pyreheva chĩchĩhaka verã hareka hekope kavi japoha verã Moisés mbypara vekua.

⁶ Hãrã ñymbaty reta Apostol hareka tũpao mĩnãkã'iare, kuaa verãre kova, mbaivara Ñanderu Tũpa pota.

⁷ Hetama ijeta pohy ijupe retarã, Pedro ñymbourã heishu reta: Shyryvyre, pee pikuaa Tũpa jypyivivãĩmba pynymbyteivi shypyhyrõ ambeu verã Ñee kaviva, jyrojambare hendu verã hareka roja verã.

⁸ Tũpa rãnga opa kuaa ñandypyape ẽvãre, hai haihu jyveshu haimba Judiore, meẽ jyveshu haire pevarã Espiritu Santo meẽ ñandea rãĩmi.

⁹ Tũpa rãnga mbivavyã haire ẽvã hareka ñande, shara opaĩ johejyveshu reta pyare jyrojavehe retarã.

¹⁰ Marã'ĩrãra akuarã Tũpa pypyare mokuepishu, pota mbo'ehareare haimba Judiore pĩñono pyrehe mãinunga pohyva, ñande hareka ñanytynondevare katumba jepyheva.

¹¹ Tẽvã ñande jairoja Ñandeja Jesús jyhaihukue ryheverã japitymapo ñymondo jepe, haire rãĩmi.

¹² Hãrã opaite ñymbaty õre opa chirĩrĩ reta, jasakahe reta Bernabé hareka Pablo ĩñee, mbeu ñynõĩshu mbaikavi hesha verã Ñanderu Tũpa japo vekua hai reta rupii haimba Judiovare mbyteipi.

¹³ Opama chirĩrĩ retarã, Jacobo hei jyveshu reta: Shyryvyre shyrẽndupi:

¹⁴ Simón Pedro mbeuma jyve marãra Ñanderu Tũpa vãhẽ jyveshu haimba Judiore, hareka pyhỹrõ jyveshu reta ikoshi verãre henta ĩrũrã.

¹⁵ Jyvavyã rãnga Tũpa ĩñee mbeu'iare heirã vẽkua:

¹⁶ Kova mbai opama hasarã aijy pokui, amupũã py'ahujy verã David tavernakulo opa oa vekua, ajakatujy verã ñymbai vekua, opa amupũãjy verã.

¹⁷ Hareka kuaretare yvy'ĩãrẽ'ẽvãre hekashu verãre Ñandeja, haivi ñymbyhetave verã shyreepe pyhỹrõãvare.

¹⁸ Kyrã hei Ñandeja, kova mbai japova kuaaha aryka'eitevaĩ, meẽmava ĩñee.

¹⁹ Hãrã hai pee, ỹteñoma ñañonoshu verã mbai pohyva haimba Judiore, Tũpa jyrojaheare.

²⁰ Koñeĩ ñambyparashu reta kuatia hareka jairureshu avy hou verãre soo ynga tentape'õ ñutũpare pevarã, avy iko verãre omendambape, avy tou reta mymba javokava hoo hareka huvy.

²¹ Shara opaite tenta retaipi rãnga, mbijetañõĩmba aryka'e Moisés mbypara vekua, sabadope Judiore ñymbatyseape.

²² Hãma Apostolre, tũpao ñakarã'õre, kuakavare hare opaite tũpaope'õre mbyteivi pỹhỹro reta Judas, mbyheavajy Barsabas hareka Silas mondoha hãndi verãre Pablo hareka Bernabé Antioquiape. Judas hareka Silas kuimbai hekokavivare pente'ova Tũpare jyrojavare.

²³ Hãrã mbyrahaka reta ko kuatiape heiva: Ore Apostol, kuakuavare tũpao ñãkarã'õre hareka jyve opaite kope tũpaope'õre, pynymarãnduha opaite yryryvyre, haimba Judiovare, pee tenta mbyryva pikova Antioquia, Siria hareka Ciliciape.

²⁴ Ore henduha ỹrỹmbyteivi ohova yryryheva, oremba me'ẽãshuva ñee opa porãã japopy reta haire pyrỹmboiheva.

²⁵ Hãme rãnga pente ñeepe õiharã pyhỹrõhã kuimbaire pẽĩvape mondoha verã, haihuhava Pablo hareka Bernabé hãndi,

²⁶ haire kyjeã ñono reta hykove Ñandeja Jesucristo heepe.

²⁷ Hamẽ rãnga mondoha Judas hareka Silas, haire mbeu kavipe verã mbyparahapeva.

²⁸ Haikavi rãnga Espiritu Santope, hareka ore ñonohãã mbai pohyva pẽarẽ, koñeĩ ñanykyrẽ'ỹite jaikuavẽĩ:

²⁹ Avy peu mymba hoo me'ẽãva tarã'ãnga retape, tuvy, mymba javokahava hareka avy pypyrẽno ndeiteri pemendaheape. Haikavipo pijapokui kova pijijokoshirã. Kova haipeveima.

³⁰ Hãrã Bernabé, Pablo, Judas hareka Silas jyraha Antioquiape. Vãhẽma jyraha haiperã, ñymbaty hãndi reta tũpaope'õre hãrã haipe meẽ reta kuatia mbyparahava.

³¹ Mbijetama retarã, opa vyajy jyre shara haikavishu reta.

³² Hãrã Judas hareka Silas haireta jyve Tũpa ĩñee mbeu'ia retarã heta ñeepe mbyvyajy hareka mỹkyrẽyshu reta pente'ova Tũpare jyrojavare.

³³ Kỹỹma ñynõĩ haiperã pente'ova Jesure jyrojavare pyavapype kavi mondojy reta ojy verãre mbouvare oĩvi.

³⁴ Hamã Silas haikavivejyshu pyta verã haipe.

³⁵ Tẽvã Pablo hareka Bernabé pyta reta Antioquiape, pyrỹmboihe hareka mbeu Ñandeja ĩñee, heta ĩrũre hãndi.

Pablo hareka Bernabé pente ñeepeã ñynoĩ.

³⁶ Mbovy aramajyrã Pablo heishu Bernabé: Jahajy ñavãhẽjyshu reta jyrojavare opa tentaipi'õre Ñandeja ĩñee ñambeujai vekuaipi hareka jaikua verã mãrãra ñynoĩ.

³⁷ Bernabé jururehe Juan mi'ĩrũraha verã, Marcos he'iashua.

³⁸ Tẽvã Pablo pya ohoãhe raha verã, shara hejareimba reta Panfiliape jyrerã shara ñateỹmba jyraha hipi mba'apo verãpe.

³⁹ Hãrã haipe hetama ijeta porãã ijupe retarã, pepenteĩ opa syry ijuhuvi reta; Bernabé raha Marcos, Chipre kyty oho reta,

⁴⁰ hãma Pablo pyhỹrõ jyve Silas. Haipe Jesure jyrojavare ñonoshu reta Ñandeja ipoperã, jyrahajy,

⁴¹ hãrã hasa reta Siria hareka Siliciaipirã, tũpaope'ẽvãre opa mykyrẽỹ reta, jyrojañoĩhe verãre Ñandeja Jesús.