Galatas 1 - NandevaBiblia

Pablo mbyparashu kuatia tũpaore Galaciape'õre

¹ She Pablo, apostol, haimbaa kuaretare ñonova hareka kuaretare mondova, koñeĩ Jesucristo rupii hareka Tũpa, Jesúspe mupuãjy vekua manovare paũvi.

² She hareka opaite ñandyryvyre pynymarãndu pee tũpao reta Galaciape peĩva.

³ Tũpa hareka Ñandeja Jesucristo tymeẽpe pya kavi hareka tiñohẽ pyndyrehe pyavapykue.

⁴ Jesucristo rãnga meẽ hykove mbai porãmba jajapo vekua rehe, ñanynohẽ verã ko yvy'ĩãrẽ'õre heko porãmba vekuaivi, Tũpa potava rãĩmi.

⁵ Opa ara toñemombai vasu Tũpa. Amén.

Penteĩ ẽẽ Ñee Kaviva

⁶ Mbyry rãnga amaĩ are'ãĩtemba pimymbyryshi Tũpa, pynyrẽnova heshakape pya kavi Jesucristo rupii, yngava ñee kavi pyroja verã.

⁷ Añete, mba'ety rãnga yngava Ñee kaviva, ĩmeĩ rãnga ẽẽ pota porãmba piniñonova, hareka pota yngai mbeujya Ñee kaviva Jesucristo ryheva.

⁸ Hãrã ore, maĩrã Tũpa jokueva mbeupe ynga ñee kavi, mbe'uha vekuaivirã, hokava tijaheahe.

⁹ Hãma he'iape vekua rãĩmi hykuaĩ haijype: Ĩme'ẽ pynymbytepe ñee kavi yngaiva mbeuvarã pymyvãhẽma vekuaivirã, tijaheahese.

¹⁰ Kyrã hairã: Ahekara kuaretare jururesheva maĩrã Tũpaivira? Ahekara aĩkavi hãndi verã kuaretare? Hãma potaĩ ãĩkavi hãndi kuareta retarã haiveãmaposhekui Jesucristo jokueva.

Pablo henõhã Cristo rupii

¹¹ Aipota pikuaa shyryvyre: Ko Ñee kavi ambeupeva, ha'ẽã kuimbai japova.

¹² Ha'eã me'ẽãshea, ha'eãvãĩjy aikuava kuareta retaivi, Jesucristo teiva rãnga heshakashe.

¹³ Shara pee pyhenduma marãra she aiko aryka'e Judiore aharã, marãra Tũpa ryhevare amoña'ai pyrãtape hareka ikohahe mbaia verã.

¹⁴ Judiore japova ajapo airã, ajapoveshi shyrẽta ĩrũre aivache hãndiare, ajema aingarekotehe ajapo verã sherure pyrỹmboiva rãĩmi.

¹⁵ Tẽvã hai pya'oshyrerã shesy hyepevãĩmba shypyhỹrõ hareka pya kavi ojaimbape shyrẽno.

¹⁶ Heshakashe Tay ambeu verã ĩñee haimba Judiore pãũpi. Hokava ikorã, mbava kuaretãã aha airureshu shymbarakuaa verã,

¹⁷ hareka ahaãvãĩjy Jerusalenpe ahesha verã apostolre tynonde shyhevivare, katynga aharavĩ Arabia kyty, haivi aijy Damascope.

¹⁸ Mbahapy ãñomajyrã aha Jerusalenpe, ahesha verã Pedro hareka haipe apyta hãndi 15 ara,

¹⁹ tẽvã aheshaã ĩrũ apostolre, koñeĩ ahesha Santiago Ñandeja Jesucristo tyvy.

²⁰ Añeteva kova ambyparapeva. Tũpa kuaa shapuãrã!

²¹ Haivi ahajy Siria hareka Cilisia jy'yvyipi.

²² Akua arape, tũpao Cristo ryhevare Judeape'õre shykuaãteri reta.

²³ Koñeĩ hendu pevẽĩte reta heiva: “Ñanymoña'i vekua, ã'ẽ mbeu'i jyve ñee kavi jyroja ryheva, aryka'e pota opa mbai'i vekua”.

²⁴ Hãrã õmombai vasu reta Tũpa shara Hai yngai japojy shykove.