Hechos 13 - NandevaBiblia

Bernabé hareka Saulo õñepyrõ mba'apo Tũpa ĩñee raha verã

¹ Tũpao Antioquiape'õ ĩme'ẽ Tũpa ĩñee mbeu'ia hareka pyrỹmboi'iare. Haire hai Bernabé, Simón, mbyheeava jyve “Hũva” Lucio Sireneva, Manaen mburuvisha Herodes mbykuakuaheva hareka Saulo,

² Pente arape pyraheavape õmombai vasu hareka karumbape ñynõirã Espiritu Santo hei: Piñonoshe Bernabé hareka Saulo japo verã tijapo she ameẽshuva.

³ Haivi opama karumbape hareka jurureape ñynoĩrã ipo ñono'ĩãrẽ retarã ma'ẽĩhe oho.

Bernabé hareka Saulo ñimiñee Chiprepe

⁴ Hãrã Espiritu Santo mondoshu Bernabé hareka Saulo, hãrã jyraha Seleusiape haivi jupijy reta varkope jyraha Chipre kyty.

⁵ Hãrã vãhema jyraha Salamina he'iashuaperã, oñepyrõ Tũpa ĩñee mbeu reta Judiore ñymbatyseape oho jyve hipii reta Juan mborype veĩverãre.

⁶ Hãrã opama hasa yvy japua õra vãhẽ reta Pafospe. Haipe hesha reta pente Judeava pajeva Barjesus he'iashua, ñimiñee'rã'ãnga'ia.

⁷ Hoka pajeva ẽẽ hãndi haipe mburuvisha Sergio Paulo kuareta mbaikuava. Mondo hẽnõka Bernabé hareka Saulo shara kyrẽymba Tũpa ĩñee hẽndu'i.

⁸ Hãrã Barjesus, pajeva Elimas he'iashuva griego ĩñeepe, õñemõihe reta hareka õñehã'ãpaite potãã mburuvisha rojarã.

⁹ Haivi Saulo mbyheava jyve Pablo, tynyhe Espiritu Santo hãrã mãikavi'ẽherã,

¹⁰ heishu: Nde tykove japu heko porãmba Ãña tay hareka mbai kaviva ñymbyvaisho'ihea, mbaipera rypoipo rĩmbivavy Ñandeja hape symỹi kaviva?

¹¹ Ã'ẽ Ñandeja jahepo ndyrehe, ryheshavẽãpo, mbovy arapo katuvẽa ryheshakui kuarasy. Hãrã haipetei vãhẽ'ĩãrẽ pyntukue hãrã pyntuape pyta, haivi heka shambekyjy raha verã shara heshajyvyã kũvãipi.

¹² Hãrã mburuvisha ko jehuva heshamarã, roja, shara mbyrymaĩhe Tũpa ĩñee pyrymbo'eaheva ryheva.

Pablo hareka Bernabé Antioquiape Pisidiape'õ

¹³ Pablo ñi'ĩrũre hãndi jyraha varkope Pafosvi, tenta Perge Panfiliakyty, tẽvã Juan yngaty ohojyshi reta hãrã oujy Jerusalenpe.

¹⁴ Haivi hasa reta Pergeivi tenta Antioquia Pisidia kyty, haipe pente putu'uhava arape iche Judiore ñymbatyseape vapyñynõi.

¹⁵ Judiore ñymbatyseape'õ mburuvishare opama miñee Moisés mbypara vekuarã hareka Tũpa ĩñee mbeu'iare, he'ikashu reta: Shyryvyre ĩmepyre pota kope'õre pereshuvarã ã'ẽ katuma pere.

¹⁶ Hãrã Pablo ñymboyrã myhã'ãngashu reta ipope mbijasaka verã hãrã hei: Pyhendu pee kuimbai Israelvare hareka pee tenta vasu mbyryva Tũpaivi pykyjeva.

¹⁷ Tũpa Israel henta ryheva ñanytynõndevare japoshi vekua tenta tivishava ajemaĩ haire Egiptope ñynoĩ mbyryva reta rãĩmi, tẽvã nohẽjyshu reta ñymbaikatukue ryheve.

¹⁸ Tũpa jasakãĩ'ĩ ajemaĩ haire ĩñee rẽndumbapejyreshi kuarenta ãño pukukue yvy ikoambaipi.

¹⁹ Haivi opa mambai 7 tenta Canaan, jy'yvykue, meẽshu verã ñanytynõndevare jy'yvyrã.

²⁰ Opaite kova 450 ãño pukukueipi tãta ẽẽ. Haivi kova oparã Tũpa ñonõshu reta pirĩmbivacheka'iare Tũpa ĩñee mbeu'ia Samuel jy'arapeve.

²¹ Haipe jurure reta juhuvisha vasurãre, hãrã Tũpa meẽshu reta Saul Sis tay, Benjamin ryhevare, 40 ãño pukukuemba huvisharã'ẽ.

²² Hãrã Tũpa mohẽ Saul ẽvaivirã ñonoshu juhuvisharã David, heihe: “Ãvãheshu David, Isai tay, pente kuimbai she rãĩmĩ pya mbijetava, she aipotava opa japoshe verã”.

²³ Hãrã Jesús hai David ñymoñashia, hareka Tũpa mbou mondojepe verã Israelvare, Tũpa ĩñee meẽ vekua rãĩmi.

²⁴ Hãrã Jesús ndeiteri ourã, Juan ñĩmĩñeembashu opaite Israelitavare heishu reta ñymbeujy hareka ñymyngaraika verã.

