Galatas 4 - NandevaBiblia

¹ Pota haipeva rãnga kova: Opaite maĩnunga ijarã ndeiteri'irã, hentape jokuearea rãĩmi'i jyve, ajema opaite maĩnunga ijarã ẽẽ jyve hoo'ipe.

² Ndeiterirã hetare maĩnungarã ĩmerejy ñyngarekoheshuva ña'ãpovare, tuu heishua arapeve.

³ Kyrã iko jyve ñandyrehe. Ñanyndeiterijairã, jokuearea rãĩmi jaiko jyve kuaretare ipope potava rãĩmi.

⁴ Vãhẽma hoka ara ñonohavaperã, Tũpa mboumbashu Tay, oa taupeivi hareka ou iko Moisés mbypara vekua heiva rãĩmi ipope.

⁵ Kyrã ou hai ñandyreky verã Moisés mbypara vekuaivi, hareka Tũpa ñandyreky ta'yrã.

⁶ Hãrã haima ñande tayrã, Tũpa ñonomba Tay jy Espiritu ñandypyape, hoka Espiritu sapukerã hei: “Abba” he'iseva “Sheru!”

⁷ Kyrã jyve pee, haimape Tũpa tayre haiveamape jokuearea. Tũpa tayperã, Tũpa meẽpope opa mbai ĩñee meẽ vekua tay retape.

Pablo ojepy'apyhe Galasia jyrojavare

⁸ Arykai, ndeiteri pikuaa Tũpaperã, Tũpa ha'ãngare mba'etyva haykue pijokuekapi.

⁹ Ã'ẽ pikuamashu Tũpa, maĩrã haikavivera jairã, Tũpa pyndykuarã. Hãrã, marã'ĩrãra peijypo paykue pikojy verã arykai, piko vekua rãĩmi, pijokuekapeishu mbaikatu pyrãtamba hareka ãñetemba?

¹⁰ Pee kuareta reta rãnga pymby'areteteri arete arare, jasyre hareka ãñore.

¹¹ She akyje ĩmerã amba'aporeira pynymbytepe.

¹² Shyryvyre; airurepe she rãĩmi piko verã, shara pee rãĩmima aijyve. Pee rãnga maĩnunga porãmba pijapoã shyrehe.

¹³ Pikuamava rãĩmi, she tynonde ambeuperã vekua Ñee kaviva, shymbairasy'ai.

¹⁴ Hoka mbairasykue haijyve pyndypyarãã verã, haĩmbajya hokava mbairasy rehe shymymorãmbapia hareka shyreshatãmbapia. Tẽvã ajemaĩ kyrãte, shymyvãhẽpi jyve peĩvape Tũpa jokueva rãĩmi, hãĩ Jesucristo pymyvãheva.

¹⁵ Pyndysaremarahepe hoka vya pyreko vekuaivi? She aikuaa, katurã, pynohẽte verã pyndyresateiva pymeẽshe verã.

¹⁶ Tẽvã ã'ẽ, shera hai pyndyvaisho, añeteva ambeuteperã?

¹⁷ Ĩme rãnga'ẽ pyndyraihuva, tẽvã ha'eã haikavi verã pota pyndyreky yryhevi, pota haykue pehorã.

¹⁸ Haikavi rãnga kuaretare mandua jyvehe yngavarerã, tẽvã tijapo kavi hareka opa ara, ha'ẽã she aĩme'aĩ penendierãmeĩ.

¹⁹ Shyrayre, shyrasyitejy pyndyrehe, tesy memby'ẽ verã hasyshua rãĩmi, Cristo ijapopeve pyndypyape.

²⁰ Potaitianynga ã'ẽ aĩme'ãĩ penendie, yngai aijetape verã! Aikuãã mbaivara ajapopo pyndyrehe, shara pikova rãĩmi ñeembape shyreja!

Ñymyhã'ãnga Agar hareka Sara rãĩmi

²¹ Pee pota pẽĩva Moisés mbypara vekua heiva rãĩmi, pereshe kova: Pyhenduãngamba hoka mbyparava hei vekua?

²² Mbyparahavape hei Abraham ĩmereva mokue tay, penteva hai Agar taupe jokuearea memby, hareka ĩrũ hyrekoite Sara memby, hokava taupe ha'eã hai jokueharea.

²³ Kova jokuearea memby hai oa vekua kuaretare pya ohohea rãĩmi; taupe haimba jokuearea memby, tẽvã oa Tũpa ĩñee meẽva rãĩmi Abrahampe.

²⁴ Kova hai ñymyhã'ãngarã. Hoka mõkue taupe rupii rãnga he'ise mõkue ñee Tũpa meẽ vekua. Taupe Agar rupii ñande jaikuapo hoka ñee me'ẽã vekua, ita vate ouva Sinai ryheva. Hai memby retaivi oa jokuehañoĩre verã.

²⁵ Hoka Agar haĩ yvyturusu Sinai rãĩmiva, Arabiape'õ, ã'ẽ ova tenta Jerusalen. Shara haipe'iare Moisés mbypara vekuaĩ ijokueka jyreshu.

²⁶ Hoka tenta Jerusalen vate arapy'õ hai kova taupe haimba jokuearea, hokava hai opaiteva ñandesy.

²⁷ Shara mbyparahava hei: Vy'aĩ, nde taupe membymba'ia! Sapuke ryvy'akueivi nde rikuambava purua'ia hasymashurã! Hoka taupe ĩme heja vekua ã'ẽ hetavepore memby taupe ĩme'ivaivi.

²⁸ Shyryvyre, pee rãnga hai Isaac rãĩmiva, pee peava jyve Tũpa ĩñee meẽ vekua rupii hai ta'yrãre.

²⁹ Hãrã hoka arape puruava memby kuareta potava rãĩmi ijeshatãã hãndi Espiritu tay, kyrãngãti ikojy ã'ẽ.

³⁰ Tẽvã marãra hei Mbyparahava? Kyrã hei: “Mohẽ taupe jokueareirea memby ryheve, shara ko taupe jokuearea memby katũãpo ĩmere hoka opaite Tuu ña'ãpova haimba jokuearea memby ĩmerea rãĩmi”.

³¹ Hãrã shyryvyre; ñande ha'eã ko taupe jokuearea memby, hoka taupe haimba jokuearea memby rãnga ñande.