Hebreos 6 - NandevaBiblia

¹ Hãrã jaha tynonde opa jasyrypeve, jaheja jaraha Cristo ryheva tynondeite ñanymbo'eahe vekua. Avy hykuaĩ jaijyshu mbai javaiveãma ñandevape, jaishu ñaimbeujya ryheva hareka jaheja jajapova pyryrahava ñymanope, jyrojakue Tũpare,

² ñanymbo'eaheva ñymyngaraiva ryheva, ñandepo ñañonova jyrojavare ĩãrẽ, manovare kuerajya, hareka ñimbivache opambava ryheva.

³ Kova hai jajapo verã, añete Tũpa hei ñonoma ñanderã.

⁴ Shara katuãã sapeamaheare hareka kuaamava Tũpa meẽreiiva, hareka me'ẽãshu vekuare Espiritu Santo,

⁵ hareka pya ohohe vekuare Tũpa ĩñee haikaviva hareka mbaikatukuere yvy'ĩãrẽ ou verã ryheva,

⁶ hykuaĩ oajyrã, katuveãmapo ñymbeujy retakui Tũpape, maĩny haire hykuaĩpo Tũpa Tay jukarã kurusure ñonojy retakui hareka ñymbyhorypohe kuaretare hỹnonde.

⁷ Kova kuareta reta rãnga hãĩ yvy. Cristo jyrojaheare hãĩ yvy heta haiviheva hareka ñotyãva õhe kavi ma'ẽty'ia pevarã hareka Tũpa mãĩ kavihe.

⁸ Tẽvã poi jyrojavare hãĩ yvy kapi'ãti mimoñava; mba'erãveã, hareka Tũpa jahehe. Koñemahea hapyha.

⁹ Shyryvyre ahaihuva, kyrãte ijetahava, kuaaha kavi pee pimepeĩva tape haikavivevape, jaishu ñymondojepeva hapepe.

¹⁰ Shara Tũpa heko kaviva hai, sareãpohe pijapova hareka jyhaihukue pyheshakava jyrojavare pymbory retarã, ã'ẽpeve pijapoteripeĩva rãĩmi.

¹¹ Ore potaha pyheshakañoĩ pyraha hokava kyrẽ'ỹkue ĩmepyreva opapeve, opaite ikopeve pyhãrõ peĩvape.

¹² Avy piñymateỹ, kyrãtẽ verã peñehããpo piko jyrojavare hareka hãrõ kuaavare rãĩmi, shara haire hipitypo Tũpa ĩñee meẽ vekua.

Tũpa ĩñee meẽ vekua

¹³ Tũpa ĩñee Abraham meẽshurã, icheheimba ĩñee meẽ, shara mba'etymba vateve'ẽshiva ĩñee meẽshu verã.

¹⁴ Hai heimbashu Abraham: “Ãñete hetakavipo amaĩkavi ndyrehekui hareka jahepo ambyhetavekui ñymoña ndyhevivare”.

¹⁵ Abraham pyareheimba'i hãrõrerã, hãrã Tũpa hipitykashu hai heishua meẽshu verã.

¹⁶ Shara kuaretare ĩñee meẽrã, mbai vasuveshiare meẽ, hãrã ĩme'ẽ ĩñee meẽvarã, mba'etyma jai verã.

¹⁷ Hãrã Tũpa potañoĩ my'añete heshaka verã opaiteva hipity verã kova ĩñee meẽ vekua, yngavamba hekyjy verãpe.

¹⁸ Tũpa japuã hairã, mokue mbai katumbaa ỹngaijyva, heiva meẽ verã hareka hai ĩñee meẽva. Hokava tivisha ñanymykyrẽỹ, shara jaipota Tũpa ñyngareko ñandyrehe, hãrã jaroja hai heishu vekua meẽñoĩ ñande verã.

¹⁹ Kova jarojava pyrãta'ẽ hareka tanta'ẽ tykovepe, varko mymbytahapya rãĩmi. Kova jarojava vãhẽ oho tũpao vate arape'õ tarapo jochahapya kutyve,

²⁰ haipemba iche aryka'e Jesús japo ñande verã pente tape, kyrã ikoshi pai ruvisha vasu opa ara pevarã, Melquisedec heko rãĩmiva.