Hebreos 9 - NandevaBiblia

Ñymombai vasu japohaseape yvy'ĩãrẽ'õ oo

¹ Ñee me'ẽãva tynonde ẽvãpe ĩmembare jyve ñee ñonoãva marãrapo õmomba'eashu Tũpa, tẽvã pente ñymombai oo yvy'ĩãre'õpe.

² Hokava tabernaculo ĩmembare mokue ñyvyĩ, tynonde'õ ñyvyĩ he'iashu Tyrẽnda Kyambava. Haipemba'ẽ tataĩndyre hyru hareka mesa, hãrã mesa ĩãrẽ'ẽ pãhã ñymbo'eaheva Tũpa pevarã.

³ Hãrã tarapo jochahapya mokuehea kupepemba'ẽ ñyvyĩ mokuehea mbyheeava Tyrẽnda Kyamba'eiteveva.

⁴ Haipe'ẽ altar ita verava ijuva hapyapy verã yvyra pishekatuva, ñee me'ẽãva hyru ita vera ijuvatei jerekue ñonoahe, haipy'ẽ kambushi mishiĩva mana ẽpya, Aarón jy'yvyra hokyjy vekua hareka mokue ita ipevare mbyparahahea opañandepo ñee japoa verã.

⁵ Hãrã maĩnunga hyru orova ĩãrẽ'ẽ Tũpa jokueva hĩmbipevare kerubin he'iashuare pyrymbyheshaka verã Tũpa haipe'ẽvã, haire hypepo retape opa jocha maĩnunga hyru orova jasoja; tẽvã opaite kova mbai rehe ã'ẽ katuã pepenteĩ ijetahe.

⁶ Kyrã, opama ñonoa kavirã, paire icheñoĩ tynonde'õ tabernáculo hapype ñyvyĩpy japo verã mbaire õmombaishu verã Tũpa.

⁷ Tẽvã oo ñyvyĩ mokueheape koñeĩ pai ruvishaĩ iche pentejy pente ãñope, icherã rahañoĩpo mymba jukahava huvy, hokava meẽhe mbai porãmbare hai japo vekua hareka mbai porãmbare Israelvare japo vekua haire kuambape.

⁸ Hãrã hokava rupii, Espiritu Santo ñanymboi katumbateri jaiche verã Tyrẽnda Kyamba'eitevape ĩmeĩteri'ẽ tabernáculo tynonde vekuarã.

⁹ Opaite kova ñymyhã'anga ñande ã'ẽ, Tũpape me'ẽãva hareka mymba jukaharã me'ẽhava Tũpape haipe katuãpo añete pyape mbyhaikavi kyrã õmombai'iare.

¹⁰ Opaite me'ẽãva hareka mymba jukahava koñeĩ ijetahe ho'uavare, mbusururuava hareka hete joheva pevarãĩ ñonoha Tũpa yngava ñonoãjyrã.

¹¹ Tẽvã Cristo ouma hai pai vasurã veru verã mbai kavikue ã'ẽ ĩmejareva. Hai iche Tũpa tabernáculo haikaviveva hareka hekope kavi'õ vate arape'õ, ha'ẽã kuareta japo vekua, hareka ha'ẽã yvy'ĩãrẽ'õ.

¹² Cristo iche Tyrẽnda Kyamba'eitevevape, ha'ẽã kapura hareka vakare huvy rupii, koñeĩ ha'ei huvypy; penteĩ icherã hipityma ñande pevarã ñymondojepeva opa arape.

¹³ Toro hareka kapuraray huvykue, hareka vakaray timbo momohẽava kuaretare'ĩãrẽ rãnga mbyheko kavi hareka hete ĩãrẽĩ joheshu,

¹⁴ mbovykuerapore mbaikatukue Cristo huvykue! Hai, Espiritu opamba rupii, ñymeẽ kyamba ryheve Tũpape, johe verã ñandypyape opaite mbai japoarã manõa ryhevaivi, jaijokuekashu verã Tũpa hykove'ia.

¹⁵ Hãme rãnga Cristo hai ñee me'ẽã py'ahuva, henohavare myvãhẽva me'ẽãshu verãre Tũpa mbeu vekua ñee opamba ryheva, ã'ẽ hai manoma mbyhepy ñandyrehe ñanynohẽãjy verã opa mbai porãmba jajapo vekua tynonde ñee me'ẽã vekuape.

¹⁶ Ĩme'ẽ pente ñee me'ẽãvarã tekotẽvepo tynonde manorãni mbypara vekua.

¹⁷ Shara ñee me'ẽãva mbaimba rãĩmi japova ĩmeĩteri'irã, koñeĩ añetepo manomarãmeĩ.

¹⁸ Hame rãnga, tynonde ñee ñonoha vekua japohamba turuvymbape.

¹⁹ Shara Moisés mbeumashu opaite Israelitare ñeẽ japoha verãrã, heky vakaray huvy handi kapuraray huvy hareka yy mbihia, haivi heky avisha haa pyntava hareka pente isopo hãka, momohẽhe verã kuatia ñee mbyparahava hyru hareka jyve opaite israelitare.

²⁰ Hãrã Moisés heishu reta: “Kova hai turuvy my'añete ñaĩ handiva Tũpa meẽ pee pijapo verã”.

²¹ Kyrãmi jyve momohẽ jyvehe tuvy tabernáculo hareka opava hapype poryavare.

²² Ñee mbyparahavape ẽẽ, opa mbai tekotẽveñoĩmba ijohepy tuvy, shara tuvy hakuavahããrã mba'etypo mbai porãmba vekuare hejarei verã.

Cristo manomba heky ñandyhevi verã porãmbava

²³ Hãme rãnga, opa maĩnungare tekotẽveñoĩmba oo Tũpa omomba'eha'õpe ẽvãre, mbivachehaheva vate arape'õ rãĩmi, opa joheha verã jyve mymba jukaha rupii. Tẽvã vate arape'õre ikotẽvehe mymba jukahava haikaviveva.

²⁴ Cristo icheã oo kyamba'õpe kuaretare ipope japova ẽvãpe, añeteiteva myha'angahaĩhea koñeĩ vate arapeteimba, ã'ẽ ẽvãpe Tũpa hỹnonde jurure'asy ñandyrehe verã.

²⁵ Ha'ẽãmba hetajy ñymeẽva ñymbyhaikavi verã Pai ruvisha japo'i vekua rãĩmi Tyrẽnda Kyamba'eiteveva meẽ reta tuvy haimba ña'ãpova pente ãñope.

²⁶ Kyrãpotarã, Cristo hetajymbapo mano ko yvy jypyite japoharãvãĩ. Tẽvã ha'ẽã kyrãva. Ã'ẽ, ko ara opa oho'iape, penteĩmba ijeshaka hareka opa arape, mbai porãmba opa mambai verã ha'ei ñymeẽ jukaha verã.

²⁷ Ñonoãshu penteĩ mano verã kuaretare, hareka haivipo ou ñimbivache verãpe.

²⁸ Kyrã jyve Cristo penteĩmba meẽ hykove hetava retaivi heky verã mbai porãmba vekua; oujyrã haiveãma raha verã mbai porãmba, koñeĩ hãrõ pytambavare mondojepe verãĩmapo.