Hebreos 3 - NandevaBiblia

¹ Hãme rãnga shyryvyre, pee Tũpa ryhevare, pyhỹrõava hareka hẽnohava vate arape oho verã. Hãrã pypya pimbijeta kavihe Jesús: Hai rãnga apostol hareka Pai Vasu jairojahea ryheva.

² Jesús japoñoĩmbashu Tũpa potava, ñonohashu ñanymbory verã, Moisés hekopekavi japova rãĩmi opa mbai Tũpa hoope.

³ Tẽvã Jesús omomba'ehavembashi Moisés, pente oo japo'ia rãĩmi mbyvetehaveshi oo japo vekuaivi.

⁴ Shara opaite oo reta ĩmeñoĩpo'ẽ mbava japova, tẽvã opava maĩnunga ẽẽvare japova hai Tũpa.

⁵ Kyrã Moisés, jokuehava rãĩmi, hekope kaviñoĩmba japo opa mbai Tũpa hoope, mbeu verã mbaivara Tũpa heipo'ẽ mbai arape.

⁶ Tẽvã Cristo, Tũpa tayrã, jyrojañoĩhe Tũpa hoo, ñande hai hokava, ñaĩñymypyrãta ñaĩherã hareka vy'akuepe japity verã ñahãrõva Cristore ẽvã.

⁷ Hãme rãnga, Espiritu Santo heiva rãĩmi: Hokava arape Tũpa ĩñee pyhendurã,

⁸ avy pymytanta pyndypya israelitare rãĩmi haire pũã shyrehe hareka shypyahãã reta yvy ikoambaipi.

⁹ Haipe pynytynondevare shypyahãã reta, ajema 40 ãño heshatẽ reta ajapo vekua.

¹⁰ Hãme rãnga shyposhyshu kuaretare ã'ẽvare, hareka hai: Ikoñoĩ retakueipi haimbaa shyrapeipi, shara haire kuaãmba reta shyrape.

¹¹ Hãme rãnga poshype ameẽ shiñee: Iche'ãĩteipokui she aputuu verãpe.

¹² Pymaĩ shyryvyre, avy mbava pee ĩmetyre pya porãmba hareka mbai rojamba'ia Tũpa hykove'ia pynymymbyryshi verã.

¹³ Kyrãte verã pimykyrẽypo opa ara, ẽẽterirã tantangatu ẽẽpeve hokava “ã'ẽ”, mahẽ mbai porãmba pynymbytavyrã pyndypya pymytãtashikui mbavaivi.

¹⁴ Shara ñande heta mbai ĩmejare Cristo handi, jairojaĩhe opa arapeve tynondeite ĩmejarevaivi.

¹⁵ Hãrã hei: Hãma ã'ẽ ĩñee pyhendurã, avy pymytantashi pyndypya israelitare rãĩmi, pũãhe reta Tũpa, potãã japoshu heivarã.

¹⁶ Shara, mbava retara hendutẽvã, pũãhe vekua? Ha'eãra opaite Egiptoivi õhẽ vekuare Moisés rupii?

¹⁷ Hareka mbava retara Tũpa poshy hãndi 40 ãño? Ha'eãra mbai porãmba japo'iare hãndi, haire mano reta yvy ikoambaipi?

¹⁸ Mbava retapera ĩñee meẽshu ichembaa verã putu'uhavape? Ñee hẽndumbaashua reta,

¹⁹ hareka añete katuã iche Canaanpe shara jyrojããhe reta Tũpa.