Hechos 14 - NandevaBiblia

Pablo hãndi Bernabé Iconiope

¹ Iconiope Pablo hareka Bernabé jypykuaañoĩ reta ichejyre reta israelitare jy tũpaope, hãrã ĩjetareta mbyrojaka verã, Judiore hareka haimba Judiore.

² Tẽvã Judiore rojambaare mbyposhyka reta haimba Judiore hareka mbyvaishokahe Jesure jyrojavare.

³ Tẽvã, Pablo hareka Bernabé pytavejyre reta haipe shara Ñanderu Tũpa jyrojahe retarã kyjemba ryheve ijeta Ñandeja heepe. Hai my'ãñete haire heiva Tũpa jyhaihu, mbai heshahava hareka mbai kavi heshaha verã rupii, haire ipoipi japova.

⁴ Tẽvã henta'iare opa ñimbijajao: Ĩme'ẽ israelvare jykoty'õ, ĩmejy Apostolre jykoty'õ.

⁵ Haipema ĩñono reta pente ñeepe israelva hareka haimba israelva hãndi mburuvisharã'õre, apostolre itape japi verã.

⁶ Tẽvã Pablo hãndi Bernabé kuaa hokavarã ñemĩ jyraha reta Listra hareka Derbe, tentare Licaoniape'õ juri.

⁷ Hãrã haipi mbeujyve reta Ñee kaviva ryheva.

Pablo itape japiha Listrape

⁸ Listrapemba'ẽẽ pente kuimbai katumba vatava oa ryheve ishy hyepe opa jajapa. Ko kuimbai vapymba

⁹ hokava jasaka'ẽhe Pablo hei ẽvãre: Hãrã Pablo maĩherã hesha jyroja katu'ẽ hareka kuera verã.

¹⁰ Haipe Pablo hỹnatu ijetarã heishu: Pu'ã hareka ñymbo'y! Ko kuimbai opotei puãrã ñymboy hãrã õñepyrõ vatajy.

¹¹ Heshama ko Pablo japovarã opavare õñepyrõ sapuke Licaoniare ĩñeepe: Tũpare vejy kuimbaire rãĩmi ñande ñaĩvape!

¹² Haivi Bernabé ñonoshu reta Tũpa Seus rãĩmi hãrã Pablo Hermes rãĩmi shara hai ijeta ẽrã.

¹³ Kova Pai Seus ĩmereva jutũpaope tentare hỹnonde icheha'õivi, veru toro hareka yvoty mymashy'ãhava hõchepe, hai hãndi kuaretare pota omobaishu reta mymba mbijichearã jukava.

¹⁴ Tẽvã Bernabé hareka Pablo kuaama hokavarã myndoro reta mondeva hareka iche mbytepe sapuke reta.

¹⁵ Kuimbaire, marã'ĩrãra kova pijapo? Ore rãnga kuareta peeva rãĩmi jyve ouha peveĩ rãnga veruhape verã Ñee kaviva, pijyhejama verã mbaimba vekuaivi, hãrã pijerejy verã Tũpa hykoveva jykoty, japo vekua ara, yvy, yyvasu hareka opaite ẽpyare.

¹⁶ Mã'ẽĩmbahe ãñete opaite kuareta arykaivare iko pota ikova rãĩmi,

¹⁷ ajemaĩ heshaka ñoĩteshu reta mbavara hai, mbaikavi japo opaiteva pevarã: Mboupe ãma, ñotyhavare myno'õha kaviva hãrã hokava meẽpeva heta peu verã hareka pyvya verã.

¹⁸ Ajemaĩ heta mbai heishu reta, tẽvã katuã jokoshu reta ỹnteñoma mymba mbijicherã juka verã.

¹⁹ Hãma Judiovare Antioquia hareka Iconiova kuaretare mbyposhykashu hareka mbyvaishokahe verã Pablo. Hãma itape Pablo japi reta hareka mõãte jykama retarã, mbytyryry nohẽ reta tentaivi.

²⁰ Tẽvã Jesús mboireare ñymbaty jyrehe Pablo. Hãrã hai puãjyrã hykuaĩ ichejy hoka tentape, hareka parejyrã õhejy hãndi Bernabé Derbes kyty.

²¹ Hãrã opama mbe'uha Ñee kaviva hoka tenta Derbeperã, heta haipe japoshi mbo'ehare verã. Kova oparã, jyraha reta Listrape.

²² Kovare ẽvãpe mykyrẽy jyshu Jesús mboireare, ñimiñẽ'ẽrã heishu reta tantai ẽẽ vẽrãre jyrojakuepe heivape shara jaiche verã Tũpa ẽvãpe heta rãnipo jahasa asy.

²³ Ñono jyve reta pepenteĩ kuakuavare ñyngareko verãre tũpaope, haivi opa jurure hareka karumbape ñynoirã hejashu reta Ñandeja ipope, haire jyroja jyvehe.

Pablo hãndi Bernabé oujy Antioquia Siriape

²⁴ Haivi hasa Pisidiapirã vãhe reta Panfiliape.

²⁵ Mbeu reta Ñee tenta Pergepe, haivi oujy reta Ataliape.

²⁶ Hãrã haivi jupi reta varkope hareka jyraha reta Antioquiape, hokava tentaivi mondohaka reta mbai kaviva pevarã hareka ñonoshu verã Tũpa ipope japo verã Tũpa japo vekua.

²⁷ Vãhẽ reta Antioquiaperã mbatyshu tũpaope'õ reta hãrã mbeushu reta opa mbai Ñanderu Tũpa japo vekua haire ipo rupii hareka marãra mbory iche verã ynga tenta haimba Judiore retaipi haire jyroja verã jyve.

²⁸ Hãrã Pablo hareka Bernabé heta ara pytavejy mbo'ehareare hãndi.