Hechos 1 - NandevaBiblia

Jesús mbeu Espiritu Santo ou verã

¹ Kuatia tynonde ambypara nde Teofilo, aijetahe opaite mbai Jesús õñepyrõ japova hareka pyrỹmboihe vekua,

² hupihapeve vate arapy, ohojyma potarã, Espiritu Santo rupii mbeushu mbaivara japopo reta Apostol hai pyhyrõ vekuare.

³ Manorã hareka kuerajymarã, Jesús ijeshakajyshu reta, heshaka kavi verã hai kuerajymava manovare mbyteivi, 40 ara kavi ikojy hãndi reta, ijetaheshu reta Tũpa vapyape ryheva ara vate'õpe.

⁴ Ikoteri jyre hãndi Apostol retarã, Jesús heishu reta, potambaa õhẽ verãre Jerusalenvi. Heishu reta: Pyhãrõ tikorãni Sheru ĩñee meẽ vekua, She ambeupeva rãĩmi.

⁵ Ãñete rãnga Juan yypeĩ pyrymyngarai tẽvã pee piñymyngaraipokui Espiritu Santope.

Jesús hupihajy vate arapy

⁶ Haipe Jesús ẽẽ hãndiare pyrãndushu reta: Sheja, rũmupũãjyrapokui huvisharã'õ tenta Israel ko arape?

⁷ Jesús heishu reta: Pee katuã pikuaa mbai araperapo hareka mãrãrapo japo, koñeĩ Sheru ha'ĩĩ ĩmere mbaikatu japo verã.

⁸ Tẽvã Espiritu Santo vejymapyrerã ĩmepopyre mbaikatu, hãrã pẽhẽpo shymbeupi Jerusalenpe, Judeape, Samariape hareka yvy japyapevepo mbe'uha ko shiñee.

⁹ Hokava opama heirã Jesús, mãĩ ñynoĩheapypeĩ hupiha vate arapy, haipe ãvãpyntu opa jasoirã hãrã heshaveã reta.

¹⁰ Hãrã haire mãĩ kavijyrehe mãrãra Jesús hupihajy vate, haipe ijeshakashu reta mokue kuimbai mondea tĩĩvare,

¹¹ heishu reta: Pee Galileavare mãrã'ĩrãra pymãĩpi vate arare? Kova Jesús rãnga hupihajyma vate arapy, pee pyhesha ohojyva rãĩmi katĩĩpo pente arape oujykui.

Judas hendakuepe ñonohajy Matias

¹² Haivi oujy reta Jerusalenpe ñana Olivo he'iashuvaivi pytashia 1 kilometro hoka tentaivi, haipeveĩ Israelitare katu oho putu'uava jy'ara ẽrã.

¹³ Vãhẽ jyraha Jerusalenperã jupi reta oo vate'õpe, iko jyreape, Pedro, Juan, Santiago, Andres, Felipe, Tomas, Bartolome, Mateo, Santiago Alfeo tay, Simón Selote hareka Judas Santiago tay.

¹⁴ Haipe haire ñymbaty ñõĩjyre jurure verãre mbovy taupere hãndi, Maria, Jesús ishy hareka tyvyre.

¹⁵ Hokava arape Pedro ñymboyrã ijeta 120 jyrojavare paũpe, hãrã hei:

¹⁶ Shyryvyre, ikoñoĩpo mbypara vekua Espiritu Santo heiheva rãĩmi Judas, David heiva rupii, haiteiva tynonde oho verã Jesús pysyka verã.

¹⁷ Judas rãnga hai jyve ñanymbytepe'i vekua hareka icheva jyve ko jajapovape.

¹⁸ Tẽvã hai oho ova yvy hoka kyrypoti mbai porãmba japo vekua mbyhepyapyshua hãrã vateivi oa ñãkã rokua yvyrerã, mbyteipi hye sororã opa ñymomohẽ ñymamba'ekuere.

¹⁹ Opaite Jerusalenpe kuama retarã hãrã akua yvy mbyhee reta Aceldama Israelitare ĩñeepe heiva: “Ñu tuvy rẽnda”.

²⁰ Shara kuatia Salmope mbyparahava hei: “Hoore tikoshi yvy ikoambaipi, hareka avy mbava tikopy”. Heijy: “Yngava tõĩjy hendakuepe”.

²¹ Ĩmejare kope kuimbaire ñanimi'ĩrũñoĩ'ia opa ara Ñandeja Jesús ikoteri'i ñanymbyteipirã.

²² Juan myngarairãvãĩ hupiha vate arapy. Kyrãvã rãnga katu iche jyve ñanymbytepe, mbeu ñanendie verã Jesús puãjy manovare mbyteivi.

²³ Haipe ñono reta mokue kuimbai; José Barsabas he'iashua, mbyheavajy Justo, hareka Matias.

²⁴ Haipe jurure retarã hei: “Sheja nde opa rikuaa typyare. Heshaka ore mbavara ko mokue'õre rypyhyrõva,

²⁵ ikoshi verã Apostol Judas hendakuepe, shara hai yryrejama mbai porãmba japorã hareka ohoma oho verãpe”.

²⁶ Haipe mombo reta jyvareahearã hãrã Matias oahe pyhyrõã verã. Haivi pyta hãndi reta 11 ia Apostolre.