Hechos 10 - NandevaBiblia

Pedro hareka Cornelio

¹ Ĩmemba'ẽ tenta Cesareape pente kuimbai Kornelio he'iashua, 100 ẽvã syndarore miñaka'ishua, kuaahava jyve Syndarore jatyse'õ “Italiava” he'iashuape.

² Kornelio hareka hĩjapore hãndi haihuva hareka kyje Tũpaivi. Heta Judiore paveteva mbory hareka ñymboiñy'iva Ñanderupe.

³ Pente ara, ka'arumarã mbahapy oravape hesape ouva, hesha kavi pente Tũpa jokueva ou hai ẽvãperã heishu: Kornelio!

⁴ Kornelio haipe mãĩ'ẽhe Tũpa jokuevarã kyje ryheve pyrãndushu: Mbaivara ripota, Sheja? Tũpa jokueva heishu: “Tũpa hendu rirureshuva hareka vy'aite'i rijapovare, pavetevare rymboryshurã.

⁵ Mondo ã'ẽvãĩ mokue kuimbai tenta Jopepe, ereshu haipe tyhekakui Simón, mbyheavajy Pedro,

⁶ Simón mymba pire mba'apo'ihea hentape pyta'iva, yyvasu hymbeype”.

⁷ Tũpa jokueva ohojymarã, Kornelio hẽno mokue jokuereva hãndi syndaro jyrojaheva hareka haihuva Tũpa.

⁸ Hokavare mondoshu reta Jopepe, jehuva opama mbeushurã.

Pedro hesape ouva

⁹ Pareejyrã, syndaro hareka jokuehareare ñymboja reta tenta Jopepe, haipe Pedro oo vate'õpe jupi ñymboi verã kuarasy mbytepema'ẽrã.

¹⁰ Haivi Pedro ñymbahymarã pota karu, tẽvã hou verã mỹhẽvãhãteri ẽshuape, Pedro hesape ouva hesha.

¹¹ Hesha vate arare jypearã hareka vejy ouva yvyre tarapo tivisha ovava, urũndy kavi japy jokuahava.

¹² Hokava tarapo tivishavapy ẽẽ mymbare ipy urũndyva, yvyre poñyva hareka vyrare.

¹³ Pedro hendu pente ñee heiva: “Pũ'ã Pedro, juka he'u!”

¹⁴ Pedro hei: Mba'ety, Sheja! Mapeãpo hau so kyashuva Tũpa, hareka porãmbashuva. Shara kuatia mbyparahavape ñonohã ore kyrãva mymba hoo ho'ua verã.

¹⁵ Haipe ijeta'ẽshua heijyshu: Pedro, kova mymbare She opama ajohe, avy ereshu “kyava”.

¹⁶ Kova mbahapy kavi jehu. Haivi hupihajy tarapo tivishava vate arapy.

¹⁷ Pedro pya mbijeta'ihe hokava, mbaivara he'iseshu hesape ouva. Haipe Kornelio mondovare pyrãndu jyrahahe Simón hoo,

¹⁸ hareka pyrãndu reta: Kopera pyta'i Simón mbyheavajy Pedro?

¹⁹ Hãma Pedro ĩmeĩteri pya mbijeta'ẽ hesape ouvarã, Espiritu Santo heishu: “Mãĩhe, mbahapy kuareta ndyreka ñynoĩ.

²⁰ Vejy hareka avy rejepy'apy ryheve ekua hãndi reta, shara She ãmondovare”.

²¹ Hãrã Pedro vejyrã, heishu kuimbai jokuehavare: She hai pyhekapiva. Mbaiverãra shyrekapi?

²² Haire hei: Senturion Kornelio rãnga ỹrỹmbouje, pente kuimbai heko kaviva, Tũpa omoimbaishuva hareka opavare ijeta kavihe Judiore mbytepe. Pente Tũpa jokueva heishu ouha ma'ẽã ndyrehe, reho verã hentape nde rereshuva hendu verã.

²³ Hãrã Pedro heishu iche verãre, haipe pente pyntu pyta reta. Pareejyrã, oho hãndi reta hareka mĩ'ĩrũ jyve reta Jopepe'õre jyrojavare.

²⁴ Hãma ĩrũ arajyape iche reta Cesareape, haipe Kornelio hãrõ ñynoĩ hentarãre hareka ñi'ĩrũre ñee rahakashuvare.

²⁵ Pedro iche oo iperã, Kornelio õhẽ mỹvãhẽshu hareka ĩñesu hỹnonderã, õmombaishu.

