Hebreos 1 - NandevaBiblia

Tũpa ijeta Tay hykovere

¹ Aryka'eite Tũpa ijeta hareka opaishareimba heishu ñanytynondevare ĩñee mbeu'iare rupii.

² Tẽvã ã'ẽ ko ara opaserima'iape ijeta'ẽjy ñande Tay rupii, hai rupii rãnga japo opa mbai ẽvãre hareka opa ñono ipope.

³ Tũpa hĩmbipekue heshahahe Tay, hai rãnga penteva rãĩmi handi Tũpa, Tay rupii tanta'ẽ opa mbai ĩñee ñymbaikatuva rupii. Opama johe ñandyhevi mbai porãmba jajapo vekuarã, vapy'ẽ Tũpa ñymbaikatuva jakata kyty vate arapy,

⁴ hareka kyrã ikoshi vateve'õ Tũpa jokueva retaivi, shara Tũpa meẽshu pente tyree mbaivasuveva hai retaivi.

Tũpa Tay vateveshi hai Tũpa jokuevare

⁵ Shara Tũpa mape'aĩteimba jokueva heishu: Nde hai Shyray, she haipokui Nderu, he'iãvaĩjyshu: She haipokui hai pevarã pente Teru, hareka hai she pevarã haipo pente Tyray.

⁶ Hareka hykuaĩ Tay Tynondeva mbou ko yvype, hei: Tõmombai vasushu opaite Tũpa jokuevare.

⁷ Hãme rãnga Tũpa jokueva rehe hei: Hai japo jokuevare yvyture rãĩmi verã, hareka tata hendy'õre rãĩmi jokuereare.

⁸ Tẽvã Tay rehe hei: Tũpa, huvisharã rẽĩvape hai opa arapeva hareka hekope kavipo huvisharãrẽĩkui.

⁹ Ryhaihu hekope kavi'õ hareka ryheshatãã mbai porãmba japo'ia; hãme rãnga Tũpa, nu Tũpa nypyhỹrõ hareka vy'akueivi nymynyhẽve opaite ni'ĩrũ retaivi.

¹⁰ Hãrã heijyveshu: Sheja, õñepyrõaivive ko yvy jypyrã rĩñono hareka ara vate'õvare hai ndepope rijapovare.

¹¹ Kova rijapo vekuare opapo mambaihakui, tẽvã nde opa ara rikopo. Kovare mondeava rãĩmipo opa tujakui.

¹² Mondeava mbijapahava rãĩmipo opa rĩmbijapakui, hareka rỹmombopo mondeava poryhamava rãĩmi. Tẽvã nde haiñoĩ hareka ndykove opããpo.

¹³ Shara Tũpa mape'aĩteimba jokueva heishu: Vapy shakata kyty, ãñonopeve ndyvaishore ndepy'ipe.

¹⁴ Shara Tũpa jokuevare hai espiriture mba'apova Tũpa pevarã, jokueshu mbory verãre opaite ñymondojepe hipityva retape.