Galatas 6 - NandevaBiblia

Piñymbory katu

¹ Shyryvyre, ĩme'ẽ oava pynymbytepe mbai porãmbaperã, pee pikova Espiritu Santo potava rãĩmi pymboryshu puãjy verã. Tẽvã pijapo pyakavi ryheve, hãrã pepenteĩ pingareko ijehe mahẽ peeave peajy vekui mbai porãmbape.

² Piñymbory katu pyraha verã mbai pohypeva, kyrã opapo pijapo peho ñee mbyparahava Cristo ryheva.

³ Ĩme'ẽ pynymbytepe moã hai mbai vasuvarã, tẽvã mba'erã'irã, ijupi ñymbytavy.

⁴ Hãrã pepenteĩpo maĩ ijehe hykovere, ñandu ijehe iko hekope kavirã, ha'ẽãpo ñimbivachehe verã yngavare.

⁵ Shara Tũpa hỹnonde pepenteĩpo japo, ha'ei japo verã.

⁶ Opaite mbo'eava ko ñee haikaviva rupii, opaite hipityva mbai kavi mbijaopoveshu mboirea.

⁷ Avy peii piñymbytavy: Mba'ety ñymbyhoryhe verã Tũpa. Opaite ñande ñañotyva, ñandeipo ñamynoojykui.

⁸ Kuaretare hykovepe ñotyva hetepe potava, mbai porãmba vekuaivi mynoõpo ñymano. Tẽvã ñoty Espiritu Santo potavarã, Espiritu Santoivipo mynoõ tykove opamba.

⁹ Hãrã avy ñanykangy jajapo verã mbai haikaviva; hãrã ñanate'ỹãrã vãhẽpokui ara ñamynoõ verãpe.

¹⁰ Hãrã katuteri jajapo mbai haikaviva opava retare, tẽvã tynondepo ñandyryvy jyrojava retare.

Pablo ĩñeẽ koñemahea hareka ñymarãndu

¹¹ Pymaĩhe kova marãra shepopetei ko ñee marẽrẽỹ ambypara ãĩpe kuatiape.

¹² Opaite pinimiñerã'iare piñichĩchĩka verã, japo pota pyta kavi hãndi kuareta retarã hareka potãã moñahã reta ñee Cristo kurusu ryheva reherã.

¹³ Hãrã opaite ñichĩchĩka vekuare, opãã japo jyve Moisés mbypara vekua heiva rãĩmi. Tẽvã haire pota peiĩ pipire pichĩchĩkashu, haivi jyrojahe verãre haire heiva pijaposhurã.

¹⁴ Tẽvã she katuã mbaivare airoja'ai shijehe, Jesucristo kurusureĩ rãnga. Shara Jesucristo kurusure mano rupii, she pevarã ko yvy manoma, hãrã she amanoma jyve ko yvy pevarã.

¹⁵ Ñañymypente hãndi Jesucristorã, mba'eã he'ise ñandipire chĩchĩãra maĩrã mba'etyra; koñeĩ haikavi Tũpa ñandapo py'aujyva.

¹⁶ Pyreko pya symyĩ hareka jyparekokue opaite ikova ko ñee heiva rãĩmi, opaite tenta Israel hãndi Tũpa ryhevare.

¹⁷ Ã'ẽvaĩ aipotaveãmapo mbava ñonokui shyraperãpe mbai porãmba, shara ĩme'are mbypereava shyretere, heshakava ahasa'asyva Jesús jokuereasherã.

¹⁸ Shyryvyre, Ñandeja Jesucristo tiñohẽ pyndyrehe mbai kavikue. Amén.