Hechos 12 - NandevaBiblia

Jacobo mano hareka Pedro raha mbyperesoha

¹ Hoka arape mburuvisha vasu Herodes õñepyrõ moñakashu a'ãmo tũpaope õre ryheva.

² Hãrã mondo jukaka Jacobo kyse pukuvape, Juan tyvy,

³ heshamahe Judiore haikavijyveshu hokavarã, pysykajy Pedro. Kova jehu aretepe, pãhã jylevaduramba ho'uava arape.

⁴ Hãrã Herodes pysykama Pedrorã, mĩje karcepe hãrã mĩngarekokahe urũndy jaty'õ syndarore urũndy syndaro pepenteĩ'ẽva, pya mbijetahe Pascua hasamãrã nohẽka verã tenta hỹnonde.

⁵ Hãrã Pedro karcepe teri'ẽ ñyngarekoha'ẽheape, tũpaope ẽvãre jurure pevẽĩ ñynoĩhe Tũpape.

Tũpa nohẽshu Pedro karselvi

⁶ Haivi Herodes nohẽjyvyĩma'ẽ verã pyharepe meẽ verã henta'õre ipope, Pedro oche'ẽ mokue'õ syndarore mbytepe, tãnta pokuahavape mokue kadenape, hareka ĩrũ syndarore katoape õnchepe ñyngareko'ẽhea karcel.

⁷ Sapy'aĩ ijeshaka Ñandeja jokueva hareka hĩmbipekue opa mykõĩ'ipe pyrỹmbyperesohaseape. Tũpa jokueva Pedro pokoherã, mombarã hei: Narẽã pũ'ã! Hãrã haipe kadenare opa oashi Pedro papyivi.

⁸ Hãrã Tũpa jokueva heishu: Jokua ndukua hareka mondejy ndypasa. Opa kyrãã japorã Tũpa jokueva heijyshu: Mombo ndijehe rijasoiva hareka ei shaykue.

⁹ Hãrã Pedro oho Tũpa jokueva haykue, kuaamba ãñetera maĩrã ha'ẽara Tũpa jokueva. Shara mõãte jypaihupẽĩ heshava.

¹⁰ Tẽvã hasareta tynonde'õ hareka mokuehea, ñyngareko ẽvãĩpirã vãhẽ jyraha õche hiero jepei'õ pe'ahava tenta kyty, hareka opaite õche ijuhuvima jypea. Õhe reta ãrẽ'ãĩte hareka vataha'õipi penteva hasamarã, haipe Tũpa jokueva mã'ẽĩmahe Pedro ha'ẽĩ.

¹¹ Pedro kuaama mondo ikovarã hei: Ã'ẽ aikuama ãñete Ñandeja mbou jokueva shyreka hareka shynohẽjy verã Herodes ipoivi, hareka opa mbai Judiore japotẽ shyrehe verã.

¹² Kova kuama mondo Pedrorã, oho Maria hentape, Juan ishy mbyheeava jyve Marcos, haipe heta kuareta ñymbaty'õre jurure ñynõĩ Tũpape.

¹³ Haivi pe kyty'õ õnche nunuparã, õhẽ pente kuñatãĩ Rode he'iashua hesha verã mbavara.

¹⁴ Tẽvã haipe Pedro ĩñee kuarã vy'aiterã õche ohote peava; haivĩ jyrovarã ñanijy oho oo'ipe mbeu verã Pedro õchepe'ẽva.

¹⁵ Hãrã opaite oo ipe ẽvãre heishu: Rikuakuãrari! Tẽvã hai heijyvyĩ haiñoĩva. Haireta katy heijyvyĩ reta: Ha'ẽã rãnga ãmo; Tũpa jokueva rãnga.

¹⁶ Haipe Pedro ĩmeĩ nunupa teri'ẽ õche, peamã retarã opapavẽĩ hesharã mbyrymaĩ reta.

¹⁷ Tẽvã Pedro ipopei myha'ãnga heishu reta jasaka verãre, haivi mbeushu reta marãra Ñandeja nohẽjy mbyperesoavaivi, hãrã heishu reta: Pikuaaka jyveshu Jacobo hareka opaite ñandyryvy ñandyryhevare. Hãrã õhẽ hareka oho ynga tentaipi.

¹⁸ Koĩma ourã, syndarore opa ikorai reta, kuãã mbaivara iko hareka mbaivara ikohe Pedro.

¹⁹ Hãrã Herodes mondo hekakashu Pedro, tẽvã heshããma retarã, pyrãndujy opaite ñyngarekohe vekuare hareka haivi jukakashu reta. Haivi Herodes õhẽ Judeaivirã oho pyta Cesareape.

Herodes manorã vẽkua

²⁰ Herodes poshyshu opaite kuareta Tirope õre hareka Sidon, tẽvã haire pente ñeepe ñynoĩ jyveru verã hai ẽvãpe, Hareka meẽreta kyrypoti Blastope ijeta kavihe verãre. Blasto hai huvisha vasu Herodes hentape mboryrea vate'õ, hãrã jurure reta ẽejy verã pya vapy, shara haire nohẽ reta hou verãre mburuvisha jy yvyivi.

²¹ Herodes ñonoshu reta mbai araperapo ou reta hai ẽvãpe, hareka hokava arape monde mondehava mãshyava hãrã vapy'ẽ huvisha vasure vapysepyape ñimiñeeshu reta.

²² Hãrã opaite kuaretare sapukerã hei: Ko ijeta'õ ha'ẽã kuareta, kova hai Tũpa!

²³ Haipevãĩ pente Tũpa jokueva mbypere, shara õmomba'ẽãshu Tũpa, hãrã Herodes hasorã mano.

²⁴ Tẽvã Ñanderu Tũpa ĩñee mbe'uhave rahaha hareka ñymbyhetave oho.

²⁵ Bernabé hareka Saulo opa japo verãrã, oujy reta Jerusalenvi hareka veru reta Juan, mbyheeava jyve Marcos.