Hebreos 10 - NandevaBiblia

¹ Moisés mbypara vekua rãnga hai pente haikaviva heshaha verã Tũpa meẽ ñande verã. Hãrã mbyparahava katuã añeteĩte mbyhaikavi ñono opaite ãñope raha mymba jukarã meẽñoĩva Tũpa pevarã.

² Ãñete mbyparahava mbai porãmba joherã, mbaiveãmate reko ijehe verã hareka meẽveãmate verã mymba jukava ryheva Tũpa pevarã.

³ Tẽvã hokava mymba jukaha me'ẽãva ãñojyape koñeĩ mymandu'aka mbai porãmba japo vekuare,

⁴ shara katuã toro hareka kapura huvy opa heky mbai porãmba vekuare.

Cristo jukaharã vekua

⁵ Hãrã, Cristo ourã ko yvy ĩãrẽrã, heishu Tũpa: “Nde ripotãã mymba jukahava hareka me'ẽãreiva, koñeĩ rymeẽshe pente tyrete.

⁶ Mymba me'ẽãva hapyhava hareka me'ẽãva mbai pormba ryheva nymbyvy'ããpo”.

⁷ Hãme rãnga hai: “Kope ãĩ, Tũpa, ajapo verã nde ripotava, he'iha shyreheva rãĩmi kuatia ĩñeepe”.

⁸ Tynonde hei: “Ripotãã mymba jukahava hareka me'ẽhaiva heko porãmbare rehe hareka hapyavare hareka yngava rehembaa mbai porãmbare hekyshi verã; ndypya oho'ãĩteijyhe opaite hokavare me'ẽhaiva, ajema ñee mbyparahavape kyrãte ñonovare”.

⁹ Haivi hei: “Kope ãĩ, ajapo verã nde ripotava”, kyrã Cristo heky tynonde'õ ñonojy verã koñemahea.

¹⁰ Tũpa ñanymbyheko ky'ãã shara Jesucristo japoshu Tũpa potava ha'eĩ meẽ hete jukaha verã penteĩ hareka opa ara pevarã.

¹¹ Opaite paire japoñoĩ jy'arete mbeu reta mymba jukahava ryheva, ajema mapemba heky verã mbai porãmba vekuare.

¹² Tẽvã Jesucristo meẽma mbai porãmba vekuarerã penteĩ jukaha opa ara pevarã, vapy Tũpa jakata kyty.

¹³ Haivi hãrõĩma'ẽ hyvaishore ñonoha peveshu ipy ipe.

¹⁴ Shara pente mbai me'ẽãva rupimba añeteĩte mbyhaikavi opaite Tũpape ñymyngyambava.

¹⁵ Hãrã Espiritu Santo my'añete ñande hokava heirã:

¹⁶ Kova hai ñee me'ẽãva ajapo hãndivare hokavare araivi, kyrãpokui, hei Ñandeja: “Añonoposhu reta haire pyape shiñee mbyparahava hareka ambyparapo ñakape”.

¹⁷ Harã heijy: “Mapeãpo shymanduajyhekui mbai porãmba haire japo vekua hareka porãmba vekuare”.

¹⁸ Harã hokava, mbai porãmba hejahareiimarã, pikotẽvẽveamahe jukahava ryheva mbai porãmba rehe.

Ã'ẽ katuma ñavahe Tũpa ẽvãpe

¹⁹ Hokava rehe shyryvyre, ã'ẽ jyroja ñaĩ jaiche verã Tyrẽnda Kyamba'eiteveva Jesucristo huvy rupii.

²⁰ Pe py'ahuvaipi hareka hykoveva pea ñande tarapo jochahapya rupii, kova hai hete rupii.

²¹ Hai rãnga ñandy pai vasu, ñyngareko'ẽhe Tũpa hoo.

²² Hãrã, ñaimbojahe Tũpa ẽvãpe pya añetevape hareka tanta jairojavape, joheha ñandypya potaveãma jajepy'apyhe verã mbai porãmba vekuare hareka yy kyambavapy joheha tyretere.

²³ Jaikopo pyrãtape ñahãrõ kavivape Tũpa japoñoĩ verã ĩñee meẽ ñandeva.

²⁴ Hãrã ñañehããpo opaiteva jajepy'apy ijehe, hareka jaijyhaihu, hareka mbai haikavivaĩ jajapo.

²⁵ Avypo japoi jaha ñymbatyha'õpe a'ãmore jypykuava rãĩmi, opaiteva ñaiñymykyrẽỹ katu jairojavehe Tũpa, hai ĩãrẽ pyhesha kooĩma vãhẽ ou ararã.

Ynteñoma mbai porãmbape jaiko

²⁶ Poiã jajapo mbai porãmba ñandeĩ jaipotarã añeteva jaikuamatẽvã, mba'etymajy yngava ñameẽ verã mbai porãmba vekuare heky verã.

²⁷ Koñeĩ hemby ara pirĩmbivacheha verãpe kyjehashia, tata hasyva opa mambai verã Tũpa hyvaishore.

²⁸ Ĩme'ẽ Moisés mbypara vekua mbijichevarã, mokue maĩrã mbahapy heshava kaviva mbeurã, jukahañoĩpo.

²⁹ Hãme mbovykuerapo jahehahe Tũpa Tay pyrõheva hareka heivare Cristo huvy mbaimbava, mymorãmbava Espiritu Tũpa ryheva haihushuva.

³⁰ Jaikuaa rãnga Ñandeja heiva: “She ajepypo jyvehe, hareka ambyhepyposhu”. Hãrã heivejy: “Ñandeja jahepo jyvehekui hai ryhevare”.

³¹ Mbai kyjehashia rãngapo Tũpa hykove'ia ipope ja'arã.

³² Pynymanduapohe ara hasa vekuare, hãĩrã Cristo ryheva pikuaarã hareka mbaretepe pijepyhe jyhasa'asy ojaimbava.

³³ Ã'ãmo peevare ĩme'ẽ poshyashuare kuaretare hỹnonde hareka kuaretare pyndyreko'asymba, hareka ãmope piñimi'ĩrũhe kyrã rekohavare.

³⁴ Pee pyparekomba opaite mbyperesohavare, hareka vy'ape pyma'ẽĩmbahe mburuvishare heky pyndyhevi pa'ãpovare, shara pikuaa kavipeĩ ĩmepyre mbai haikavivevarã hareka tantaveva.

³⁵ Hãme avy pypoi pirojahe Tũpa, shara hokava pirojaheape me'ẽãpope me'ẽhareiva ojaimbava.

³⁶ Pee pikotẽvẽ pyreko ñyhãrõkuaa kova jyhasa'asype, Tũpa potava pijapo verã hareka pipity verã ĩñee meẽva Hai hei vekua.

³⁷ Shara Mbyparahava hei: “Areãpo oukui ou'ẽ verã, kỹỹveãmapo'ẽ”.

³⁸ Opa mbaipe heko kaviva jyrojakue rupiipo iko, tẽvã haykue ohojyva avy'ããpo hãndi reta.

³⁹ Tẽvã ñande ha'eã haykue kytyĩ ohojya hareka oho'ia jaheahe verã kyty, koñeĩ hai ñande japity verã tykove opamba ryheva Tũpa jairojaherã.