²⁵ Hãrã Juan hykove japyserimãra hei: “She ha'ẽã pee pypya pĩmbijetapi shyreheva rãĩmi tẽvã shaykue ou pente jypasa ĩshãĩmba katu ajorashia”.

²⁶ Shyryvyre, Abraham ñymõñashia hareka mbyryvare õmombaivasuva Tũpa, pã'ãpova rãnga ko ñee ohojepeva ryheva.

²⁷ Jerusalenva hareka juhuvishare kuããshu Jesús, hareka kuãajy Tũpa ĩñee mbeu'iare ĩñe'ẽkue mbijetava Judiore ñymbatyseape putu'uhava arape. Hãrã hai retatei ñonovaimashu Jesús, japohe reta ñĩmĩñee'iare jykuatiape ẽvekuarã.

²⁸ Heshambatẽheare mbai reherapo katu jukaha, jururembashu reta Pilato juka verã.

²⁹ Opakavimã iko kuatiape mbyparaha heihevarã, mbyvejy reta kurusuivi hãrã ñoty.

³⁰ Tẽvã Tũpa mũpũajy manovare mbyteivi.

³¹ Haivi heta aravape Jesús ijeshakajyshu mi'ĩrure vekuare Galileaivi Jerusalen kyty hãrã haire mbeujyveshu tentare hỹnonde.

³² Kyrã ore mbe'uha jyve pee Ñee kaviva Tũpa ĩñee meẽ vekua ñanytynõndeva retape.

³³ Tũpa opa japo ĩñee meẽ ñande vekua, ñande haijyveva ñymoñashia, mynguerajyshu verã Jesús, heiva rãĩmi Salmo mokueheape: “Nde hai shyray ko arape she ãrĩmĩmoña vekua”

³⁴ Tũpa heimba mynguerajy ñoipo Jesús manovare mbyteivi hetekue ñymbaimba verã, heijy kuatiape mbyparahava kyrã: “Ameẽpojyvepe jyparekokue añeteva David ãmbeushuva rãĩmi jyve”.

³⁵ Hãmẽ rãnga ynga Salmokyty heijy: Nde ryhejãpo ñymbai heko kaviva hetekue.

³⁶ Ãñeteara David opa kavi japo hẽta ĩrũre mbytepe, Tũpa potavarã, mano hãrã ñotyha tuu tynõndeshivekuare hãndi haivi hetekue opa ñymbai.

³⁷ Tẽvã Tũpa mynguerajy vekua hetekue tujuã hai.

³⁸ Shyryvyre pikuapo Jesús rupii mbe'uha mbai porãmba hejaha reiva ryheva

³⁹ Hãrã Jesús rupii ñymbyheko kaviva opaite jyrojaheare hareka opaite katumba ñymbyheko kavi vekua Moisés jykuatia rupii.

⁴⁰ Pimoãshi avy toa peãrẽkui Tũpa ĩñee mbeu'iare ñono vekua kuatiare:

⁴¹ Pymãĩ katu ñymbyhoryĩ'i vekuare, mbyry pymãĩva hareka piñemi shara she hai Tũpa ajapopo pyndy'arape mbaivasu pyrojamba verã ajemaĩ ĩmetẽ mbeupe verã.

⁴² Hãrã Pablo ĩrũre hãndi õhẽma Judiore ñymbatyseaivirã kuaretare jururejyshu ĩrũ putu'uava arape ijetajyheshu verã kova.

⁴³ Hãrã opama ñymbatyvarã, heta Israelitava hareka tenta mbyryva hekopekavi jyrojaheva Tũpa mĩ'ĩrũshu Pablo hareka Bernabé, haivi ijetashu reta tãnta jyroja ñynoĩ verã Tũpa jyhaihupe.

⁴⁴ Ĩrũ semana putu'uava arajyape, ajete pente tenta'õre opaĩ ñymbaty hendu verã Ñandeja ĩñee.

⁴⁵ Tẽvã Israelitare heshama hetaite kuareta ñymbatyvarã, oñepyrõ põrãa hei jyrehe Pablo hareka heheijyreshu.

⁴⁶ Tẽvã Pablo hareka Bernabé pyavasu ryheve ijetarã heishu reta: Pee Israelitarãni pynymbykuahatẽ verã ko Tũpa ĩñee, tẽvã potãã pypysyrã kova tykove opambava ryheva. Hãrã ã'ẽ ohoapo ñimiñẽ'ẽashu haimba Judiore.

⁴⁷ Shara kyrã hei ore Ñandeja, heirã vẽkua: Arĩñono opaite tenta vasure sapehe verã, ryraha verã ñymondo jepeva ryheva opaite yvy japyva retaipi.

⁴⁸ Judiombare kova hẽndumãrã, vy'a jyre hareka hei reta Ñandeja ĩñee haikaviva; haivi opaite hipity verãre tykove opambava, roja reta.

⁴⁹ Kyrã opaite hokava tenta jerekue mbe'uha Ñandeja ĩñee.

⁵⁰ Tẽvã israelvare ijeta hãndi taupere hekokaviva hareka hyrãkuakavi'ia karaivasure hoka tentape'õre hãndi, ijeta hãndi huvisha tentape'õre jyvaishohe Pablo hareka Bernabé mohẽ verãre jy'yvyivi.

⁵¹ Hãrã Pablo hareka Bernabé mytymõhe reta ipyre'õ yvy timbo, hãrã jyraha Iconiope.

⁵² Tẽvã Jesús mboireare vy'ajyre hareka tynyhẽ Espiritu Santo.