Hebreos 4 - NandevaBiblia

¹ Hãrã jairykyje, ĩmeterijare ñee me'ẽãva jaiche verã Tũpa putuuvaperã, mahẽ ã'ãmo pee pya mbijeta reta hipitymba verã.

² Shara mbe'uha jyve ñande Ñee Kaviva, haire rãĩmi; tẽvã haire hendu vekua mba'ẽãshu reta, shara ñee hendu vekuare, jyrojakue ĩmerevare mi'ĩrũãshu japo vekuare.

³ Tẽvã ñande jarojava jaichepokui putu'uavape, Tũpa heiva rãĩmi: “Hãmeara shyposhyvape shiñee ameẽpe: Icheãpo retakui atuuvape”. Tẽvã añete Tũpa opa japo opaite japo verã, kova yvy jypyite japorã vekuaivi.

⁴ Shara ĩme'ẽ Mbyparahava heivape 7 ara ryheva: Tũpa putuu 7 arape opa mbai japo vekuaivi.

⁵ Hykuaĩ heijy Mbyparahava retape: Mape'ãĩteipo iche retakui aputuu ãĩvape.

⁶ Tẽvã ĩmeteri'ẽ ndeiteri iche verã hokava putu'uha verãpe, shara tynondeite Ñee kaviva mbe'uhashu vekuare ñee henduããrã icheã reta.

⁷ Hãrã Tũpa hykuaĩ ñonojy pente ara, haiva “ã'ẽ” heta ara hasa vekuape, he'ika ñande David rupii: “Hokava arape Tũpa ĩñee pyhendurã, avy pyndypya pymytanta”.

⁸ Josué meẽma hokava putuu ryheva arykairã, Tũpa ijetaveãmatẽhe verã ĩrũ arare.

⁹ Tẽvã ĩmeteri'ẽ ĩrũ pente putu'uavape haikaviva Tũpa ryhevare pevarã.

¹⁰ Shara hokava putu'uava Tũpa ña'ãpovape icheva, putuushi mbai japovaivi, Tũpa putuuva rãĩmi opa mbaivi.

¹¹ Hãrã ñañehããpo jaiche hokava putu'uavape, mahẽ mbava oakui ñee hendumba'iare rãĩmi ikorã.

¹² Tũpa ĩñee hai tykove hareka mbaikatu, kyse pukuva hãĩmbeveva hareka kype icheva ñandypyape hareka espiritupe, haipe ñonokaviva typya hareka typya potava, hareka hokava potakue haira haikavivare maĩrã porãmbare.

¹³ Hãrã mba'ety Tũpa japo vekua kañyshi verã; shara Tũpa opa kavipo hesha hareka mbava hỹnonderãpo opa ñambeukui jajapo vekuare.

Jesucristo hai pai juhuvishavasu

¹⁴ Jesús Tũpa tay, hai ñandy pai ruvishavasu ĩmejareva vate arapy ohojy vekua, hãrã jairoja katupohe.

¹⁵ Ñandy pai ruvishavasu katupo ñandyparekorã ñanymborykui ñanykangyñaĩrã, shara ñande rãĩmimba heta pyahã'ãha jyve; koñeĩ mbai porãmba japoã hai rãmeĩmba.

¹⁶ Hãrã jyrojakue ryheve ñaĩmbojahe Tũpa ñandyraihuva vapy'õpe, ñandypareko verã, hareka ñavãhẽshu verã pyakavi ñaikotẽverã.