²⁶ Tẽvã Pedro mupũãrã heishu: Pu'ã, she ha'eĩ jyve kuareta nde rãĩmiva.

²⁷ Ijeta teri'ẽ hãndiva, Pedro iche oo iperã hesha heta kuaretare ñymbaty ñynoĩ haipe.

²⁸ Pedro heishu: Pee pikua Judio jykuatiape ẽẽ potamba ichehava hentape hareka jihia karai mbyryvare, tẽvã Tũpa shymbyheshaka potambaa ahenova mbavape kyashuva Tũpa.

²⁹ Hãrã shyrẽnõhakarã, maĩnunga shijokoã ai verã kope. Aipota aikuaa mbaivẽrãra shyrẽnoka?

³⁰ Kornelio hei: Japoma 4 ara, kuijavepe'ãmo mbahape oravape, sheii shyrẽtape mbaimba hau ãĩva ka'arurã, mondii pente kuimbai mondeva opaĩ hĩmbipeva ijeshakashe.

³¹ Hãrã heishe: “Kornelio, Tũpa henduma rirureshuva hareka opama hesha rijapova, pavetevare rymboryshurã.

³² Mondo ã'ẽ kuimbaire tenta Jopepe, ereshu haipe tyhekakui Simónpe, mbyheavajy Pedro, Simón hentape pyta'iva, mymba pirere mba'apo ia yyvasu hymbeype”.

³³ Haivi ãrẽ'ãĩte amondo ndyreka verã hareka ndypya kavimbaje, rei verã. Ã'ẽ opaite ĩmehã'ẽ Tũpa hỹnonde, henduha verã opaite Ñandeja ñonondeva rỹmbeu ore verã.

³⁴ Hãrã Pedro õñepyrõ ijetashu reta: Ã'ẽ aikuaa, ãñeteñoĩmba Tũpa pevarã penteva rãĩmi ñanderã,

³⁵ hareka Tũpa opa pavẽĩ haihu, opaite tenta, kyjeshiva retape hareka mbai haikaviva yngavare japova.

³⁶ Tũpa mondokashu ĩñee Israelvare ñymoña hãndiare, mbeu verã Ñee kaviva pyrymbypya kaviva Jesucristo rupii, hai opavare Ija.

³⁷ Pee pikuaa mbaivara jehu opaite Judeape, õñepyrõ Galileaivi, Juan õñepyrõvive ñimiñeerã hareka pyrymyngarairã,

³⁸ Tũpa ñonohẽ Jesús Nazareno Espiritu Santo hareka ñymbaikatukuepy, heta Ãña ichepy vekuare opa kuera, shara Tũpa ẽẽ hãndirã.

³⁹ Ñande jahesha opa mbai Jesús japova Judeape hareka Jerusalenpe, haivi raha kurusure mbysavava reta juka verã.

⁴⁰ Tẽvã Tũpa mbahapy arajyape mupuãjyshu, hareka hykuaĩ ñonojy ñande jahesha verã.

⁴¹ Ha'ẽã opaitevape ijeshakajyva, koñeĩ ore Tũpa ỹrỹpỹhỹrõva, mbeu verã Jesús hykovejyva. Shara karuha hareka ñymby'uha hãndi kuerajymarã,

⁴² hareka hei ñande opa rupi ñambeu verã Tũpa ĩñee, hareka ñambeu verã Tũpa hesha verã mbai kavi hareka mbai porãmbava kuaretare japova, hykoveteri'iare hareka manovare.

⁴³ Opaite Tũpa ĩñee mbeu'iare ijetahe Jesús hareka hei reta jyrojaheva hai heepe mbai porãmba japo vekua hejareiiposhi reta.

Judiombare myvãhẽshu Espiritu Santo

⁴⁴ Haipe Pedro ijetateri'ẽ vẽkua, mondii vejyhe reta Espiritu Santo opaite Pedro mbeuva hẽndu'ẽvãre.

⁴⁵ Hãma Judiovare Jopeivi Pedro ou hãndi vekuare mbypy'ãã heshama Espiritu Santo vejymahe haimba Judiova retarerã

⁴⁶ shara hendu reta yngaiva ñeepy ijetarã hareka pyraheshu Tũpa.

⁴⁷ Hãrã Pedro hei: Katurapo mbava jocha ñymyngarai verã opaite ko kuaretare Espiritu Santo vejyheva, ore rãĩmi?

⁴⁸ Kova opa heirã, Pedro hei myngaraishu verã Jesucristo heepe. Haivi jurureshu reta Pedro mbovy ara pytavee verã haipe.