Hebreos 5 - NandevaBiblia

¹ Opaite pai vasure hekahapyva kuimbaire mbyteivi, ñonoha kuaretare reheĩ mba'apo verã Tũpa hỹnonde hareka Tũpape me'ẽãva mbeu verã hareka mymba jukahava mbai porãmba kuareta japo vekua hejahareiishi verã.

² Pa'irã'õ katu hãrõkuaashu pirĩmbijiche'iare hareka mbai porãmba japo'iare, shara hete kangy jyve yngavare rãĩmi,

³ hãrã hai rehe japoñoĩpo mymba jukahava ryheva ha'ei mbai porãmba japo vekua rehe, hareka jyve henta ĩrũ rehe.

⁴ Mba'ety ha'ei ñymbyvate'i verã hareka iñiñono verã pai vasurã, Tũpa hẽnovaĩ rãnga ñono, Aarón ikohea rãĩmi.

⁵ Kyrãĩ jyve Cristo õñemomba'eã ha'ei pai vasurã iñiñonorã, Tũpa rãnga ñono; hareka heimbashu: “Nde hai Shyray, ã'ẽ hai ndyrehe nde haiva Shyray”

⁶ Mbyparahava yngaipe heijy: Nde hai pai vasu opa ara pevarã, Melquisedec heko ryheva rãĩmiva.

⁷ Cristo ko yvy'ĩãrẽ kuareta rãĩmi ikorã, hỹnatu, hareka jaheo ryheve jurure'asyshu Tũpa, rekova mbaikatu mondojepeshi verã ñymano; hãme ñee hendurã Tũpa hendushu.

⁸ Ajemaĩ Cristo Tyraytẽvã, jyhasa'asy rupii kuaa marãra katu ñee hendu.

⁹ Hãrã ñymbyheko kavimarã opa ara pevarã ikoshi pyrỹmondojepe'ia, opaite ĩñee hendushuare pevarã.

¹⁰ Hãme rãnga Tũpa ñono Pai Ruvisha vasurã Melquisedec heko rãĩmiva.

Jaikuaa kavivepo Tũpa ryheva

¹¹ Heta'ẽ jaihe verã kova, tẽvã hasy ñambeu kavi verã, shara javaipekuei pikuaaraviĩ verã.

¹² Arykaimatẽ pypyrỹmboipi verã, katynga pota hykuaĩ mbe'uajype Tũpa ĩñeepe'õ javaimbatẽvã, jaishu ho'uava tantava peumatẽ verã, kambyĩ pota peupi.

¹³ Sanjay rãĩmi kambyĩ hou'iare, katuaã kuaaha mbaivara haikavi hareka porãmbava.

¹⁴ Tẽvã ho'uava tantava hai opama syryvare pevarã, maĩ kavivare, shara heshakavima mbaivara haikavi hareka porãã.