Hechos 11 - NandevaBiblia

Pedro mbeu kavishu Jesús jyrojaheare Jerusalenpe'õre

¹ Apostol reta hareka opaite ñandyryvyre Jesús jyrojahea Judeape'õre, hendu mãrãra haimba Judiore myvãhẽ jyve Tũpa ĩñee.

² Hãrã Pedro oujyma tenta Jerusalenperã, ĩme'ẽ Jesús jyrojahea Israelitavare oñepyrõ ijeta pohy ijupe hãndi reta.

³ Hãrã pyrãndu jyreshu: Marã'ĩrãra reho rypohyshu haimba Judiovare hareka rykaruri hãndi reta?

⁴ Hãma Pedro opa mbeushu oñepyrõaivive opava mbai ikovekua.

⁵ Tenta Jope he'iashuape Tũpa airure ãĩshuape shyresape ou: Ahesha pente tarapo tivishava rãĩmivã, jokuahava urũndy japy retaivi, vejy vate araivi she ãĩvape.

⁶ Ãmaĩ kavi ahesha verã mbaivara hapype ẽẽ, haipe ahesha mymbare ipy urũndyvare, mymba ñarõva, hyereĩ vatavare hareka vyrare.

⁷ Haivi ahendu pente ijetashea hei: Pedro, pũã “juka hareka he'u”.

⁸ Hãrã haishu: Mba'ety Sheja, penteã rãnga maĩnunga kyava shi jurupe ãmĩnje.

⁹ Haivi vate araivi ijetava heijyshe: “Tũpa opa johevare, avy nde ereshu kyava”.

¹⁰ Mbahapy kavi kyrã hoka jehu, haivi opa hupiajy vate arape.

¹¹ Haivi mbahapy kuimbai mbouha vekua Cesareaivi shyreka verã, vãhẽ jyveru aiko'aivape.

¹² Hãrã Espiritu Santo heishe aha hãndi verãre kyjembape, hãrã oho jyve shendie 6 ñandyryvy Jesús jyrojaheare, opaiteva icheha pente kuimbai hoo ipe.

¹³ Hai mbeu ore mãrãra hoo'ipe hesha Ñanderu Tũpa jokueva, ñymbou hyvacherã hei: “Mondo rijokuevare tenta Jope he'iashuape hareka veru nde verã pente kuimbai Simón he'iashua, mbyheavajy Pedro

¹⁴ hai heipo ndekui marãra katu rehojepe ndee hareka nysanjayre hãndi”.

¹⁵ Añepyrũmã aijetarã Espiritu Santo vejy'ĩãrẽ reta, jypyite vejy ñaneãreva rãĩmi.

¹⁶ Haipe shymanduahe Ñandeja heirã vẽkua: “Ãñeteara Juan yype pyrỹmyngarai, tẽvã pee pynymyngaraihapokui Espiritu Santope”.

¹⁷ Tẽvã Tũpa meẽ jyveshu reta ñande mẽ'ẽha ñandevekua rãĩmiva Ñandeja Jesucristo jairojamãherã, mbavaraposhe ãñemoihe verã Tũpa?

¹⁸ Henduma reta kovarã, opa chĩrĩrĩ hãrã õmombai reta Ñanderu Tũpa hei: Haimba Judiova reta'ẽẽĩmba jyveshu oujy verã Tũpape hejahareishi verãre mbai porãmba japo vekua, hipity verã tykove opambava!

Antioquiape õre jyrojava Jesure

¹⁹ Haivi Esteban jukahamarã õñepyrõ pũãhe reta Jesús jyrojaheare, hãrã a'ãmore ñyvãhe Fenicia kyty, Chipre hareka Antioquiape, mbavamba ijetajyheshuare Ñee Kaviva koñeĩ Judiova retapeĩ.

²⁰ Tẽvã ĩme'ẽ a'ãmo hai retava ouva Chipreivi hareka Sireneivi, vãhẽma jyraha Antioquiaperã õñepyrõ ĩjetaheshu reta haimba Judiova retape, ñee kavi Ñandeja Jesús ryheva.

²¹ Ñandeja ñymbaikatukue ẽẽ hãndi retarã, hetamba'ẽ rojavare hãrã hejava heko arykaiva rojava, haivi jyrojajyva Ñandeja.

²² Tũpao Jerusalenpe'õre kuaama kyrã mbe'uharã, mondo reta Bernabé tenta Antioquiape.

²³ Bernabé vãhẽ oho Antioquiaperã hesha marãra Tũpa maĩkavihe retarã vya'i, hãrã opaiteva mykyrẽy verã heishu reta roja katu ñynoĩ verãre Ñandeja.

²⁴ Bernabé haimba pente kuimbai heko kaviva, tynyhẽvã Espiritu Santo hareka jyrojakue. Hãmemba heta'ẽ kuareta jyrojahea Ñandeja.

²⁵ Haivi Bernabé oho Tarsope veru verã Saulo, heshamarã raha tenta Antioquiape.

²⁶ Haipe pyta hareka ñymbaty hãndi reta tũpaope'õre pente ãño kavi, hetava kuareta mboishu reta. Hareka ohojy tenta Antioquiape haipemba tynõndeite oñepyrõ mbo'ehareare mbyheheharã he'iashu reta “Cristo jyrojahea”.

²⁷ Hokava arape a'ãmo Tũpa ĩñee mbeu'iare oho Jerusalenvi tenta Antioquia kyty.

²⁸ Haipe haire mbytepe pente ñymbou Agapo he'iashua, Espiritu Santo rupii mbeu, ou verã ñymbahy vasu opaite yvy ikoava retaipi, hokava iko Claudio huvisha vasurã'ẽ Romaperã.

²⁹ Hãrã opaite Jesús mboireare mambaty verã pepenteĩ ĩmereamire, mboryshu verã ñandyryvyre Judeaipi iko'iare.

³⁰ Kyrã japo retarã, Bernabé hareka Saulo rupii rahaka reta Tũpape me'ẽãva, kuakuavare Judeape'õre pevarã.